iMatai ni Joni 2:1-29

  • Jisu na isoro meda veiyaloni kina kei na Kalou (1, 2)

  • Muria na nona ivakaro na Kalou (3-11)

    • iVakaro makawa kei na ivakaro vou (7, 8)

  • iNaki ni volavola (12-14)

  • Kua ni lomani vuravura (15-17)

  • Qarauna na meca i Karisito (18-29)

2  Kemuni na luvequ, au vola tiko yani vei kemuni na ka kece qo moni kua kina ni valavala ca. Ia ke mani valavala ca e dua, sa tiko vata kei Tamada e dua na noda dauveivuke, o Jisu Karisito,+ o koya na yalododonu.+  E isoro ni noda ivalavala ca+ meda veiyaloni kina kei na Kalou,+ ia e sega ni noda ga, na nodra ivalavala ca tale ga e vuravura taucoko.+  Ena vuku ni tikina qo eda vakadinadinataka kina nida kilai koya, ya ke da muria tiko ga na nona ivunau.  O koya e kaya, “Au sa kilai koya,” ia e sega ni muria na nona ivunau, e tamata lasulasu, e sega vua na dina.  Ia o koya e muria nona vosa, e vakaraitaka dina na loloma uasivi ni Kalou.+ Ena vuku ni tikina qo, eda kila kina nida duavata kei koya.+  O koya e kaya ni duavata kei koya e dodonu me muria tale ga na ivakarau ni bula* i Jisu.+  Kemuni na wekaqu lomani, au sega ni vola yani qo e dua na ivunau vou, na ivunau makawa ga sa tu vei kemuni mai na ivakatekivu.+ Na ivunau makawa qo na vosa oni rogoca.  Ia au sa vola tale yani qo vei kemuni e dua na ivunau vou, na kena a muria sara ga o koya, oni muria tale ga, ni sa takali tiko yani na butobuto, sa cila tiko na rarama dina.+  O koya e kaya ni tiko ena rarama ia e cata+ na tacina, e se tiko ga ena butobuto.+ 10  O koya e lomana na tacina e tiko ga ena rarama,+ e sega ni dua na ka me tarabe kina. 11  Ia o koya e cata na tacina e tiko ena butobuto, e lako voli ena butobuto,+ e sega ni kila tale ga na vanua e lako tiko kina,+ ni vakamatabokotaki koya na butobuto. 12  Au volavola yani vei kemuni ragone, ni sa vosoti na nomuni ivalavala ca ena vuku ni yacana.+ 13  Au volavola yani vei kemuni na tama, ni oni kilai koya a bula mai na ivakatekivu. Au volavola yani vei kemuni na cauravou, ni oni sa vakamalumalumutaki koya na vunica.+ Au volavola yani vei kemuni ragone, ni oni kilai koya na Kalou, na Tamada.+ 14  Au volavola yani vei kemuni na tama, ni oni kilai koya a bula mai na ivakatekivu. Au volavola yani vei kemuni na cauravou, ni oni kaukaua,+ e dei vei kemuni na vosa ni Kalou,+ oni sa vakamalumalumutaki koya tale ga na vunica.+ 15  Ni kua ni lomani vuravura se na ka e tu e vuravura.+ O koya e lomani vuravura, ena sega ni lomani Tamada o koya,+ 16  baleta na ka kece e tu e vuravura—na gagadre ni yago,+ na gagadre ni mata+ kei na nona dokadokataka e dua na ka* e taukena—e sega ni vu mai vua na Tamada, e vu ga e vuravura. 17  Kena ikuri, sa takali tiko yani na vuravura kei na kena gagadre,+ ia o koya e cakava na loma ni Kalou ena tu ga me sega ni mudu.+ 18  Ragone, sa iotioti ni aua qo, me vaka oni rogoca sa lako tiko mai na meca i Karisito,+ ena gauna mada ga qo sa levu sara na meca i Karisito,+ e vakaraitaka ni sa iotioti dina ni aua. 19  Era biuti keda nira sega ga ni noda itokani.+ Ke ra noda itokani, ke ra tiko vata ga kei keda. Ia era biuti keda me kilai kina nira sega ga ni noda itokani kece.+ 20  Ia e lumuti kemuni o koya na yalosavasava,+ oni kila kece na ka dina. 21  Noqu volavola yani qo e sega ni kena ibalebale ni oni sega ni kila na ka dina,+ au volavola yani ni oni kila, ni sega ni dua na lasu e vu mai na ka dina.+ 22  O cei na dau lasulasu? Sega ni o koya ga e cakitaka ni Karisito o Jisu?+ Qo na meca i Karisito,+ o koya e cakitaka na Tamana kei na Luvena. 23  O koya yadua e cakitaka na Luvena e sega ni vakadonui koya tale ga o Tamana.+ Ia o koya e vakabauta na Luvena+ e vakadonui koya tale ga o Tamana.+ 24  O kemuni, me kua ni yali vei kemuni na ka oni rogoca mai na ivakatekivu.+ Ke sega ni yali vei kemuni na ka oni rogoca mai na ivakatekivu, ena duavata tale ga kei kemuni na Luvena, vaka kina o Tamana. 25  Kena ikuri, qo na ka a yalataka sara ga vei keda o koya—na bula tawamudu.+ 26  Eso era via vakacalai kemuni tiko, oya na vuna au vola yani kina qo vei kemuni. 27  Ia vei kemuni, sa digitaki kemuni na Kalou ena nona kaukaua,+ ni tiko ga vei kemuni na kaukaua qori, e sega ni gadrevi me dua e vakavulici kemuni. Na nona veidigitaki e dina, e sega ni lasu, e vakavulica tale ga vei kemuni na ka kece+ moni duavata tiko ga kina kei koya.+ 28  O koya gona ragone, ni duavata tiko ga kei koya, ni gauna e vakatakilai mai kina eda sa rawa ni doudou ena vosa,+ meda kua ni gole tani nida maduataki koya ena gauna sa tiko kina. 29  Ke oni kila ni dau yalododonu o koya, oni sa na kila tale ga ni o ira kece era cakava na ka e dodonu era luvena.+

iVakamacala e ra

Kir., “me muria tale ga na nona ilakolako.”
Kir., “ka me bula kina.”