Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

O Dau Vakatulewa Vakacava?

O Dau Vakatulewa Vakacava?

“Saga moni kila tiko ga se cava na loma i Jiova.”—EFESO 5:17.

SERE: 69, 57

1. Na cava eso na ivakaraitaki ni lawa ena iVolatabu? E yaga vakacava nida muria?

E VAKARAUTAKA o Jiova e levu na ivakaro matata ena nona Vosa volai. Kena ivakaraitaki, e vakatabuya na veiyacovi tawadodonu, qaravi matakau, butako, kei na mateni. (1 Kor. 6:9, 10) Kena ikuri, e vakaroti ira nona imuri o Jisu Karisito: “Ni lako moni vakavulici ira na lewe ni veivanua kece ga mera tisaipeli, ni papitaisotaki ira ena yaca i Tamada kei na Luvena kei na yalo tabu, vakavulici ira mera muria na ka kece au vakarota vei kemuni. Raica, au tiko vata kei kemuni ena veisiga kece me yacova na ivakataotioti ni veika vakavuravura.” (Maciu 28:19, 20) E itataqomaki dina na lawa kei na ivakaro vakalou qori! Ni muri qori ena vinaka kina na keda irogorogo, eda na bulabula vinaka, ena marautaki tale ga kina na bula vakavuvale. Koya e bibi sara, na noda yalodina ina ivakaro i Jiova, me vaka noda vakaitavi ena cakacaka vakavunau, eda na rawata kina nona veivakadonui kei na nona veivakalougatataki.

2, 3. (a) Na cava e laiva kina na iVolatabu eso na ituvaki meda vakatulewa ga kina? (b) Na taro cava eda na dikeva ena ulutaga qo? (Raica na imatai ni iyaloyalo.)

2 Ena levu na ituvaki e sega ni veidusimaki kina vakamatata  na iVolatabu. Kena ivakaraitaki, e sega ni vakarota vakamatailalai na iVolatabu na isulusulu veiganiti meda tokara na lotu vaKarisito. Ena laurai vakacava eke na vuku i Jiova? E duidui na itovo kei noda ivakarau e veiyasa i vuravura, e duidui tale ga ni toso na gauna. Ke volai ena iVolatabu na lisi ni isulu kei na sasauni meda tokara, ena sega ni veiganiti kei na gauna qo. Qori tale ga na vuna e sega ni vakarautaka kina na Vosa ni Kalou na lawa yadua me baleta na cakacaka, veiqaravi vakavuniwai, kei na ka ni veivakamarautaki meda digia. E soli tu na galala meda vakatulewataka vakataki keda se mera vakatulewataka na ulunivuvale na veika e okati ena tikina qori.

3 Kena ibalebale qori ni sega ni kauaitaka o Jiova na vakatulewa bibi eda cakava, vakauasivi na kena e tara na noda bula? Vakacava ena vakadonuya na Tamada vakalomalagi na vakatulewa eda cakava ke sega ni beci kina na lawa vakaivolatabu? Eda kila vakacava ni vakatulewa eda cakava ena vakamarautaki Jiova, ke sega mada ga ni dua na kena lawa matata?

E BIBI NOMU VAKATULEWA?

4, 5. Ena tara vakacava noda bula kei ira na so tale na vakatulewa eda cakava?

4 Eso era nanuma ni rawa nira cakava ga na ka era vinakata. Ia eda via vakamarautaki Jiova. Ni bera gona nida vakatulewa, meda vakasamataka na ka e tukuna na iVolatabu da qai muria. Kena ivakaraitaki, e tukuna na iVolatabu na rai ni Kalou me baleta na vakayagataki ni dra. Kena ibalebale eda na talairawarawa kina. (Vkte. 9:4; Caka. 15:28, 29) Meda masuti Jiova me vukei keda me rawa ni vakamarautaki koya na noda vakatulewa.

5 Na vakatulewa bibi eda cakava ena tara na noda bula. Ni vinaka noda vakatulewa, eda na veivolekati kei Jiova. Ni ca noda vakatulewa, ena vakaleqa noda veiwekani kei koya. Noda vakatulewa e rawa ni tarai ira tale ga na so tale. Eda sega ni vinakata meda cakava e dua na ka ena vakararawataki ira na tacida se vakaluluqataka nodra vakabauta. Eda sega tale ga ni via vakavu veisei ena ivavakoso. Bibi gona me vinaka na vakatulewa eda cakava.—Wilika Roma 14:19; Kalatia 6:7.

6. Na cava me salavata kei na noda vakatulewa?

6 Vakacava ke sega ni tukuna vakadodonu na iVolatabu na ka me caka ena dua na ituvaki? Ena ituvaki qori, eda na sega ni cakava ga na ka eda vinakata, ia eda na vakasamataka vakavinaka da qai vakatulewa me salavata kei na ka e vakadonuya o Jiova. Nida cakava qori, eda nuidei ni na vakalougatataki keda.—Wilika Same 37:5.

KILA NA LOMA I JIOVA

7. Ke sega ni volai ena iVolatabu na ka meda cakava ena dua na ituvaki, eda na kila vakacava na ka e vinakata o Jiova?

7 De dua o na veinanuyaka, ‘Eda na kila vakacava na ka e vakadonuya o Jiova ke sega mada ga ni vakamatatataki ena nona Vosa?’ E kaya na Efeso 5:17: “Ni saga moni kila tiko ga se cava na loma i Jiova.” Ke sega gona ni dua na lawa matata e volai ena iVolatabu, eda na kila vakacava na loma ni Kalou? Noda masuti koya da qai ciqoma na veidusimaki ni yalona tabu.

8. E kila vakacava o Jisu na ka e vinakata o Jiova? Tukuna na kena ivakaraitaki.

8 Meda raica mada na nona kila o Jisu na ka e vinakata vua o Tamana. Kena ivakaraitaki, ena rua na ituvaki a masu e liu o Jisu qai vakani ira vakacakamana na lewe vuqa. (Maciu 14:17-20; 15:34-37) Ia a bese ni vukica na vatu me madrai ena gauna e viakana kina ni temaki koya na Tevoro ena  vanua talasiga. (Wilika Maciu 4:2-4.) E cakava qori o Jisu ni kila vinaka na rai i Tamana, e sega kina ni via vukica na vatu me madrai. E kila ni sega ni vinakata na Kalou me vakayagataka nona kaukaua me yaga ga vua. Nona cakava qori o Jisu, e vakaraitaka ni nuitaka na veidusimaki i Jiova kei na nona veivuke.

9, 10. Na cava ena vukei keda meda vakatulewa vakayalomatua? Vakatauvatana.

9 Me vakataki Jisu, eda na vakatulewa vinaka ke da nuitaka na veidusimaki i Jiova. Bibi meda muria na ivakasala vuku qo: “Mo nuitaki Jiova ena lomamu taucoko, mo kua ni vakararavi ena nomu yalomatua. Mo nanumi koya ena ka kece o cakava, ena vakadodonutaka na nomu ilakolako o koya. Mo kua ni nanuma ni o sa vuku. Mo rerevaki Jiova, mo lako tani mai na ca.” (Vkai. 3:5-7) Nida vulica na ivakarau ni rai i Jiova ena nona Vosa, eda na kila na ka e vinakata ena duidui ituvaki e basika. Na levu ga ni noda vulica na ivakarau ni nona rai, ena rawarawa ina lomada me muria na nona veidusimaki.—Isik. 11:19.

10 Kena ivakatautauvata: E volivoli tiko e dua na radinivale. E via volia e dua na ivava e domona, ia e saulevu. E mani taroga, ‘Cava ena tukuna o watiqu niu volia na ivava saulevu qo?’ E sega ni lai volivoli kei watina, ia e kila o radinivale na ka ena rairai tukuna. E kila vakacava? Ni rau sa bula vata voli mai ena dua na gauna, e kila vinaka na ivakarau ni rai i watina me baleta na maninitaki ni ilavo. Sa rauta me kila vinaka na rai i watina me baleta na volivoli. E va tale ga qori o Jiova. Na levu ga ni noda kila vinaka na nona ivakarau ni rai kei na nona ivalavala, eda na kila vinaka kina na ka e vinakata na Tamada vakalomalagi ena duidui ituvaki.

SALA MO KILA KINA NA IVAKARAU NI RAI I JIOVA

11. Na cava meda taroga nida wilika se vulica na iVolatabu? (Raica na kato “ Na ka mo Taroga ni o Vulica na Vosa ni Kalou.”)

11 Me rawa nida kila na ivakarau ni rai i Jiova, e bibi meda vuli vakataki keda. Nida wilika se vulica na Vosa ni Kalou, eda rawa ni taroga, ‘Na cava e tukuni e ke me baleti Jiova, nona ivalavala dodonu kei na nona ivakarau ni rai?’ Meda vakatotomuria nona ivakarau ni rai na daunisame o Tevita ni a lagata: “Ni vakatakila vei au na nomuni sala, i Jiova, ni vakavulici au ena nomuni sala. Ni tuberi au meu lako ena nomuni dina qai vakavulici au, ni oni noqu Kalou ni veivakabulai. Au vakanuinui vei kemuni ena siga taucoko.” (Same 25:4, 5) Ni o vakasamataka vakatitobu e dua na tikinivolatabu, de dua o rawa ni taroga: ‘Au na muria vakacava qo ena loma ni vuvale? Na vanua cava tale e rawa ni yaga kina? E vale? Vanua ni cakacaka? Koronivuli? Cakacaka vakaitalatala?’ Nida sa vakadeitaka na vanua meda vakayagataka kina na ka eda vulica, ena rawarawa sara nida kila na ka e vinakata o Jiova ena ituvaki qori.

12. E yaga vakacava na noda ivola kei na soqoni meda kila vinaka kina na ivakarau ni rai i Jiova?

12 Dua tale na sala meda kila kina na ivakarau ni rai i Jiova, oya meda muria vinaka na veidusimaki vakaivolatabu e tabaka na nona isoqosoqo. Kena ivakaraitaki na Watch Tower Publications Index kei na iDusidusi ni Vakadidike ni iVakadinadina i Jiova, e tabaki meda kila kina na ivakarau ni rai i Jiova ena duidui ituvaki ena vinakati kina na vakatulewa. E yaga tale ga vakalevu noda vakarorogo matua ena soqoni kei na noda vakaitavi.  Nida vakasamataka vakatitobu na ka e vakavulici ena soqoni, eda na kila vinaka kina na ivakarau ni rai i Jiova da qai vakatotomuria. Nida gumatua ni vakayagataka na isolisoli e vakarautaka o Jiova meda vakani kina vakayalo, eda na kila vinaka tiko ga na nona rai. Nida cakava qori, ena salavata na noda vakatulewa kei na ka e vinakata, ena vakalougatataka tale ga.

ME DUSIMAKA NOMU VAKATULEWA NA IVAKARAU NI RAI I JIOVA

13. Tukuna e dua na ivakaraitaki e dusia ni rawa nida vakatulewa vakayalomatua ke da kila na ivakarau ni rai i Jiova.

13 Meda dikeva mada na sala eda rawa ni vakatulewa vakayalomatua kina nida kila na ivakarau ni rai i Jiova. Kena ivakaraitaki, nida dautukutuku ni Matanitu ni Kalou, de dua eda na via painia tudei. Eda na saga sara me rawarawa na noda bula. Ena gauna vata qori, eda na rairai nanuma nida na sega ni vakila na marau dina ni lailai ga na ka eda taukena vakayago. E sega tale ga ni vakarota na iVolatabu meda painia; ni rawa nida qaravi Jiova tiko ga nida dua na dautukutuku yalodina. Ia e yalataka o Jisu ni o ira era vakuai ira ena vuku ni Matanitu ni Kalou, era na vakalougatataki vakalevu. (Wilika Luke 18:29, 30.) E tukuna tale ga na iVolatabu ni marau o Jiova nida cabora vua na “isolisoli sega ni lavaki ni vakavinavinaka” da qai marau ni cakava na ka eda rawata me tokoni kina na sokalou dina. (Same 119:108; 2 Kor. 9:7) Nida dikeva na tikinivolatabu qori da qai masuta na veidusimaki i Jiova, eda na rawa ni kila kina na nona ivakarau ni rai. Nida cakava qori ena uqeti keda meda vakatulewataka na ka ena ganiti keda qai vakalougatataka na Tamada vakalomalagi.

14. O na kila vakacava ni na marautaka o Jiova na isulu eda tokara?

14 Qo e dua tale na ivakaraitaki: Kaya mada ke o taleitaka e dua na mataqali isulu ena rawa ni vakavu veivosaki eso ena ivavakoso. O kila tale ga ni sega ni volai ena iVolatabu na lawa me vakatabuya na isulu qori. Ia vakacava na rai i Jiova? Dikeva mada na ivakasala vakalou i Paula: “Au vinakata tale ga mera dara na yalewa na isulu veiganiti, e rakorako, me laurai kina na yalomatua, me kua na veimataqali italitali ni drauniulu, na koula se mataniciva se isulu saulevu, ia ena sala ga e rakorako kei ira na yalewa era kaya nira qarava na Kalou, ya ena nodra cakava na  ka vinaka.” (1 Tim. 2:9, 10) Na ivakavuvuli qo e baleti ira tale ga na tagane vaKarisito. Nida qaravi Jiova, eda na sega ni nanumi keda ga, eda na kauaitaka tale ga na nodra rai eso tale me baleta noda isulusulu kei na isasauni. Ni rakorako na keda rairai da qai lomani ira na tacida, eda na kauaitaka na nodra rai, me kua kina ni vakavu kauai se veivakatarabetaki. (1 Kor. 10:23, 24; Fpai. 3:17) Ni matata tiko vei keda na ka e tukuna na iVolatabu, eda na kila kina na ivakarau ni rai i Jiova ena ka e vauca na keda irairai, ena dusimaki keda tale ga meda vakatulewa vakayalomatua.

15, 16. (a) Na cava na rai i Jiova ke da dau vakasamataka na veiyacovi tawadodonu? (b) Nida digia na ka ni veivakamarautaki, eda na kila vakacava na ka ena vakamarautaki Jiova? (c) Cava meda cakava ni vinakati meda vakatulewa bibi?

15 E kaya na iVolatabu ni rarawataka o Jiova na sala ca era muria na tamata kei na ‘ca ni vakanananu ni lomadra ena gauna kece ga.’ (Wilika Vakatekivu 6:5, 6.) Qori eda kila kina ni cala na tatadrataki ni veiyacovi ni rawa ni tini ena ivalavala ca bibi e vakatabuya na iVolatabu qai sega ni salavata kei na ivakarau ni rai i Jiova. E vola na tisaipeli o Jemesa: “Na vuku mai cake me savasava mada, qai dau veiyaloni, e yalorawarawa, e vakarau tu me talairawarawa, e dau yalololoma qai cakava e levu na ka vinaka, e sega ni dau veivakaduiduitaki, se dau veivakaisini.” (Jeme. 3:17) Nida kila tiko qori, ena vu mai lomada noda cata na ka ni veivakamarautaki e bukana na vakasama kei na vakanananu vakasisila. Na lotu vaKarisito yalomatua ena sega tale ni vakataroga ke veiganiti me wilika na ivola, qito se sarava na iyaloyalo e cata o Jiova. Sa vakamatatataki tu ena nona Vosa na ivakarau ni nona rai me baleta na veika va qori.

16 Eso na vakatulewa e rawa ni duidui qai rawa ni donu kece vei Jiova. Ia eso na vakatulewa bibi, so na gauna ena vinaka meda qara na nodra ivakasala na qase ni ivavakoso se o ira na lotu vaKarisito matua. (Taito 2:3-5; Jeme. 5:13-15) Macala ga ni sega ni ka vakavuku meda kerea e dua me vakatulewa ena vukuda. E dodonu kina meda vakavulica da qai vakayagataka na noda dui vakasama. (Iper. 5:14) E bibi meda muria kece na ivakasala vakalou i Paula: “Nida na dui colata ga na noda dui itavi.”—Kala. 6:5, vmr.

17. Ena yaga vakacava na vakatulewa ena vakamarautaki Jiova?

17 Nida yavutaka noda vakatulewa ena ivakarau ni rai i Jiova, eda na toro volekati koya. (Jeme. 4:8) Eda na marautaka nona veivakadonui kei na nona veivakalougatataki. Qori ena vaqaqacotaka noda vakabauti koya na Tamada vakalomalagi. Koya gona, me dusimaki keda mada ga na lawa kei na ivavavuvuli vakaivolatabu, ni vakavotui kina na rai ni Kalou ena ituvaki kece. Macala ga ni na tiko na ka vovou eda na vulica me baleti Jiova. (Jope 26:14) Ia ena gauna mada ga qo, ke da saga vagumatua meda vulici koya, eda na yalomatua da qai vakatulewa vinaka. (Vkai. 2:1-5) E dau veiveisau na nanuma kei na lalawa ni tamata, ia qo na ka e vakadeitaka na daunisame me baleti Jiova: “Na vakatulewa i Jiova ena tu ga me tawamudu, na nanuma ni lomana ena tu ga mai na dua na itabatamata ina dua tale na itabatamata.” (Same 33:11) Macala ga ni rawa ni vinaka na vakatulewa eda cakava ke salavata kei na ivakarau ni rai i Jiova na noda vakanananu kei na noda ivalavala.