Vei Ira mai Roma 7:1-25
7 Vakaevei, oni sa lecava raveitacini (niu vosa tiko qo vei kemuni oni kila na lawa,) ni lewa na tamata na Lawa ena gauna kece e bula tiko kina?
2 Kena ivakaraitaki, e vauci na yalewa vakawati ena lawa i watina ni se bula o watina, ia ni mate o watina, sa na sereki o yalewa mai na lawa i watina.+
3 O koya gona, ni se bula tiko o tagane, ena wili o yalewa me veibutakoci ke vakawati kei na dua tale na tagane.+ Ia ke mate o tagane, sa na galala o yalewa mai na lawa i watina, ena sega ni wili me veibutakoci ke vakawati tale.+
4 O koya gona raveitacini, oni a mate tale ga ena Lawa ena vuku ni yago i Karisito me taukeni kemuni kina o koya+ a vakaturi mai na mate,+ meda qai vua me vakalagilagi kina na Kalou.+
5 Ni se vakayago na noda gagadre, e dau malele na yagoda* ina ivalavala ca e vakavotui ena Lawa, e vuataki kina na mate.+
6 Ia qo eda sa sereki mai na Lawa,+ nida a mate ena ka a vauci keda tu meda bobula kina ena vakasama vou vakayalo,+ sega ena vakasama makawa e vu mai na lawa volai.+
7 Na cava meda qai kaya? Sa ca na Lawa? Sega sara! Ke sega na Lawa keu sega ni kila na ivalavala ca.+ Me kena ivakaraitaki, au na sega ni kila na cava na kocokoco, ke sega ni tukuna na Lawa: “Mo kua ni kocokoco.”+
8 Na ivunau ya e uqeta na ivalavala ca me bucini e lomaqu na veimataqali kocokoco kece ga, baleta ke sega na lawa ena mate na ivalavala ca.+
9 Au a bula tiko ni bera na lawa. Ni yaco mai na ivunau, e bula tale mai na ivalavala ca, ia au sa qai mate.+
10 E dodonu me veivakabulai na ivunau,+ ia au raica ni veivakamatei tale.
11 Ni uqeta na ivalavala ca na ivunau ya, e temaki au qai vakamatei au.
12 E savasava na Lawa, e savasava tale ga na ivunau, e dodonu, e vinaka.+
13 E vakavuna noqu mate na ka vinaka? Sega sara! Ia na ivalavala ca e vakavotui ena ka vinaka+ oya, qori sara ga e vakavuna na noqu mate, e ca sara na ivalavala ca ni tiko na ivunau.+
14 Eda kila ni ka vakayalo na Lawa. Ia o yau au vakayago ga, au volitaki meu bobula ina ivalavala ca.+
15 Na ka au cakava tiko au sega ni kila. Na ka au via cakava au sega ni cakava, ia na ka au cata au qai cakava.
16 Keu mani cakava tiko na ka au sega ni vinakata, au vakadinata ni vinaka na Lawa.
17 E sega ni o yau au cakava tiko, na ivalavala ca ga e tiko vei au.+
18 Au kila ni sega ni dua na ka vinaka e tiko vei au, oya e yagoqu. E levu na ka vinaka au via cakava, ia e sega vei au na kaukaua meu cakava kina.+
19 Na ka vinaka au via cakava au sega ni cakava, ia na ka ca au sega ni vinakata au qai cakava.
20 Keu cakava na ka au sega ni vinakata, e sega ni o yau au cakava tiko, na ivalavala ca ga e tiko vei au.
21 Au qai raica na lawa qo: Niu via cakava na ka e dodonu, e tiko ga vei au na ca.+
22 E vu dina mai lomaqu noqu marautaka na lawa ni Kalou,+
23 au qai raica ni dua tale na lawa e tiko ena yagoqu* e veivala tiko kei na lawa ni noqu vakasama+ qai vakabobulataki au ina lawa ni ivalavala ca+ e tiko e yagoqu.*
24 Au sa vakaloloma dina! O cei ena vakabulai au mai na yago e vakavuna tiko na noqu mate?
25 Me vakavinavinakataki na Kalou ena vuku i Jisu Karisito na noda Turaga! O koya gona, ena noqu vakasama, au bobula ina lawa ni Kalou. Ia na yagoqu e bobula ina lawa ni ivalavala ca.+
