Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Vakayagataka Vinaka na iSolisoli Kece i Jiova

Vakayagataka Vinaka na iSolisoli Kece i Jiova

“O yau o Jiova na nomu Kalou, o koya e vakavulici iko mo vinaka kina.”—AISEA 48:17.

SERE: 117, 114

1, 2. (a) Eda raica vakacava na iVolatabu na iVakadinadina i Jiova? (b) Na ivola vakaivolatabu cava o dau taleitaka?

EDA taleitaka na iVolatabu na iVakadinadina i Jiova. E tiko kina na ivakasala nuitaki, e veivakacegui qai solia vei keda na inuinui. (Roma 15:4) Eda sega ni raica na iVolatabu me vosa ni tamata, ia eda “vakabauta ni vosa dina ni Kalou.”—1 Ces. 2:13.

2 Macala ga ni tiko eso na ivola ena iVolatabu eda dau taleitaka. Eso era taleitaka na Kosipeli, ni vakamacalataki kina na talei ni itovo i Jiova e mai vakavotuya na Luvena. (Joni 14:9) Eso era taleitaka na parofisai vakaivolatabu—de dua na Vakatakila, ni vakamacalataki kina “na ka ena vakarau yaco.” (Vkta. 1:1) Eso tale era taleitaka na Same ni veivakacegui se na ivakasala yaga ena Vosa Vakaibalebale. Io, e volai na iVolatabu me baleti keda kece.

3, 4. (a) Eda raica vakacava na noda ivola? (b) Na ivola vakaivolatabu cava e dau vakarautaki me baleti ira eso?

3 Nida taleitaka na iVolatabu, eda na taleitaka tale ga na noda ivola vakaivolatabu. Kena ivakaraitaki, eda vakavinavinakataka na kakana vakayalo e tabaki ena ivola, brochure, mekesini kei na so tale. Eda kila ni isolisoli qori e vakarautaka  o Jiova meda yadra tiko kina vakayalo, meda vakani vinaka da qai “dei ena vakabauta.”—Taito 2:2.

4 Kena ikuri, eso na noda ivola vakaivolatabu e dau tabaki me baleti ira eso. Kena ivakaraitaki eso me baleti ira na itabagone; eso tale me ivukevuke vei ira na itubutubu. Levu tale ga na ivola se ulutaga ena website e baleti ira na lewenivanua era sega ni tiko ena dina. E sega ni caka rawa na levu ni kakana vakayalo, eda vakadeitaka kina ni dina o Jiova ena nona yalayala me “vakarautaka . . . vei ira na lewe ni veivanua kece e dua na kanavata ena kakana uro.”—Aisea 25:6.

5. Na cava eda vakadeitaka ni na marautaka o Jiova?

5 De dua eda dau diva me levu wale ga na gauna meda wilika kina na iVolatabu kei na ivola vakaivolatabu. Eda vakadeitaka ni marautaka o Jiova na sasaga eda cakava meda “vakayagataka vakavinaka na [noda] gauna” ena wili iVolatabu vakawasoma kei na vuli vakataki keda. (Efeso 5:15, 16) Ena so na gauna eda na rairai sega ni vakayagataka kece na kakana vakayalo e vakarautaki. Ia e dua na ka meda qaqarauni kina. Na cava ya?

6. Na cava e rawa ni vakavuna meda calata kina na yaga ni ka e vakarautaka o Jiova?

6 Ke da sega ni qaqarauni, e rawa nida nanuma ni so na tikinivolatabu se ivola e tabaki e sega ni baleti keda. Kena ivakaraitaki, vakacava ke da nanuma ni dua na tikinivolatabu e sega ni ganita na keda ituvaki? Se sega ni ganiti keda e dua na ulutaga e tabaki vakatabakidua vei ira eso? Vakacava eda dau wilika totolo ga se da sega sara ga ni via wilika? Ke da cakava qori, eda na calata kina na itukutuku ena yaga vei keda. Cava gona me caka? Meda nanuma tiko ni solisoli vakayalo kece e vakarautaka o Jiova. E tukuna o koya ena gusu i Aisea: “O yau o Jiova na nomu Kalou, o koya e vakavulici iko mo vinaka kina.” (Aisea 48:17) Eda na veivosakitaka qo e tolu na ka meda cakava me rawa ni yaga vei keda na isolisoli kece vakayalo e vakarautaka o Jiova.

KA MEDA CAKAVA ME YAGA NODA WILI IVOLATABU

7. Na cava me kua kina ni qiqo noda rai nida wili iVolatabu?

7 Me kua ni qiqo noda rai nida wiliwili. E vakamatatataka na iVolatabu ni “vakavuna na Kalou na iVolatabu kece, e yaga.” (2 Tim. 3:16) Macala ga ni so na ivola ena iVolatabu e volai taumada vua e dua se vakailawalawa. Ya na vuna e bibi kina me kua ni qiqo noda rai nida wili iVolatabu. E tukuna e dua na tacida tagane: “Niu wili iVolatabu, au saga meu nanuma tiko ni rawa ni levu toka na ka au vulica mai na dua ga na tikinivolatabu.” E kuria: “Ni matata tiko vei au qo, au rawa ni vulica kina eso na tikina au sega ni nanuma tu e liu.” Ni bera nida wilika na Vosa ni Kalou, eda na masuta me kua ni qiqo noda rai, eda na kerea na vuku meda kila rawa kina na lesoni e vinakata o Jiova meda vulica.—Esera 7:10; wilika Jemesa 1:5.

Vakacava e yaga tiko nomu wili iVolatabu? (Raica na parakaravu 7)

8, 9. (a) Na cava meda taroga nida wili iVolatabu tiko? (b) Cava eda vulica vei Jiova nida dikeva na ivakatagedegede e vinakati vei ira na qase?

8 Mo dau taro. Ni o wili iVolatabu tiko, me tiko na gauna mo cegu kina qai taroga eso na taro va qo: ‘Na cava au vulica e ke me baleti Jiova? Meu muria vakacava qo? Au na vakayagataka vakacava meu vukei ira kina eso tale?’ Nida vakasamataka vakatitobu na taro qori, ena yaga vakalevu na noda wili iVolatabu. Kena ivakaraitaki, vakasamataka mada na ivakatagedegede e vinakati vei ira na qase ni  ivavakoso. (Wilika 1 Timoci 3:2-7.) Ia eda sega ni qase ni ivavakoso kece, de dua eda na nanuma ni tikinivolatabu qo e sega so ni vakaibalebale vei keda. Nida vakasamataka gona na isau ni vica na taro eda na dikeva qo, eda na liaca ni yaga tale ga vei keda kece na ivakatagedegede e vinakati vei ira na qase.

9 Na cava au vulica e ke me baleti Jiova? Ni vola o Jiova na ivakatagedegede kece qori, e dusia ni cecere na ivakatagedegede e vinakata vei ira kece era lesi. E namaka mera ivakaraitaki vinaka, ena lewai ira na qase ena sala era qarava kina na ivavakoso, “e volia sara ga ena dra i Luvena.” (Caka. 20:28) E vinakata o Jiova meda kua ni lomaleqa nira karoni keda na ivakatawa. (Aisea 32:1, 2) Kena ibalebale, na ivakatagedegede vakaivolatabu e vinakati vei ira na qase e vakadeitaka na levu ni nona lomani keda o Jiova.

10, 11. (a) Nida wilika na ivakatagedegede e vinakati vei ira na qase, ena yaga vakacava ena noda bula? (b) Eda na vakayagataka vakacava qori meda vukei ira kina eso tale?

10 Meu muria vakacava qo? E bibi vua na tagane e lesi me dau dikevi koya wasoma ni raica vata kei na ivakatagedegede vakayalo kei na so na vanua me vakavinakataka. Ke dua na tacida tagane e “via qarava na itavi vakaivakatawa,” ena vinakati me saga ena nona vinaka taucoko me rawata. (1 Tim. 3:1) Eda rawa ni vuli kece na lotu vaKarisito ena ivakatagedegede qori. Ni levu vei ira qori e vauca na ka e vinakata vei keda kece o Jiova. Kena ivakaraitaki, dodonu meda yalorawarawa da qai yalomatua na lotu vaKarisito kece. (Fpai. 4:5; 1 Pita 4:7) Eda na via vuli vei ira na qase nira ‘ivakaraitaki vei ira na qelenisipi,’ da qai “vakatotomuria na nodra vakabauta.”—1 Pita 5:3; Iper. 13:7.

11 Au na vakayagataka vakacava meu vukei ira kina eso tale? Eda rawa ni vakayagataka na ivakatagedegede e vinakati vei ira na qase meda vukei ira na tataleitaki se ira na vuli iVolatabu mera raica nira duidui na qase ni ivavakoso ni iVakadinadina i Jiova ni vakatauvatani kei ira na liuliu ni lotu ni Veivanua vakarisito. Kena ikuri, nida  wilika tiko na ivakatagedegede kece qori, de dua eda na vakasamataka na sasaga era cakava tiko ena vukuda na qase ena loma ni ivavakoso. Nida vakasamataka na nodra vakuai ira, ena titobu noda “dokai ira na cakacaka vakaukaua” ena keda maliwa. (1 Ces. 5:12) Na levu ga ni noda dokai ira na ivakatawa gugumatua, era na marautaka vakalevu nodra veiqaravi.—Iper. 13:17.

12, 13. (a) Sala cava eda rawa ni vakekeli kina ni vakayagataki na iyaya vakarautaki? (b) Na ivakaraitaki cava e dusia na yaga ni noda dau vakekeli?

12 Mo vakekeli. Nida vakayagataka na iyaya e vakarautaki, de dua eda na via vakekeli ena so na itukutuku va qo:

  • O cei e vola na wase ni iVolatabu qo?

  • Gauna kei na vanua cava e volai kina?

  • Na ituvaki vakairogorogo cava a yaco ni volai na ivola vakaivolatabu qo?

Na isaunitaro qori ena vakavotuya eso na itukutuku eda sega tu ni kila.

13 Kena ivakaraitaki, dikeva mada na Isikeli 14:13, 14: “Ke valavala ca vei au e dua na vanua ni tawayalodina, au na dodoka na ligaqu meu vakarusa na kedra kakana, au na tala kina na leqa ni kakana, au na vakamatea na tamata kei na manumanu era tiko kina. ‘Ke ratou tiko mada ga kina na le tolu na tagane qo, o Noa, o Taniela, kei Jope, eratou na vakabulai ratou ga ena dodonu ni nodratou ivalavala,’ e kaya na Turaga Cecere Duadua o Jiova.” Nida vakekeli, eda na kila ni volai na tikinivolatabu qori ena 612 B.G.V. Rau sa takali makawa o Noa kei Jope ena gauna qori, se nanuma vinaka tale tu ga o Jiova na nodrau yalodina. Ia e se bula tiko o Taniela, de dua e yabaki 20 vakacaca ena gauna e vakatokai koya kina o Jiova me yalododonu me vakataki Noa kei Jope. Cava eda vulica? E kila vinaka qai raica vakabibi o Jiova na nodra yalodina na nona dauveiqaravi, wili kina o ira se gone.—Same 148:12-14.

VAKAYAGATAKA VINAKA NA IVOLA VAKAIVOLATABU KECE

14. E yaga vakacava vei ira na itabagone na ivola e tabaki me baleti ira? Ena yaga tale ga vakacava vei keda kece? (Raica na imatai ni iyaloyalo.)

14 Eda veivosakitaka mai ni yaga vakalevu na noda vulica na ivola kece ena iVolatabu, e va tale ga qori na ivola kece vakaivolatabu e tabaki. Qo eso na kena ivakaraitaki: iVola e baleti ira na itabagone. E veiyabaki sa sivi, e levu na noda ivola e baleti ira na itabagone. [1] Eso na ulutaga e vakarautaki me vukei ira mera vosota na ituvaki dredre e koronivuli se na bula vakaitabagone. Ia nida wilika na ulutaga qori, ena yaga vakacava vei keda kece? Eda na liaca kina na veika dredre era sotava voli na itabagone yalodina. Ena rawarawa meda veivuke se vakayaloqaqataki ira.

15. Na cava mera kauaitaka kina na lotu vaKarisito uabula na ulutaga e baleti ira na itabagone?

15 Levu na ituvaki dredre e vakamacalataki ena ivola me baleti ira na itabagone, eda sotava tale ga na lotu vaKarisito kece. Kena ivakaraitaki: E vinakati vei keda kece meda tutaka noda vakabauta, lewa na ivakarau ni lomada, valuta na idre ni veimurimuri, qarauna na vakailala ca kei na ka ni veivakamarautaki. Na ulutaga qori kei na so tale e tabaki ena ivola e baleti ira na itabagone. Vakacava era na sega ni wilika na uabula na ivola e tabaki vei ira na itabagone nira nanuma ni sega  ni veiganiti? Sega! Ke volai mada ga me uqeti ira na itabagone, me nanumi tiko ni yavutaki qori mai na ivakavuvuli vakaivolatabu, ni yaga vei keda kece.

16. Na cava e dua tale na sala e vukei ira kina na itabagone noda ivola?

16 Na noda ivola e uqeti ira tale ga na itabagone mera tubu vakayalo, mera veivolekati kei Jiova. (Wilika Dauvunau 12:1, 13.) E yaga tale ga qori vei ira na uabula. Kena ivakaraitaki, na Yadra! Epereli 2009 e tiko kina na ulutaga “Ra Taroga na iTabagone . . . Rawa Niu Marautaka Vakacava na Wili iVolatabu?” E vakamacalataki kina eso na vakatutu kei na kato e rawa nida kotiva me maroroi ena noda iVolatabu me idusidusi. Vakacava e bau yaga vei ira na uabula na ulutaga qori? E tukuna e dua na yalewa vakawati yabaki 24, e tina tale ga ni dau dredre vua na wili iVolatabu. Ia e qai muria na vakatutu ena ulutaga qori, e marautaka na kedra veisemati na ivola vakaivolatabu e vaka e lai vakavotui kina e dua na droini totoka. E kaya: “Nikua, au sega sara ga ni via calata na wili iVolatabu. Au sa qai marautaka ga vakalevu na wilika.”

17, 18. E yaga vakacava nida wilika na ulutaga e baleti ira na lewenivanua? Tukuna e dua na ivakaraitaki.

17 iVola me baleti ira na lewenivanua. Ena 2008 eda marautaka tiko mai kina na vulici ni Vale ni Vakatawa e tabaki vakatabakidua vei keda na iVakadinadina i Jiova. Ia vakacava na noda mekesini e tabaki me baleti ira na lewenivanua? E rawa ni yaga tale ga vei keda? Qo e dua na kena ivakaraitaki. Kaya mada ni o tiko ena vale ni soqoni ni bera na vunau soqovi levu, o raica ni gole mai ena soqoni e dua o sureta. Dua na ka nomu marau. Ni sa tekivu na vunau, o sa na rairai nanumi koya nomu vulagi. O na veinanuyaka se na tarai koya vakacava na ivunau. Ni oti na vunau, dua na ka nomu vakavinavinakataka na ka o rogoca.

18 E tautauvata tale ga nida wilika na ulutaga e tabaki me baleti ira na lewenivanua. Kena ivakaraitaki, na Vale ni Vakatawa e tabaki me baleti ira na lewenivanua e vakamacalataki kina na ulutaga vakaivolatabu ena rawarawa vua e dua e sega ni tiko ena dina. E va tale ga qori e levu na ulutaga e tabaki ena jw.org, me vaka na “Saumi na Taro Vakaivolatabu” kei na “Taro e Tarogi Wasoma.” Nida wilika ena uqeti keda meda raica sara vakabibi na ka dina qori. Kena ikuri, de dua eda na vulica eso tale na iwalewale meda vakamacalataka kina noda vakabauta ena cakacaka vakaitalatala. E va tale ga kina na Yadra! e vaqaqacotaka tiko ga noda vakabauta ni bula tiko na Kalou dina, e vukei keda tale ga meda vulica na sala meda tutaka kina noda vakabauta.—Wilika 1 Pita 3:15.

19. Eda na vakavinavinakataka vakacava na isolisoli i Jiova?

19 E macala gona ni o Jiova e vakarautaka vakayauyau na isolisoli me baleta noda “bula vakayalo.” (Maciu 5:3) Meda vakayagataka tiko ga na isolisoli kece vakayalo e vakarautaki. Nida cakava qori, eda sa vakavinavinakataki Jiova, o koya e vakavulici keda tiko meda vinaka kina.—Aisea 48:17

^ [1] (parakaravu 14) E okati kina qori na Questions Young People Ask—Answers That Work, Volume 1 kei na 2, vaka kina na ulutaga “Ra Taroga na iTabagone,” e tabaki ena noda website.