iMatai ni iVola Vei Ira mai Korinia 6:1-20
6 Ni dua vei kemuni e veileqaleqati kei na tacina,+ na cava me kauta kina na leqa qori ina mataveilewai mera rogoca na tamata tawayalododonu, e sega ni kauta vei ira na yalosavasava?
2 Se oni sega ni kila nira na lewai vuravura na yalosavasava?+ Ke sa rawa ni oni lewai vuravura, moni qai sega ni lewa rawa vakacava na veika era sega soti ni bibi?
3 Oni sega ni kila nida na lewai ira na agilosi?+ Na cava meda qai sega ni lewa rawa kina na ka ni bula qo?
4 Ke so na ka ni bula qo e dodonu me vakatulewataki,+ na cava oni laivi ira kina e taudaku ni ivavakoso mera turaganilewa?
5 Au vosa tiko qo moni madua kina. Vakacava sa sega sara ga ni kune ena kemuni maliwa e dua na tamata vuku me turaganilewa vei ira na tacina?
6 Ia era veikau ina mataveilewai na veitacini mera rogoca na tawavakabauta na nodra kisi!
7 Oni vakaloloma sara ga ni oni sa veilewaitaki ira na tacimuni. Vakacava moni vosota mada ga ke oni vakacalai?+ Vakacava moni vosota mada ga ke oni lawakitaki?
8 O kemuni mada ga oni dau caka ca, oni dau veidabui, oni qai cakava qori vei ira sara ga era tacimuni!
9 Oni sega ni kila nira na sega ni rawata na Matanitu ni Kalou na tawayalododonu?+ Ni kua ni vakacalai. O ira na dauveiyacovi tawadodonu,*+ qaravi matakau,+ veibutakoci,+ na tagane era soli ira mera veiyacovi kei ira na tagane,+ o ira na tagane era daumocera na tagane,*+
10 o ira na daubutako, daukocokoco,+ daumateni,+ dauveivakasewasewani, kei ira na dau kovea na ka, era na sega ni rawata na Matanitu ni Kalou.+
11 Eso sara ga vei kemuni oni a va tu ya. Ia oni sa vakasavasavataki,+ oni vakatabui,+ oni vakadonui+ ena yaca ni Turaga o Jisu Karisito kei na yalo tabu ni noda Kalou.
12 Na ka kece e tara vei au, ia e sega ni yaga na ka kece.+ Na ka kece e tara vei au, ia au na sega ni vakatara me lewai au e dua na ka.
13 Na kakana e baleta na kete, na kete e baleta na kakana, ia na Kalou ena vakatawayagataki rau ruarua.+ Na yago e sega ni dodonu me veiyacovi tawadodonu,* me nona ga na Turaga.+ Na Turaga e nona na yago.
14 Ia na Kalou e vakaturi koya na Turaga,+ ena vakaturi keda tale ga mai na mate+ ena nona kaukaua.+
15 Oni sega ni kila ni yagomuni era semai vei Karisito me vaka na tikiniyagona?+ Meu kauta na yago i Karisito meu vukica me yago ni saqamua? Me kua sara!
16 Oni sega ni kila ni o koya e semai vata kei na saqamua erau sa na dua ga na yago? Ni kaya o koya, “Erau sa na lewe dua ga.”+
17 Ia o koya e semai vua na Turaga e yalovata kei koya.+
18 Dro tani mai na veiyacovi tawadodonu!*+ Na ivalavala ca kece e cakava e dua e cakava ena taudaku ni yagona, ia o koya e veiyacovi tawadodonu sa valavala ca sara tiko ga e yagona.+
19 Oni sega ni kila ni yagomuni e valenisoro+ ni yalo tabu e tiko vei kemuni, na yalo tabu e solia mai na Kalou?+ Oni sega tale ga ni taukeni kemuni,+
20 ni oni a voli ena isau levu sara.+ E dodonu gona moni vakalagilagia na Kalou+ ena yagomuni.+
iVakamacala e ra
^ Raica na iVakamacala ni Vosa.
^ Se “ira na tagane era veiyacovi kei na tagane.”
^ Kirisi, por·neiʹa. Raica na iVakamacala ni Vosa.
^ Kirisi, por·neiʹa. Raica na iVakamacala ni Vosa.
