Vola o Joni 20:1-31
20 Ena imatai ni siga ni macawa ni se buto e sou ina ibulubulu* o Meri Makitala.+ E raica ni sa vaqiqici tani tu na vatu mai na ibulubulu.*+
2 E mani cici vei Saimoni Pita kei na tisaipeli e dau lomana o Jisu+ qai tukuna vei rau: “Era sa kauta na Turaga mai na ibulubulu,+ ia keitou sega ni kila na vanua era vakadavori koya kina.”
3 Erau sa qai biubiu o Pita kei na tisaipeli adua me rau lako ina ibulubulu.
4 Erau cici ruarua yani, ia e sivi Pita na tisaipeli adua ni sa bau totolo sara ga na nona cici mani liu ina ibulubulu.
5 Ni iro yani e raica sara na isulu lineni,+ ia e sega ni curu i loma.
6 Sa qai muri koya yani o Saimoni Pita, e curu sara ina ibulubulu, e raica tale ga ni sa tu e ra na isulu lineni.
7 Na isulu a viviraki e ulu i Jisu sa sega ni biu vata tu kei na ivovo ni tikinisulu, ia e sa vivi qai biu toka vakatikitiki.
8 Gauna vata ya e curu yani i loma na tisaipeli a liu vei rau ina ibulubulu, e raica, sa qai vakadinata.
9 Ni rau se sega ni kila na ka e tukuni ena tikinivolatabu ni dodonu me vakaturi mai na mate.+
10 Erau mani lesu na tisaipeli i nodrau vale.
11 Ia o Meri e duri tu ga e tuba volekata na ibulubulu, e tagi voli. Ni se tagi tiko ga, e iro sara i loma ni ibulubulu,
12 qai raica e rua na agilosi+ erau vakaisulu vulavula ni rau dabe toka ena vanua a vakadavori kina na yago i Jisu, dua e uluna, dua e yavana.
13 Erau tarogi koya: “Na cava o tagica tiko?” E kaya vei rau: “Era sa kauta na noqu Turaga, au sega ni kila na vanua era vakadavora kina.”
14 Ni cavuta oti na vosa ya, e raivuki qai raici Jisu ni duri tu, ia e sega ni kila ni o Jisu.+
15 E qai kaya vei Meri o Jisu: “Na cava o tagica tiko? O vaqarai cei?” E nanuma o Meri ni rau veivosaki tiko kei na dausasamaki, mani kaya vua: “Isa kemuni, ke oni sa kauti koya ina dua tale na vanua, yalovinaka ni tukuna vei au meu rawa ni lai maroroya na yagona.”
16 E kaya vua o Jisu: “Meri!” E vuki mai o Meri qai kaya vua ena vosa vakaIperiu: “Raponai!” (kena ibalebale “Qasenivuli!”)
17 E kaya vua o Jisu: “Kua ni tarai au tiko niu se bera ni lako vei Tamaqu. Mo lako ga vei ratou na taciqu+ qai kaya vei ratou, ‘Au sa lako cake vei Tamaqu,+ na Tamamudou tale ga, vua na noqu Kalou,+ na nomudou Kalou tale ga.’”
18 E lako o Meri Makitala qai tukuna vei ratou na tisaipeli. E kaya: “Au sa raica na Turaga!” E tukuna tale ga vei ratou na ka e tukuna vua.+
19 Ena yakavi ni imatai ni siga ni macawa, ni loka tu na katuba ena vale eratou tiko kina na tisaipeli ni ratou rerevaki ira na Jiu, e lako yani o Jisu lai tucake tu ena kedratou maliwa qai kaya vei ratou: “Me nomudou mada ga na vakacegu.”+
20 Ni cavuta oti qori, e qai vakaraitaka vei ratou na ligana kei na sarisarina.+ Dua na ka nodratou marau na tisaipeli ni ratou raica na Turaga.+
21 E tukuna tale vei ratou o Jisu: “Me nomudou mada ga na vakacegu.+ Au sa talai kemudou yani+ me vaka ga na nona talai au mai o Tamaqu.”+
22 Ni cavuta oti qori, e uvuca yani vei ratou na cagi qai kaya: “Me sobuti kemudou na yalo tabu.+
23 Ke dou vosota nona ivalavala ca e dua, ena vosoti, ke dou sega ni vosota nona ivalavala ca e dua, ena sega ni vosoti.”
24 Ia o Tomasi,+ e dua vei ratou na le Tinikarua, e dau vakatokai tale ga na Drua, a sega ni tiko ena gauna e lako yani kina o Jisu.
25 Eratou mani kaya vua na vo ni tisaipeli: “Keitou sa raica na Turaga!” Ia e kaya vei ratou: “Meu raica sara na we ni ivako e ligana, meu tara na we ni ivako e ligana, meu tara tale ga na sarisarina,+ au na qai vakabauta.”
26 Oti e walu na siga eratou tiko tale e lomanivale na tisaipeli, e tiko tale ga kina o Tomasi. E qai curu yani ena vale eratou tiko kina o Jisu e dina ni loka tu na katuba, e duri sara ena kedratou maliwa qai kaya: “Me nomudou mada ga na vakacegu.”+
27 E tukuna sara vei Tomasi: “Biuta i ke na nomu iqaqalo, raica na ligaqu, daramaka tale ga na ligamu i serequ, mo vakabauta, kua ni vakatitiqa* tiko.”
28 E sauma vua o Tomasi: “Noqu Turaga noqu Kalou!”
29 E kaya vua o Jisu: “O sa qai vakabauta ni o sa raici au? Era marau o ira era sega ni raica ia era vakabauta.”
30 E levu tale na cakamana i Jisu eratou raica na tisaipeli e sega ni volai ena ivolavivigi qo.+
31 Ia era volai qo moni vakabauta kina ni o Jisu na Karisito na Luve ni Kalou, na vakabauta qori oni na vakabulai kina ena vuku ni yacana.+
