Vola o Joni 21:1-25
21 Oti ya e qai vakaraitaki koya tale o Jisu vei ratou na tisaipeli ena Wasa o Taiperia, ia e vakaraitaki koya ena sala qo.
2 Eratou a tiko vata voli o Saimoni Pita kei Tomasi (e dau vakatokai na Drua),+ kei Nacanieli+ mai Kena e Kalili, o rau na luvei Sepeti,+ kei na rua tale na tisaipeli.
3 E kaya vei ratou o Saimoni Pita: “Au se lako mada i qoli.” Eratou kaya vua: “Keitou lako tale ga yani.” Ratou mani lako, ratou vodo i waqa, ia e sega ni dua na ka eratou rawata ena bogi ya.+
4 Ni kida mai na rarama, sa tucake sara tu e matasawa o Jisu, ia eratou sega ni tauri koya rawa na tisaipeli.+
5 E qai tarogi ratou o Jisu: “Ragone, sa rawa eso na kemudou?”* Eratou sauma vua “Sega!”
6 E kaya vei ratou: “Dou balata na lawa ena yasa ni waqa imatau me rawa kina eso.” Ni ratou cakava ya, dua na ka na levu ni ika e coko,+ sega sara ga ni ratou yavia rawa mai.
7 E qai kaya vei Pita na tisaipeli e dau lomana o Jisu:+ “Na Turaga!” Ni rogoca o Saimoni Pita ni oya na Turaga, e vesuka vinaka i tolona na isulu e dara tiko, me vaka ni a sega ni vakaisulu vinaka tu, qai lade i wai.
8 Ia o iratou na vo ni tisaipeli eratou vodo boto yani, ni ratou sega ni yawa mai vanua, e rauta ga ni 300 na fiti* na kena yawa. Eratou dreta tiko yani na lawa e sinai tu kina na ika.
9 Ni ratou yaco yani i vanua, eratou raica sara ni sa waqa tu na qilaiso, ra qai tavu tu kina na ika kei na madrai.
10 E qai kaya vei ratou o Jisu: “Dou kauta mai eso na ika dou se qai rawata.”
11 E mani lako sara i waqa o Saimoni Pita, e yavia mai na lawa sa sinai tu ena ika lelevu, e rauta ni 153 taucoko. E levu dina na ika, e sega ga ni kabote na lawa.
12 Mani kaya vei ratou o Jisu: “Dou mai katalau.” E sega ni dua na tisaipeli e doudou me taroga: “O cei o kemuni?” ni ratou sa kila vinaka ni oya ga na Turaga.
13 E lako mai o Jisu, taura na madrai qai vota vei ratou, vaka tale ga kina na ika.
14 Qo na ikatolu ni gauna+ me rairai kina vei ratou na tisaipeli o Jisu ni vakaturi oti mai na mate.
15 Ni ratou katalau oti, e qai kaya o Jisu vei Saimoni Pita: “Saimoni na luvei Joni, o cei o lomana,* o yau se na ka era tu qo?” E sauma vua: “Turaga, oni kila niu lomani* kemuni vakalevu.” Mani kaya vua o Jisu: “Vakani ira noqu lami.”+
16 E tarogi koya tale ena ikarua ni gauna: “Saimoni na luvei Joni, o lomani* au?” E sauma vua: “Io Turaga, oni kila niu lomani* kemuni vakalevu.” Mani kaya vua o Jisu: “Vakatawani ira na noqu sipi lalai.”+
17 E kaya tale vua ena ikatolu ni gauna: “Saimoni na luvei Joni, o lomani* au?” E rarawa sara ga na loma i Pita ni sa ikatolu ni gauna qo e tarogi koya kina: “O lomani au?” Mani kaya vua: “Turaga, oni kila na ka kece. Oni kila niu lomani* kemuni vakalevu.” E sauma vua o Jisu: “Vakani ira na noqu sipi lalai.+
18 Au tukuna vakadodonu sara vei iko, ni o se gone, o vakaisulu ga vakataki iko o qai lako ena vanua ga o vinakata. Ia ni o sa qase, o na dodoka yani na ligamu vua tale e dua me vakasulumi iko, e kauti iko tale ga ina vanua o sega ni vinakata.”
19 E tukuna qo me vakatakila na mataqali mate ena sotava o Pita, ena vakalagilagi kina na Kalou. Ni tukuna oti ya e qai kaya vei Pita: “Muri au tiko ga.”+
20 Ni vuki o Pita, e qai raica na tisaipeli e dau lomana o Jisu+ ni muri tiko yani, o koya a ravi yani ena sere i Jisu ena gauna ni vakayakavi qai kaya: “Turaga, o cei ena soli kemuni yani?”
21 Ni raici koya, e qai kaya o Pita vei Jisu: “Turaga, vakacava o koya qo?”
22 E kaya vua o Jisu: “Ke lomaqu me bula tiko me yacova noqu lako mai, na cava mo leqataka kina? O iko mo muri au tiko ga.”
23 Mani tete na itukutuku qo vei ira na veitacini ni na sega ni mate na tisaipeli ya. Ia e sega ni tukuna vua o Jisu ni na sega ni mate, a kaya ga: “Ke lomaqu me bula tiko me yacova noqu lako mai, na cava mo leqataka kina?”
24 Qo ga na tisaipeli+ a raica sara ga na ka kece, e vola tale ga, eda kila ni dina na nona itukutuku.
25 E levu tale na ka e cakava o Jisu, ke ra volai kece vakamatailalai au vakabauta ni na sinai o vuravura ena kena ivolavivigi.+
iVakamacala e ra
^ Se “ika.”
^ E vu mai na vosa vaKirisi na a·gaʹpe.
^ E vu mai na vosa vaKirisi na phi·leʹo.
^ E vu mai na vosa vaKirisi na a·gaʹpe.
^ E vu mai na vosa vaKirisi na phi·leʹo.
^ E vu mai na vosa vaKirisi na a·gaʹpe.
^ E vu mai na vosa vaKirisi na phi·leʹo.
