“I NI sɔgɔma! Koow be di?”

Siga t’a, i delila ka mɔgɔw fo o cogo la tuma caaman. N’a sɔrɔ i yɛrɛ y’i bolo don a tigi bolo wala ka meleke a tigi la. Folicogow ni folikumaw tɛ kelen ye yɔrɔ bɛɛ. Nka, foliw kuun ye kelen ye. N’i ma mɔgɔ dɔ fo wala n’i m’a ka foli jaabi , a tigi be se k’a miiri ko ale koo man di i ye wala ko i tɛ mɔgɔ bonya.

Nka, a man nɔgɔ mɔgɔ caaman fɛ ka foli kɛ. Dɔw be sigasiga ka foli kɛ sabu u be maloya wala u b’a miiri ko nafa t’olu la. A ka gwɛlɛ dɔw ma fana ka mɔgɔw fo minw ka siya, u ka kokɛcogo wala u lɔyɔrɔ n’olu ta tɛ kelen ye. Nka, foli ka surunya cogo o cogo, a be se ka nɔɔ ɲuman to mɔgɔ kan.

I yɛrɛ ɲininga ko: “Foli be mun lo ɲɛ mɔgɔ ye? Ala ka Kuma be mun lo fɔ foli koo la?”

Siya wɛrɛ mɔgɔ minw tuubira ka kɛ kerecɛnw ye, u la fɔlɔ ye Kɔrinɛyi lo ye. Tuma min na ciden Piyɛri y’a bisimila kerecɛnw cɛma, a y’a fɔ a ye ko: “Ala tɛ mɔgɔ bɔ mɔgɔ la.” (Kɛw. 10:34). Kɔfɛ, Piyɛri y’a sɛbɛ ko Ala “b’a fɛ bɛɛ ka se ka nimisa ka faran a ka kojuguw la.” (2 Piyɛri 3:9). Minw be bibulukalan kɛra, an be se k’a miiri k’o vɛrisew ɲɛsinna olu dɔrɔn lo ma. Nka, Piyɛri ye kerecɛnw jija fana ko: “Aw ka mɔgɔ bɛɛ boɲa, k’aw balimaw kanu.” (1 Piyɛri 2:17). O la, an b’a faamu ko mɔgɔw ka kokɛcogow, u bɔyɔrɔ wala u ka siya mana kɛ min o min ye, an ka ɲi k’u fo. An b’a yira o lo fɛ ko an b’u kanu ani ko an b’u bonya.

Ciden Pol ye kerecɛnw jija ko: “Aw ka ɲɔgɔn minɛ kosɔbɛ i n’a fɔ Krista y’aw minɛ cogo min na.” (Ɔrɔm. 15:7). Balima minw kɛra “jigi tugulaw ye” ciden Pol fɛ, a ye olu tɔgɔɲuman fɔ. Sutana be fariyara Ala sagokɛlaw ma. O kama, an mako be jijali kumaw na kosɔbɛ.—Kɔlɔs. 4:11; Yir. 12:12, 17.

Bibulu kɔnɔ, mɔgɔ dɔw ka koo b’a yira ko foli nafa ka bon kosɔbɛ. A tɛ dan ka mɔgɔ bisimila dɔrɔn.

Tuma min na wagati sera Jehova fɛ k’a Dencɛ niin ta sankolo la k’a don Mariyamu wolonugu kɔnɔ, a ye mɛlɛkɛ dɔ ci k’o fɔ Mariyamu ye. Mɛlɛkɛ y’a ka kuma daminɛ ko: “I ni hɛrɛ, e min ye nɛɛma sɔrɔ. Matigi b’i fɛ.” Mariyamu “hakili ɲaamina” sabu a m’a lɔn kuun min kama mɛlɛkɛ be kumana ale fɛ. Mɛlɛkɛ y’o kɔrɔsi minkɛ, a y’a fɔ ko: ‘I kana siran, Mariyamu, katuguni i ye nɛɛma sɔrɔ Ala fɛ.’ A y’a ɲɛfɔ Mariyamu ye ko Ala b’a fɛ a ka Masiya wolo. Mariyamu hakili sigira ani a y’a fɔ mɛlɛkɛ ye ni majigilenya ye ko: “Matigi ka jɔnmuso filɛ ne ye. Ala m’a kɛra ne ye i ko i y’a fɔ cogo min na.”—Luka 1:26-38, ABM.

Nɛɛma tun lo o mɛlɛkɛ fɛ ka kɛ Jehova ka ciden ye. O bɛɛ n’a ta, a m’a miiri ko n’ale kumana ni adamaden dafabaliw ye, a b’a yɛrɛ dɔgɔyara le. A y’a ka kuma daminɛ ni foli ye. An be kalan juman lo sɔrɔ o koo la? An ka ɲi ka sɔn ka mɔgɔw fo ani k’u jija. Kuma damanin dɔrɔn fɛ, an be se ka mɔgɔ wɛrɛw dɛmɛ ani k’u hakili sigi. O b’u dɛmɛ k’a faamu k’u ye Jehova ka denbayamɔgɔw ye tiɲɛn na.

Pol tun be balima caaman lɔn Azi mara tileben fan fɛ ani Erɔpu jamanaw na. A ka batakiw kɔnɔ, a ye foli tigitigi dɔw lase kerecɛn caaman ma. Ɔrɔmukaw sapitiri 16 b’o lo yira. A kumana Febe koo la ani a y’a weele ko “an balimamuso.” A ye balimaw jija k’u k’a “minɛ ka ɲa i n’a fɔ Ala ka  mɔgɔw be mɔgɔ minɛ cogo min na, n’a mako be aw ka dɛmɛli la koo minw na, aw k’a dɛmɛ o la.” Pol ye Pirisili ni Akilasi fana fo. A ko ale “dama te barika la u ye dɛ, Krista ka jama bɛɛ min be siya wɛrɛw cɛma, olu fana be barika la u ye.” Pol yɛrɛ ye mɔgɔ dɔw fo, an tɛ minw lɔn ka ɲɛ bi. Ɲɛyirali fɛ, a k’u ka “Epenɛti fo” ani ko a “koo ka di” ale ye. A ye “Tirifɛni ni Tirifɔsi” fana fo. A ko “o muso fila nunu ye baara kɛ Matigi ye kosɔbɛ.” Tiɲɛn na, Pol tun tɛ sigasiga ka balimacɛw ni balimamusow fo.—Ɔrɔm. 16:1-16.

Miiri k’a filɛ o mɔgɔw ninsɔn diyara cogo min na k’a lɔn k’u koo ka di Pol ye ani ko a ma ɲinɛ u kɔ. O y’a to a koo diyara u ye kosɔbɛ ani kanuya sabatira olu ni ɲɔgɔn cɛ! Kerecɛn minw ye Pol ka foliw mɛn, o foliw ye olu jija ani k’u ka limaniya sabati fana. Tiɲɛn na, n’an be mɔgɔw tando ani k’u fo k’a yira ko an b’an mako don u la sɔbɛ la, o be teriya ni bɛɛn sabati Ala sagokɛlaw cɛ.

Tuma min na Pol sera kurun kɔnɔ Puzɔli ani a tun be tagara Ɔrɔmu, kerecɛnw bɔra saheli fan fɛ Ɔrɔmu, ka na a kunbɛn. Kabi Pol y’u ye yɔrɔjan, a ye “barika la Ala ye, dɔ farala a ka jagwɛlɛya kan.” (Kɛw. 28:13-15). Tuma dɔw la, n’a sɔrɔ an be se ka yɛlɛmisɛn kɛ wala k’an bolo kɔrɔta dɔrɔn walisa ka mɔgɔ fo. Nka, o dama be se ka mɔgɔ jija hali minw hakili ɲagaminin lo wala u dusu tiɲɛnin lo.

Yezu ka kalanden Zaki tun ka ɲi ka kerecɛn dɔw ladi bɛrɛbɛrɛ. U tun be jatɔya kɛra Alako ta fan fɛ sabu u tun ye duniɲa koo diya u yɛrɛ ye (Zaki 4:4). Nka, an k’a kɔrɔsi Zaki y’a ka bataki daminɛ cogo min na:

“Ne Zaki min ye Ala ni Matigi Yezu Krista ka baarakɛla ye, n be bataki nin ci aw Israyɛlidenw ma minw jɛnsɛnnin be diɲɛ faan bɛɛ la, k’aw fo.” (Zaki 1:1). Siga t’a la, a tun ka nɔgɔ o kerecɛnw fɛ ka sɔn Zaki ka ladiliw ma. Sabu u y’a faamu a ka foli fɛ ko ale n’olu bɛɛ ye kelen ye Ala ɲɛɛ kɔrɔ. N’an be foli kɛ ni majigilenya ye, o b’a to an be se ka koo gwɛlɛw ɲɛnabɔ.

An k’an kɔnɔ gwɛ ka foli kɛ ni kanuya ye. O nafa ka bon hali n’o foli ka surun ani mɔgɔ ma bɔ a kala ma (Mat. 22:39). Balimamuso dɔ be Irlandi. Loon dɔ, a nana Masaya Boon na lajɛn daminɛ wagati la. A tun kɔrɔtɔnin lo ka sigi ani balimacɛ dɔ yɛlɛmana ka yɛlɛmisɛn kɛ n’a ye ani k’a fɔ ko: “I dansɛ. I nako diyara n’ ye.” Balimamuso sigira a ma foyi fɔ.

Lɔgɔkun damanin o kɔ, a y’a fɔ balimacɛ ye ko kabi wagati damanin, gwɛlɛya dɔw b’ale kan a ka soo. A ko: “N’ hakili tun ɲagaminin lo o loon wulafɛ, fɔɔ a tora dɔɔni, n’ tun tɛna na Masaya Boon na. N’i ka foli tɛ, min fɔra lajɛn na, n’ hakili t’o fanba la. O foli y’a to n’ y’a faamu ko n’ nako diyara mɔgɔw ye. I ni ce.”

Balimacɛ yɛrɛ tun t’a kala ma ko a ka foli ye balimamuso nafa kosɔbɛ. A ko: “Tuma min na a y’a fɔ n’ ye k’o kuma damaninw y’ale nafa, o diyara n’ ye kosɔbɛ sabu n’ sera k’o fɔ. Ne fana ninsɔndiyara kosɔbɛ.”

Solomani y’a sɛbɛ ko: “I k’i ka dumuni fili jii sanfɛ, a mɛn o mɛn, i ben’a sɔrɔ tugu.” (Waaj. 11:1). N’an b’a faamu ko nafa b’a la ka mɔgɔw fo, janko an balimaw yɛrɛ, o bena anw ni olu nafa. O la, an kana ɲinɛ abada ko foli barika ka bon kosɔbɛ!