Nou swiv sa ki Labib i dir ler nou obzerv Repa Senyer, ki osi ganny apele dernyen Repa ek Memoryal lanmor Zezi. (1 Korentyen 11:20) Par kont, bokou krwayans ek pratik lezot larelizyon ki annan pour fer avek sa levennman pa baze lo Labib.

Ki bi Repa Senyer?

 Nou fer Repa Senyer pour montre ki nou pe mazin Zezi e pour montre nou lapresyasyon pour sa sakrifis ki i’n fer pour nou. (Matye 20:28; 1 Korentyen 11:24) Sa selebrasyon pa en sakreman, ni en pratik relizye ki fer en dimoun ganny lagras Bondye oubyen pardon pour bann pese. a Labib i dir ki nou bann pese i kapab ganny pardonnen, pa par en rityel relizye, me selman si nou annan lafwa dan Zezi.​—Romen 3:25; 1 Zan 2:1, 2.

Konbyen fwa nou bezwen fer li?

 Zezi ti donn lord son bann disip pour selebre Repa Senyer, me i pa ti dir zot egzakteman konbyen fwa zot bezwen fer li. (Lik 22:19) Serten i krwar ki i devret ganny selebre tou le mwan, tandis ki lezot i selebre li tou le semenn, tou le zour, plizyer fwa par zour oubyen nenport kantite fwa ki en dimoun i krwar i apropriye. b Me annou vwar serten fakter ki nou devret pran an konsiderasyon.

 Zezi ti entrodwir Repa Senyer sa zour ki bann Zwif ti selebre Lapak (Passover) e i ti mor pli tar sa menm zour. (Matye 26:1, 2) Sa pa ti par azar. Labib i konpar sakrifis Zezi avek pti mouton Lapak. (1 Korentyen 5:7, 8) Lapak ti ganny selebre enn fwa par an. (Egzod 12:1-6; Levitik 23:5) Pareyman, bann premye Kretyen c ti selebre Memoryal lanmor Zezi enn fwa par an e Temwen Zeova i swiv sa legzanp ki baze lo Labib.

Dat ek ler

 Sa model ki Zezi in kite i ed nou konnen pa zis konbyen fwa pour fer Memoryal, me osi ki dat ek ki ler. I ti konmans sa selebrasyon apre soley kouse le 14 Nizan lannen 33, dapre kalandriye Labib ki baze lo lalin. (Matye 26:18-20, 26) Nou kontinyen fer Memoryal lo sa dat tou le lannen, parey bann premye Kretyen ti fer. d

 Menm si le 14 Nizan lannen 33 ti en Vandredi, sa dat i kapab tonm lo en lot zour lasemenn sak lannen. Pour konnen ki dat le 14 Nizan i tonbe sak lannen, nou servi menm metod ki ti ganny servi dan letan Zezi, olye servi sa metod ki ganny servi pour kalandriye Zwif modern. e

Dipen ek diven

 Pour sa nouvo selebrasyon, Zezi ti servi dipen san lelven ek diven rouz ki ti’n reste apre repa Lapak. (Matye 26:26-28) Pour swiv son legzanp, nou servi dipen ki napa lelven ouswa okenn lezot zengredyen e diven rouz pir, pa zi rezen ouswa diven ki’n azout disik, lalkol ouswa zepis.

 Serten larelizyon i servi dipen ki annan lelven oubyen lezot keksoz ki fer fermante lafarin, me souvan dan Labib lelven i ganny servi konman en senbol pour pese ek koripsyon. (Lik 12:1; 1 Korentyen 5:6-8; Galat 5:7-9) Alor, zis dipen ki napa lelven oubyen lezot keksoz azoute ki kapab ganny servi konman en senbol apropriye pour lekor Kris ki ti napa pese. (1 Pyer 2:22) En lot pratik ki pa annakor avek sa ki Labib i dir, i ler zot servi zi rezen ki pa’n fermante dan plas servi diven. Serten legliz i fer sa parski zot defann bwar lalkol, en keksoz ki pa baze lo Labib.​—1 Timote 5:3.

Bann lanblenm, pa son vre laser ek disan

 Sa dipen san lelven ek sa diven ki ganny servi pandan Memoryal i bann lanblenm oubyen senbol, ki reprezant lekor ek disan Kris. Zot pa ganny sanze ni ganny melanze par mirak pour vin son vre lekor ek disan, parey serten i krwar. Annou vwar bann verse Labib ki montre akoz nou krwar sa.

•   Si Zezi ti’n donn lord son bann disip pour bwar son disan, i ti pou pe dir zot kas lalwa Bondye ki defann manz disan. (Zenez 9:4; Akt 15:28, 29) Me sa i enposib, parski Zezi pa ti pou zanmen dir lezot kas lalwa Bondye konsernan disan ki sakre.​—Zan 8:28, 29.

•   Si bann zapot ti pe vreman bwar disan Zezi, i pa ti pou’n dir ki son disan “pou ganny verse,” ki montre ki son sakrifis pa ti ankor ganny fer.​—Matye 26:28.

•   Sakrifis Zezi ti ganny ofer “enn fwa pour tou.” (Ebre 9:25, 26) Si sa dipen ek sa diven ti sanze pour vin son laser ek son disan pandan Repa Senyer, alor bann ki pran sa bann lanblenm ti pou pe repet sa sakrifis sak fwa zot fer Repa Senyer.

•   Zezi ti dir: “Kontinyen fer sa pour montre ki zot pe mazin mwan” e pa “konman en sakrifis pour mwan.”​—1 Korentyen 11:24.

 Bann ki krwar dan transubstantiation, setadir ki sa dipen ek diven i vin lekor ek disan Zezi, i baz sa lansennyman lo sa ki serten verse Labib i dir. Par egzanp, plizyer tradiksyon Labib i montre ki Zezi ti dir sa konsernan sa diven: “Sa i mon disan.” (Matye 26:28) Par kont, parol Zezi i kapab osi ganny tradwir koumsa: “Sa i vedir mon disan,” “Sa i reprezant mon disan” oubyen “Sa i sinifye mon disan.” f Parey i ti abitye fer, Zezi ti pe servi en konparezon pour ansennyen.​—Matye 13:34, 35.

Lekel ki pran sa bann lanblenm?

 Ler Temwen Zeova i selebre Repa Senyer, zis en ptigin dimoun ki manz sa dipen e bwar sa diven. Akoz sa?

 Disan Zezi ti etabli “en nouvo lalyans” ki ti ranplas sa lalyans ki Zeova ti fer avek ansyen nasyon Izrael. (Ebre 8:10-13) Bann ki form parti sa nouvo lalyans i pran sa bann lanblenm. Sa pa enkli tou Kretyen me zis “bann ki’n ganny apele” dan en fason spesyal par Bondye. (Ebre 9:15; Lik 22:20) Sa bann Kretyen pou dirize dan lesyel avek Kris e Labib i dir ki zis 144,000 ki ganny sa privilez.​—Lik 22:28-30; Revelasyon 5:9, 10; 14:1, 3.

 Konpare avek sa “pti troupo” setadir bann ki pou dirize ansanm avek Kris, laplipar nou i form parti “en gran lafoul” ki annan lespwar pour viv pour touzour lo later. (Lik 12:32; Revelasyon 7:9, 10) Menm si bann ki annan lespwar pour viv lo later pa pran lanblenm, nou zwenn ansanm avek sa “pti troupo” pour demontre nou lapresyasyon pour sa sakrifis ki Zezi in fer pour nou.​—1 Zan 2:2.