Let pour bann Romen 3:1-31
3 Alor, ki lavantaz en Zwif i annan lo lezot oubyen ki byenfe sirkonsizyon i anmennen?
2 I annan en kantite lavantaz. Avan tou, zot ti ganny konfye bann parol sakre Bondye.+
3 Me alor, menm si serten Zwif ti napa lafwa, eski sa i vedir ki Bondye pa ti pou fidel avek son parol?
4 Definitivman non! Menm si tou dimoun i koz manti,+ dimoun i bezwen rekonnet ki Bondye i toultan dir laverite,+ parey i’n ganny ekrir: “Pour ki dimoun i rekonnet ki ou dir laverite* e ki ou annan rezon ler ou pe ganny zize.”+
5 Si ler nou fer sa ki mal i fer li pli evidan ki Bondye i fer sa ki byen, eski sa i vedir ki Bondye i enzis ler i ankoler avek nou? (Mon pe koz parey en imen.)
6 I pa ditou leka! Si Bondye i enzis, ki mannyer i pou ziz lemonn?+
7 Si mon koz manti e sa mansonz i fer li pli evidan ki Bondye i koz laverite e sa i fer dimoun glorifye li, alor akoz mon pe ganny zize konman en dimoun ki fer pese?
8 Akoz nou pa dir, parey serten in akiz nou, ki swadizan nou dir, “Annou fer bann move keksoz pour ki bann bon keksoz i arive”? Zizman kont sa bann dimoun i zis.+
9 Me alor? Eski nou bann Zwif nou dan en pli bon sityasyon? Pa ditou! Parski nou’n fer li kler pli boner ki Zwif konman Grek, zot tou zot anba pouvwar pese,+
10 parey i’n ganny ekrir: “Napa personn ki fer sa ki byen, ni menm enn,+
11 napa personn ki annan bon zizman, napa personn ki rod Bondye.
12 Tou dimoun in vir ledo avek sa ki byen e zot tou zot napa valer, napa personn ki demontre labonte, pa ni menm enn.”+
13 “Zot lagorz i parey en latonm ouver, zot in servi zot lalang pour anbet lezot.”+ “Pwazon serpan* i lo zot lalev.”+
14 “Zot labous i ranpli avek malediksyon ek parol anmer.”+
15 “Zot lipye i depese pour touy dimoun.”*+
16 “Zot fer dimoun soufer e fer zot malere
17 e zot pa konnen ki savedir fer lape.”+
18 “Zot napa respe* pour Bondye.”+
19 Aprezan nou konnen ki tou sa ki Lalwa i dir, i aplikab pour bann ki anba Lalwa. Personn parmi bann ki anba Lalwa pa pou kapab dir ki i inosan e alor lemonn antye osi i merit ganny pini par Bondye.+
20 Savedir, personn pa pou ganny aprouve konman en dimoun ki fer sa ki byen akoz i swiv lalwa,+ parski lalwa i fer nou konn egzakteman kisisa pese.+
21 Me aprezan, parey Lalwa ek lansennyman bann Profet i montre,+ dimoun i kapab fer sa ki byen devan Bondye menm si i pa swiv Lalwa.+
22 Wi, fer sa ki byen devan Bondye atraver lafwa dan Zezi Kri, pour tou bann ki annan lafwa, parski Bondye pa fer lapreferans.+
23 Parski tou dimoun in fer pese e zot pa arive reflekte laglwar Bondye.+
24 Zot ganny aprouve konman dimoun ki fer sa ki byen parski zot in ganny libere gras a sa ranson* ki Kris Zezi in peye.+ Sa i en kado* ki Bondye i donnen+ akoz son labonte ekstraordiner.+
25 Bondye ti ofer li konman en lofrann rekonsilyasyon*+ pour dimoun ki annan lafwa dan son disan.+ Sa ti pou demontre son prop ladrwatir, parski gras a son pasyans,* Bondye in pardonn bann pese ki’n ganny fer dan lepase.
26 Dan sa fason, Bondye i demontre son prop ladrwatir+ dan sa letan, menm ler i konsider ki en dimoun i fer sa ki byen parski i annan lafwa dan Zezi,+ sa osi i an armoni avek ladrwatir Bondye.
27 Alor, eski en dimoun i annan rezon pour fer vantar? Non! Ki lalwa ki anpes li fer sa? Lalwa lo aksyon?+ Non, lalwa lo lafwa.
28 Me pour nou, Bondye i konsider ki en dimoun i fer sa ki byen akoz son lafwa me pa akoz i swiv lalwa.+
29 Oubyen eski i zis Bondye bann Zwif?+ Pa i Bondye dimoun lezot nasyon osi?+ Wi, i osi Bondye dimoun lezot nasyon.+
30 Vi ki Bondye i en sel,+ i konsider dimoun ki’n ganny sirkonsi konman bann dimoun ki fer sa ki byen+ akoz zot lafwa e i konsider bann ki pa’n ganny sirkonsi konman bann dimoun ki fer sa ki byen+ gras a zot lafwa.
31 Alor, eski nou lafwa i aboli lalwa? Pa ditou! O kontrer, nou siport lalwa.+
