Let pour bann Ebre 9:1-28
9 Sa vye lalyans ti annan bann lalwa pour ladorasyon* e son landrwa sen+ lo later.
2 Dan premye konpartiman latant ki ganny apele Landrwa Sen*+ ki ti ganny konstri, i ti annan sandelye,*+ latab ek dipen sakre.*+
3 Me deryer dezyenm rido,+ i ti annan en konpartiman dan latant ki ti apel Tre Sen.+
4 Dan Tre Sen, i ti annan en lansanswar* annor+ ek lars lalyans+ ki ti konpletman kouver avek lor.+ Dan sa lars, i ti annan lamann+ dan en resipyan annor, baton Aaron ki ti’n fleri+ ek bann plak ros+ lalyans.
5 Anler lo lars, i ti annan de seriben* glorye ki ti pe kouver kouvertir* sa lars+ avek zot lezel. Me la i pa letan pour koz lo sa bann keksoz an detay.
6 Depi ki sa bann keksoz ti’n ganny konstri dan sa fason, bann pret ti antre dan premye konpartiman latant pour ofer servis sakre regilyerman.+
7 Me granpret ti antre tousel dan dezyenm konpartiman enn fwa par an,+ toultan avek disan+ ki i ti ofer pour son prop lekor+ e pour pese ki lepep+ ti’n komet dan linyorans.
8 Alor, lespri sen i fer kler ki personn pa ti ankor konnen ki mannyer pour antre dan landrwa sen* ler premye latant ti ankor egziste.+
9 Sa latant i en model* bann keksoz ki pe arive dan nou letan.+ Dapre sa laranzman, lofrann ek sakrifis i ganny ofer,+ me sa bann keksoz pa kapab vreman fer en dimoun ki pe ador* Bondye annan en konsyans kler.+
10 Sa bann keksoz i annan pour fer zis avek manze, labwason ek diferan seremoni pirifikasyon.*+ Sa bann lalwa ti annan pour fer avek lekor+ e zot ti ganny enpoze ziska letan fikse pour met tou keksoz drwat.
11 Me ler Kris ti vini konman en granpret pour anmenn bann benediksyon ki nou pe deza eksperyanse, i ti antre dan sa latant ki pli gran e pli parfe ki pa’n ganny fer par zonm, setadir ki pa lo sa later.*
12 I pa ti antre dan landrwa sen* avek disan kabri ek zenn toro, me enn fwa pour tou i ti antre dan landrwa sen* avek son prop disan+ e i’n delivre nou pour touzour.+
13 Disan kabri ek toro+ e lasann en zenn bef* ki ti ganny fannen lo sa bann ki ti enpir ti kapab fer zot vin pir devan Bondye.+
14 Gras a lespri sen ki eternel, Kris ti ofer son lekor san defo devan Bondye. Dan sa ka, pa disan Kris+ pou pli byen pirifye nou konsyans avek bann keksoz initil*+ pour ki nou kapab servi* sa Bondye vivan?+
15 I pour sa rezon ki Kris i medyater en nouvo lalyans+ pour ki bann ki’n ganny apele i ganny sa promes en leritaz eternel.+ Tousala in posib akoz son lanmor, pour ki bann ki ti komet bann lofans anba sa premye lalyans i ganny libere gras a en ranson.*+
16 Ler en lalyans i ganny fer avek Bondye, sa dimoun ki fer sa lalyans i bezwen mor,
17 parski en lalyans i pa valid tan ki sa dimoun ki’n fer sa lalyans i ankor vivan.
18 Alor, sa premye lalyans osi pa ti pran lefe san ki disan ti ganny verse.
19 Parski ler Moiz ti donn tou bann komannman Lalwa avek lepep, i ti pran lizop* ek lalenn gro rouz pour fann disan bann zenn toro ek kabri ek delo lo sa liv* e lo lepep antye.
20 I ti dir: “Sa i disan lalyans ki Bondye in donn zot lord pour swiv.”+
21 Pareyman i ti fann disan lo latant ek tou bann resipyan ki ganny servi dan ladorasyon.*+
22 Wi, dapre Lalwa preski tou keksoz i kapab ganny pirifye avek disan+ e napa pardon pour pese si disan pa ganny verse.+
23 Alor, si i ti neseser ki sa model+ bann keksoz ki dan lesyel i ganny pirifye dan sa fason,+ alor bann keksoz ki dan lesyel i bezwen ganny pirifye par bann sakrifis ki pli meyer.
24 Parski Kris pa ti antre dan en landrwa sen* ki en kopi larealite+ e ki’n ganny fer par zonm,+ me dan lesyel menm+ pour prezant li devan* Bondye pour nou.+
25 I pa ti pe al ofer son lekor plizyer fwa, parey granpret ti antre dan landrwa sen* avek disan ki pa ti son prop disan, lannen apre lannen.+
26 Si non, i ti pou’n bezwen soufer plizyer fwa depi o konmansman lemonn.* Me aprezan i’n vin enn fwa pour tou dan sa letan lafen* pour elimin pese atraver sakrifis son prop lekor.+
27 Zis parey tou dimoun i bezwen mor en fwa pour tou, me apre i pou annan en zizman,
28 pareyman Kris in ganny ofer enn fwa pour tou pour anmenn pese en kantite dimoun.+ Dezyenm fwa ki i pou vini, i pa pou vin pour retir pese me bann ki pe esper li avek enpasyans pour ganny sove pou vwar li.+
Bann not
^ Oubyen “ofer en servis sakre.”
^ Oubyen “apele Sen.”
^ Oubyen “lalanp.”
^ Oubyen “dipen prezantasyon.”
^ Sa i en resipyan kot lansan i ganny brile.
^ Vwar Leksplikasyon bann mo.
^ Oubyen “kouvertir rekonsilyasyon,” “landrwa rekonsilyasyon.” Vwar Leksplikasyon bann mo.
^ Oubyen “dan lasanm Tre Sen.”
^ Oubyen “ofer en servis sakre.”
^ Oubyen “legzanp.”
^ Oubyen “diferan batenm.”
^ Oubyen “ki pa dan sa kreasyon.”
^ Oubyen “dan lasanm Tre Sen.”
^ Oubyen “dan lasanm Tre Sen.”
^ Oubyen “en zenn vas.” En femel ki pa ankor ganny piti.
^ Literalman, “mor.”
^ Oubyen “ofer en servis sakre.”
^ Oubyen “en pri ki’n ganny peye.”
^ Lizop i en plant. Vwar Leksplikasyon bann mo.
^ Oubyen “roulo.”
^ Oubyen “servis piblik,” “servis sen.”
^ Oubyen “dan lasanm Tre Sen.”
^ Literalman, “devan figir.”
^ Oubyen “dan lasanm Tre Sen.”
^ Aparaman, sa pe refer avek nesans bann zanfan Adan ek Ev.
^ Oubyen “lepok,” “sistenm.” Vwar Leksplikasyon bann mo.
