En Revelasyon pour Zan 5:1-14
5 Mon ti vwar dan lanmen drwat sa Enn ki ti lo tronn+ en roulo ki ti annan lekritir lo tou le de kote e ki ti’n ganny byen fermen avek set sele.*
2 Apre mon ti vwar en lanz for ki ti pe dir byen for: “Lekel ki diny pour kas son bann sele e ouver sa roulo?”
3 Me i ti napa personn, ni dan lesyel, ni lo later oubyen anba later ki ti kapab ouver sa roulo oubyen get ladan.
4 Mon ti plere asodlarm parski i ti napa personn ki ti diny pour ouver sa roulo oubyen pour get ladan.
5 Me enn bann ansyen ti dir mwan: “Aret plere. La sa Lyon ki sorti dan tribi Zida,+ sa enn ki sorti dan fanmir+ David*+ ki’n ranport laviktwar+ e i pou kapab ouver sa roulo ek son set sele.”*
6 Kot tronn ti ete, mon ti vwar dan milye sa kat seriben* ek bann ansyen+ en pti mouton+ ki konmsi ti’n ganny touye,+ i ti annan set korn ek set lizye. Sa bann lizye i reprezant sa set lafors* Bondye+ ki’n ganny anvoye partou lo later.
7 Deswit i ti vin pran sa roulo ki ti dan lanmen drwat sa Enn ki ti lo tronn.+
8 Ler i ti pran sa roulo, sa kat seriben ek sa 24 ansyen+ ti tonm azenou devan sa Pti Mouton. Zot tou zot ti annan en larp e zot ti annan bann bol annor ki ti plen avek lansan. (Lansan i reprezant lapriyer bann sen.)+
9 Zot sant en nouvo kantik+ ki dir: “Ou diny pour pran sa roulo e ouver son bann sele,* parski ou’n ganny touye e par ou disan ou’n aste bann dimoun pour Bondye+ sorti dan tou tribi, langaz,* pep ek nasyon,+
10 ou’n fer zot vin lerwa*+ ek pret pour nou Bondye+ e zot pou diriz lo later antye konman lerwa.”+
11 Mon ti vwar en kantite lanz otour sa tronn, otour bann seriben ek bann ansyen e mon ti osi tann zot lavwa. I ti annan plizyer dizenn milye e plizyer milye lanz,*+
12 zot ti pe dir byen for: “Sa Pti Mouton ki ti ganny touye+ i diny pour ganny pwisans, larises, lasazes, lafors, loner, laglwar ek benediksyon.”+
13 Mon ti tann tou bann ki dan lesyel, lo later, anba later,+ lo lanmer e tou sa ki dan sa bann landrwa pe dir: “Ki benediksyon, loner,+ laglwar ek pwisans i vin pour sa Enn ki lo tronn+ e pour sa Pti Mouton,+ pour touzour e touzour.”+
14 Sa kat seriben ti pe dir: “Amenn!” e bann ansyen ti tonm azenou e ador Bondye.
Bann not
^ En sele i sa lasir ki ganny servi pour ferm oubyen kaste en roulo. Vwar Leksplikasyon bann mo.
^ Literalman, “rasin David.”
^ Vwar Leksplikasyon bann mo.
^ Literalman, “lespri.”
^ Oubyen “kreatir vivan.”
^ Oubyen “lalang.”
^ Vwar Leksplikasyon bann mo.
^ Literalman, “en rwayonm.”
^ Oubyen “plizyer dizenn milye fwa plizyer dizenn milye.” Literalman, “miryad.”
