Kwa sa Rwayonm Bondye?

“Sa Bonn Nouvel Rwayonm . . . ”​—MATYE 24:14.

DAN son Sermon lo Montanny, Zezi ti donn en model lapriyer ki enkli sa demann avek Bondye: “Ki ou Renny i ganny etabli.” En kantite dimoun in aprann sa lapriyer par ker e repet li souvan. En ansiklopedi i dir ki sa i “lapriyer pli enportan dan ladorasyon tou Kretyen.” Pourtan, bokou ki resit sa lapriyer pa konnen kwa sa sa Renny oubyen Rwayonm e ki i pou fer kan i vini.​—Matye 6:9, 10.

Sa pa etonan. Leksplikasyon bann dirizan larelizyon Kretyen konsernan sa Rwayonm i kontradiktwar, konfizan e konplike. En dimoun ti ekrir ki Rwayonm Bondye i “en pouvwar ki depas lafors imen, . . .  en lyen spirityel ki en dimoun i annan avek sa Bondye vivan . . . , en leksperyans avek Bondye atraver ki bann zonm ek fanm i ganny sove.” En lot dimoun i dekrir levanzil lo Rwayonm konman bann “lenstriksyon konsernan legliz.” De lot kote, liv Catechism of the Catholic Church i dir: “Rwayonm Bondye [i] ladrwatir, lape ek lazwa dan Lespri Sen.”

Ou pou ganny en leksplikasyon ki bokou pli kler lo paz 2 sa magazin. I dir: “Rwayonm Bondye [i] en gouvernman dan lesyel ki egziste e ki byento pou met en lafen avek tou mesanste e transform later dan en paradi.” Annou vwar konman Labib i siport sa leksplikasyon.

Bann fitir dirizan pour later

En rwayonm i en gouvernman ki ganny dirize par en lerwa. Lerwa dan Rwayonm Bondye i Zezi Kri ki’n ganny resisite. Son kouronnman dan lesyel ti ganny dekrir dan en vizyon ki profet Danyel ti gannyen. I ti ekrir: “Mon ti kontinyen gete dan bann vizyon lannwit, e, la avek nyaz en dimoun parey garson zonm [Zezi] ti pe vini; e i ti ganny akse avek Ansyen bann Zour [Bondye], e zot ti anmenn li pre devan sa Enn. I ti ganny dominasyon, dinyite ek rwayonm, pour ki bann pep, kominote nasyonal ek bann langaz, zot tou zot devret servi li. Son dominasyon i en dominasyon ki pou dire, ki pa pou fini, e son rwayonm i enn ki pa pou ganny detrir.”​—Danyel 7:13, 14.

Sa liv Danyel dan Labib i osi montre ki sa Rwayonm pou ganny etablir solidman par Bondye, ki i pou retir tou gouvernman imen e ki i pa pou zanmen ganny ranplase. Sapit 2 i dekrir en rev ki Bondye ti fer lerwa Babilonn gannyen. Dan sa rev i ti vwar en gran stati ki pe reprezant bann pouvwar  mondyal ki ti pou vini enn deryer lot. Profet Danyel ti enterpret sa rev. I ti ekrir ki pandan “bann dernyen zour . . . Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm e li menm i pou dire pour en letan endefini.”​—Danyel 2:28, 44.

Lerwa Rwayonm Bondye pa pou diriz li tousel. Pandan son minister lo later, Zezi ti rasir son bann zapot fidel ki zot, ansanm avek lezot, pou ganny resisite dan lesyel e zot pou asiz lo bann tronn. (Lik 22:28-30) Zezi pa ti pe dir literalman ki zot pou asiz lo bann tronn akoz parey i ti endike, sa Rwayonm pou dan lesyel. Labib i dekrir sa bann ki pou diriz avek li konman bann ki sorti “dan tou ras, tou langaz, tou pep ek tou nasyon e zot pou rennyen lo later.” Zot pou vin “en rwayonm pret pour servi non Bondye, e zot pou rennyen lo later.”​—Revelasyon 5:9, 10.

Akoz sa nouvel lo Rwayonm i en bon nouvel?

Remarke ki Kris Zezi i ganny dominasyon lo tou “pep, kominote nasyonal ek bann langaz” e bann ki asosye avek li pou “rennyen lo later.” Lekel alor ki pou vin sitwayen sa Rwayonm? I bann ki reazir dan en fason pozitif anver sa bon nouvel ki pe ganny anonse ozordi. Parmi sa bann dimoun, i pou osi annan bann ki pou ganny resisite pour viv lo later e ki pou annan lespwar pour viv pour touzour.

Dan en fason kler, Labib i dekrir sa bann benediksyon ki dimoun pou gannyen anba sa Rwayonm. La detrwa:

“I pe fer arete lager ziska dan bann landrwa pli lwen lo later. I kas lark e i kas kas lans an morso. I bril bann saret dan dife.”​—Psonm 46:9.

“Zot pou konstrir lakaz e zot pou reste ladan; wi, zot pou plant pye rezen e zot pou manz son fri. Zot pa pou konstrir pour en lot reste, e zot pa pou plante pour en lot manze.”​—Izai 65:21, 22.

“[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”​—Revelasyon 21:3, 4.

“Sa letan lizye bann aveg pou ouver, e zorey bann sourd pou debouse. Sa letan sa enn ki bwate pou grenpe parey en serf e lalang sa enn ki kozpa pou kriye avek lazwa.”​—Izai 35:5, 6.

“Sa ler pe arive kan tou bann mor ki dan tonbo pou tann son lavwa [Zezi], e zot pou sorti dan zot tonbo. Bann ki’n fer sa ki byen, pou resisite pour resevwar lavi.”​—Zan 5:28, 29.

“Bann dimoun ki annan limilite pou posed later, e zot pou sirman trouv bokou plezir dan labondans lape.”​—Psonm 37:11.

Sa i definitivman en bon nouvel! Deplis, bann profesi Labib ki’n fini ganny akonplir i montre ki letan i pros kot sa Rwayonm pou diriz lo later antye avek ladrwatir.