Dimoun dan lemonn pe ini ansanm—Ki mannyer?

KI MANNYER ou pou dekrir sa mo “linite”? Pour serten sa mo i senpleman vedir kan napa dezakor ek konfli. Par egzanp, si de ouswa plizyer pei i siny en lakor e zot dakor ansanm ki sa de pei i bezwen fer pour gard lape, serten i kapab dir ki zot ini. Me eski sa i leka? Pa neseserman.

Pran par egzanp bann fe: Tou dilon listwar bokou lakor lape in ganny sinyen e osi ganny kase. Akoz? Laplipar letan se akoz bann dirizan i pli konsernen avek zot siperyorite ek dominasyon plito ki lape ek linite. En lot rezon se akoz serten pei i per sa ki ti pou arive si lezot pei ti vin pli for ki zot dan domenn militer.

Alors, menm si de pei pa pe lager avek kanmarad, sa pa vedir ki zot ini dan lape. Eski vreman de zonm ki pe viz fizi lo kanmarad zot anpe zis akoz personn pa ankor tir premye bal? I pa fer sans! Me pourtan se sanmenm sa kalite sitiasyon ki bokou nasyon zot vwar zot ladan ozordi. Sa lafreyer ki zot annan ki en zour bann zarm pou ganny large in fer bokou parmi zot perdi konfyans dan kanmarad. Kwa ki’n ganny fer pour anpes sa kalite dezas arive?

Lafreyer nikleer, en menas pour linite

Bokou pei in met zot konfyans dan sa lakor ki apel Nuclear Non-Proliferation Treaty (NPT). Sa lakor ti ganny aprouve an 1968, e i ti defann okenn fabrikasyon zarm nikleer dan bann pei kot ti napa e i ti osi annan pour bi redwir lakantite zarm nikleer ki bann pei ki ti deza annan i prodwir. Lobzektif NPT ki aktyelman in ganny aprouve par plis ki 180 pei se pour retir tou bann zarm ki annan dan bann pei.

Menm si i paret ki sa bann pei in azir pour en bon rezon, serten kritik i vwar NPT konman en lesey delapar bann pei ki annan zarm nikleer pour anpes lezot pei ki napa pour konmans fabrik zot. Alors, i annan lafreyer ki serten parmi bann ki’n siny sa lakor pe konmans annan dout lo zot desizyon. Serten pei i vwar li enzis ki zot napa drwa devlop okenn zarm ki dapre zot sa ti pou ed zot pour protez zot lekor.

 Sa ki fer problenm pli konplike e pli danzere ankor, se lefet ki napa pei ki ganny enterdi pour devlop lenerzi nikleer. E sa in senm lafreyer ki bann pei ki pe sipoze pe servi lenerzi nikleer pour en bon rezon i kapab par deryer zot menm zot pe fabrik bann zarm an sekre.

Sa lakor NPT i kapab menm ganny rezete par bann pei ki deza annan zarm. Bann kritik i dir ki i pou bet pour ekspekte tou bann pei ki annan bokou zarm pour detrir ouswa menm redwir lakantite zarm ki zot annan dan stok. Dapre en sours, “pour arive fer sa . . . i neseser pour annan en gran lanmitye ek konfyans ant bann pei ki pour le moman pe opoz kanmarad [e i difisil pou krwar ki] sa pou arive.”

Zefor ki bann imen pe fer pour anmenn linite, menm si i paret senser, pa’n abouti dan nanryen. Sa pa sirprann bann etidyan Labib akoz Parol Bondye i dir: “I pa pour en imen ki pe marse pour diriz son lepa.” (Zeremi 10:23) Labib i osi dir fransman ki: “I annan en semen ki drwat devan en zonm, me apre semen lanmor i son lafen.” (Proverb 16:25) An sa ki konsern anmenn linite mondyal, zefor ki gouvernman imen i fer i limite. Kantmenm sa, nou pa reste san en lespwar.

Sa sours vre linite

Labib i kontyen promes Bondye ki tou dimoun pou ini en zour, me pa par zefor zonm. Plan nou Kreater se ki tou imen i viv ansanm dan lape dan lemonn antye, e zis li ki kapab akonplir sa, zonm pa kapab. Pour serten sa i paret enposib pour krwar. Me pourtan, sa ti plan Bondye depi o konmansman. I ti anvi ki tou imen i viv ansanm dan lape ek larmoni. * Bokou verse dan Labib i donn levidans ki plan Bondye konsernan reini tou imen dan linite i ankor parey. La detrwa legzanp:

• “Vini e vwar sa ki Zeova in fer, lafason ki i’n met bann keksoz merveye lo later. I pe fer arete lager ziska dan bann landrwa pli lwen lo later. I kas lark e i kas kas lans an morso. I bril bann saret dan dife.”—PSONM 46:8, 9.

• “Zot pa pou fer okenn keksoz mal oubyen koz okenn destriksyon dan tou mon montanny sen, akoz later pou vreman ranpli avek konnesans Zeova zis parey delo i kouver lanmer.”—IZAI 11:9.

• “I pou anval lanmor pour touzour, e Souvren Senyer Zeova pou sirman eswiy larm lo tou figir. E bann repros kont son pep i pou retire lo later akoz Zeova li menm in dir.”—IZAI 25:8.

• “Me nou, nou pe espere dapre son promes en nouvo lesyel ek en nouvo later kot pou annan lazistis.”—2 PYER 3:13.

• “[Bondye] pou eswiy tou larm dan zot lizye. Lanmor pou nepli egziste. Pou nepli annan ni  dey, ni plere, ni soufrans, parski lemonn ansyen in disparet.”—REVELASYON 21:4.

Akoz nou kapab annan konfyans dan sa bann promes? Sa se akoz konman nou Kreater, Zeova i annan pouvwar ek abilite pour anmenn linite lo later antye. (Lik 18:27) E i osi vreman anvi fer li. Labib i dir ki Bondye “i kontan . . . reini ankor tou keksoz dan Kris, keksoz dan lesyel ek keksoz lo later.”—Efezyen 1:8-10, NW.

Promes Bondye konsernan “en nouvo later kot pou annan lazistis” pa zis en krwayans ouswa zis en rev. (2 Pyer 3:13) Konsernan sa ki i ti promet Zeova ti dir: “Mon parol ki sorti dan mon labous pou akonpli. I pa pou retourn kot mwan san rezilta, me i pou sirman akonpli sa ki mon’n pran plezir ladan, e i pou sirman annan sikse dan sa ki mon’n anvoy li.”—Izai 55:11.

Ini par Parol Bondye

Parey i’n ganny mansyonnen dan lartik presedan, larelizyon i souvandfwa responsab pour diviz limanite olye ini li. Sa i merit nou latansyon akoz si vreman nou aksepte ki i annan en Kreater, eski pa i rezonnab pour krwar ki sa bann ki ador li pou viv dan lape ek larmoni antre zot? Sertennman!

Lefet ki larelizyon i anmenn divizyon dan lemonn antye sa pa ditou reflekte Bondye ek son Parol. O kontrer i anmenn kondannasyon lo bann larelizyon ki promot bann konplo ki zonm i fer olye siport plan Bondye. Zezi ti apel bann sef relizye dan son letan, bann “ipokrit” e i ti dir zot: “[Izai] ti annan rezon ler i ti dir sa bann parol lo zot: ‘Sa pep, i onor mwan avek zot labous, Me zot leker i lwen avek mwan. Zot ladorasyon i initil, zot ansenny bann komannman ki’n fer par zonm!’”—Matye 15:7-9.

Parkont, vre ladorasyon i anmenn en bon linite parmi bann dimoun. Profet Izai ti predir: “I devret arive dan bann dernyen zour ki montanny kot lakaz Zeova i ete pou ganny byen etabli parlao latet bann montanny, e i pou sirman ganny mete parlao bann pti montanny; e tou bann nasyon pou al ver li. I pou ziz bann nasyon e remet keksoz drwat pour bokou pep. Zot pou bezwen forz zot lepe an pyos e zot lans an sizay. Nasyon pa pou lev lepe kont nasyon e zot pou nepli aprann lager.”—Izai 2:2, 4.

Ozordi dan plis ki 230 pei bann Temwen Zeova pe swiv sa lenstriksyon ki Bondye in met an plas konsernan semen vre linite. Kwa ki fondasyon zot linite? Zapot Pol ti ekrir: “Annan lanmour ki soud tou keksoz parfetman ansanm dan larmoni.” (Kolosyen 3:14) Langaz orizinal ki Pol ti servi pour sa mo “soud” i kapab refer avek bann ligaman dan lekor imen. Sa bann ligaman i parey bann lakord for e zot ganny servi pour de fonksyon enportan. Zot gard bann lorgann dan lekor imen an plas e zot ser bann lezo ansanm.

Lanmour i parey. Sa kalite i fer plis ki zis anpes dimoun touy kanmarad. Lanmour Kretyen i permet bann endividi ki sorti dan diferan lorizin pour travay byen ansanm dan lape. Par egzanp, i permet zot pour viv annakor avek en prensip ki Zezi ti donnen. Parey i’n ganny ekrir dan Matye 7:12: “Alor fer pour lezot sa ki ou oule lezot i fer pour ou.” Bann ki’n swiv sa konsey in kapab sirmont prezidis.

“Kontan kanmarad”

Bann Temwen Zeova i determinen pour prouv zot lekor konman bann disip Kris par met an pratik sa ki Zezi ti dir: “Dimoun pou war ki zot mon bann disip si zot kontan kanmarad.” (Zan 13:35) Sa kalite lanmour in ganny demontre plizyer fwa dan bann moman kot i ti annan konfli rasyal ek problenm politik dan bann pei. Par egzanp,  pandan zenosid Rwanda an 1994, bann Temwen Zeova ti demontre lanmour antre zot. Bann Temwen dan tribi Outou ti met zot prop lavi dan risk pour protez zot bann frer Toutsi!

Byensir nou bezwen realis osi. Nou pa ekspekte tou bann pei pour demontre lanmour anver lezot pei ziska sa degre ki zot pou anmenn linite dan lemonn antye. Akoz dapre Labib, sa pou arive zis atraver Bondye dan son letan ki i’n fikse. Parkont, konmela bann endividi i kapab demontre sa lanmour ki soud tou keksoz parfetman ansanm e arive viv dan larmoni.

Pandan lannen ki’n pase, bann Temwen Zeova in pas plis ki en bilyon erdtan pour vizit lezot dimoun e koz avek zot lo Labib e valer ki i annan dan nou lavi ozordi. En bon konnesans lo Parol Bondye in ini plizyer milyon dimoun, menm bann ki oparavan ti annan laenn pour son kanmarad. Sa i enkli bann Arab ek Zwif, Armenyen ek Tirk, Alman ek Ris. Sa i zis detrwa legzanp.

Eski ou ti a kontan aprann plis lo bann bon lefe ki linite i anmennen dan Labib? Si wi, silvouple kontakte bann Temwen Zeova lokalman oubyen ekrir en ladres apropriye lo paz 2.

[Not anba lo paz]

[Blurb lo paz 4]

Bokou lakor lape in ganny sinyen e osi ganny kase

[Blurb lo paz 7]

Laplikasyon bann prensip Labib in akonplir sa ki bann gouvernman pa’n kapab akonplir

[Portre lo paz 5]

Parol Bondye i diriz latansyon ver Sours sa vre linite

[Portre lo paz 7]

Bann Temwen Zeova sorti dan tribi Outou e Toutsi pe konstri en landrwa ladorasyon ansanm