Maryaz ki onorab pour Zonm ek Bondye
Maryaz ki onorab pour Zonm ek Bondye
“Ti annan en maryaz dan lavil Kana . . . Zezi osi avek son bann disip ti’n ganny envite sa maryaz.”—ZAN 2:1, 2.
1. Ki nou aprann lo Zezi zour maryaz dan lavil Kana?
ZEZI, son manman, ek serten son bann disip ti konn lazwa ki vin avek en maryaz onorab parmi pep Bondye. Kris ti menm fer en maryaz ankor pli remarkab ler i ti fer premye mirak ki Labib i mansyonnen laba, e sa ti anmenn plis lazwa sa zour. (Zan 2:1-11) Tre probab ou osi ou’n kontan pour asiste bann maryaz Kretyen kot sa koup i anvi servi Zeova ini ansanm dan lazwa. Oubyen petet ou osi ou ti a kontan annan sa kalite maryaz en zour oubyen pour ed enn ou zanmi prepar avek sikse son maryaz. Kwa ki kapab ede fer en maryaz reisi?
2. Ki nou aprann lo maryaz dan Labib?
2 Bokou Kretyen in vwar ki konsey ki sorti dan Parol Bondye i ed en msye ek en madanm ki pe al marye en kantite. (2 Timote 3:16, 17) I vre ki Labib pa donn bokou detay lo konman pour organiz en maryaz Kretyen. I fer sans akoz bann koutim ek bann prosedir legal i diferan dapre landrwa ouswa lepok ki nou viv. Par egzanp, lepok bann Izraelit ti napa en seremoni maryaz formel. Zour maryaz, nouvo marye ti anmenn nouvel marye kot li oubyen kot son papa. (Zenez 24:67; Izai 61:10; Matye 1:24) Par sa aksyon piblik, sa de dimoun ti marye san okenn seremoni formel parey nou abitye fer ozordi.
3. Dan ki levennman Zezi ti kontribye?
3 Pour bann Izraelit zour ki sa msye ti pran sa madanm kot li, zot ti marye. Apre sa, i ti kapab annan en resepsyon parey Zan 2:1 i mansyonnen. Bokou Labib i tradwir sa verse an dizan: ‘Ti annan en maryaz dan lavil Kana.’ Me dan langaz orizinal, i plito dir ti annan en “festen [oubyen resepsyon] maryaz.” * (Matye 22:2-10; 25:10; Lik 14:8, NW) Sa resi dan Labib i fer kler ki Zezi ti prezan e ti kontribye pour ki sa resepsyon maryaz Zwif ti vin pli gou. Toudmenm, sa ki enportan se ki maryaz li menm sa lepok ti diferan avek sa ki nou abitye denozour.
4. Ki kalite maryaz serten Kretyen i swazir, e akoz?
4 Dan plizyer pei ozordi, bann Kretyen ki anvi marye i bezwen swiv serten prosedir legal avan maryaz li menm. Kan zot in fer tousala, zot kapab marye dan en fason legal. Sa i kapab en pti seremoni senp fer par en ziz, mer en lavil oubyen en minis Kretyen ki reprezant gouvernman sa pei. Serten i marye koumsa e souvan zot envit serten fanmiy oubyen bann zanmi Kretyen pour vin zot temwen ouswa zis pour prezan pour partaz lazwa sa levennman enportan. (Zeremi 33:11; Zan 3:29) Pareyman, serten Kretyen pa anvi fer en gran resepsyon maryaz ki pou demann bokou preparasyon ek larzan. Plito zot organiz en repa avek bann zanmi pros. Nenport pwennvi nou annan lo sa size, nou bezwen rekonnet ki i posib pour bann Kretyen matir annan bann pwennvi diferan.—Romen 14:3, 4.
5. Akoz bokou Kretyen i kontan pour annan en diskour maryaz, e sa diskour i koz lo kwa?
5 Laplipar koup Kretyen i swazir pour annan en diskour baze lo Labib zour zot maryaz. * Zot rekonnet ki se Zeova ki ti konmans sa laranzman pour de dimoun marye e se li menm ki fourni bann konsey saz dan son parol Labib pour reisi e ere dan lavi maryaz. (Zenez 2:22-24; Mark 10:6-9; Efezyen 5:22-33) Laplipar koup i kontan ki lezot, fanmiy oubyen zanmi, i la prezan pour sa levennman zwaye. Selman, konman nou devret vwar tou sa bann diferan prosedir legal ek koutim lokal? Sa lartik pou koz lo serten sitiasyon dan diferan rezyon. Serten sa bann koutim i kapab tre diferan avek sa ki ou konnen oubyen avek sa ki abitye ganny fer kot ou reste. Toudmenm, ou pou vwar serten prensip oubyen laspe ki enportan pour tou serviter Bondye.
Maryaz onorab—Maryaz legal
6, 7. Akoz en maryaz legal i enportan pour nou, e konman nou demontre sa?
6 Menm si se Zeova ki’n konmans laranzman maryaz, bann gouvernman imen i annan drwa pour annan en serten kontrol lo sa ki bann ki anvi marye i fer. Sa i akseptab akoz Zezi ti dir: “Rann Sezar sa ki pour Sezar, e Bondye sa ki pour Bondye.” (Mark 12:17) Zapot Pol ti osi dir: “Tou dimoun i devre soumet li avek bann lotorite ki gouvernen, parski napa okenn lotorite amwen ki Bondye in etabli li, e bann lotorite ki egziste i ganny etabli par Bondye.”—Romen 13:1; Tit 3:1.
7 Sezar oubyen gouvernman i deside lekel ki kapab marye dan laplipar pei. Pour sa rezon si de Kretyen ki annan drwa marye dapre Labib i anvi marye, zot swiv egzakteman sa ki lalwa i dir. Dan serten landrwa, sa i vedir obtenir en sertifika maryaz, pas devan en zofisye gouvernman, oubyen anrezistre sa maryaz. Kan Sezar Ogis ti ordonn tou dimoun pour “anrezistre,” Mari ek Zozef ti obeir e al Betleenm pour “anrezistre” zot.—Lik 2:1-5.
8. Ki kantite serye maryaz i ete, e ki mannyer Temwen Zeova i montre sa?
8 Ler de Kretyen i marye dan en fason legal e akseptab, zot maryaz oubyen langazman i valid devan Bondye. Alors, Temwen Zeova pa fer plis ki en seremoni maryaz, zot pa refer zot bann ve maryaz par egzanp zour zot 25 oubyen 50 an maryaz. (Matye 5:37) (Serten legliz pa aksepte bann maryaz biro akoz zot dir sa maryaz pa valid si i pa’n ganny fer par en pret oubyen en paster ki deklar sa de dimoun msye ek madanm.) Dan plizyer pei, gouvernman i permet ki en minis Temwen Zeova i marye de dimoun. Si sa i posib, sa frer pou anvi marye sa de dimoun anmenmtan ki en diskour i ganny donnen kot Lasal Rwayonm. Lasal Rwayonm i landrwa kot nou ador Bondye e i en landrwa apropriye pour donn en diskour maryaz, en laranzman ki Zeova ti konmanse.
9. (a) Si maryaz i bezwen ganny fer devan lotorite sivil, ki en koup Kretyen i kapab fer? (b) Ki mannyer bann ansyen i kapab enplike dan preparasyon maryaz?
9 Dan lezot pei, lalwa i demande ki sa koup i marye dan en biro gouvernman, swa dan en biro dan sa lavil oubyen devan en zofisye gouvernman. Bann Kretyen i kontan pour fer sa prosedir legal epi pour annan en diskour kot Lasal Rwayonm menm zour oubyen son zour answit. (Zot pa pou anvi les pase plizyer zour ant seremoni legal ek diskour biblik akoz zot in fini marye devan Bondye e devan zonm, sa i enkli kongregasyon Kretyen.) Si en koup i anvi, apre sa seremoni legal, ganny en diskour dan en serten Lasal Rwayonm, zot bezwen demann permisyon davans avek bann ansyen ki servi lo Komite Servis Kongregasyon. Sa bann sirveyan pou fer sir ki sa nouvo koup i annan en bon repitasyon e ki diskour maryaz pa pou enterfer avek lezot renyon oubyen lezot progranm ki annan kot sa lasal. (1 Korentyen 14:33, 40) Zot pou osi tyeke okenn preparasyon ki sa koup i swete fer dan sa lasal e si i pou annan en lanons ki ganny fer avek kongregasyon.
10. Si i annan en seremoni sivil, ki sanzman i pou fer dan diskour maryaz?
10 Sa ansyen ki donn sa diskour maryaz pou fer son mye pour ki sa diskour i batir lezot spirityelman, i onorab e ganny donnen dan en fason amikal. Si sa koup in marye devan en zofisye gouvernman avan diskour, sa frer pou dir lodyans ki sa koup in marye dapre lalwa gouvernman. Si sa koup pa’n pronons bann ve maryaz dan seremoni sivil, zot pou kapab fer li pandan sa diskour. * Si sa seremoni devan en zofisye gouvernman ti enkli sa bann ve, me ki sa nouvo koup marye i anvi pronons bann ve devan Zeova ek kongregasyon, zot pou fer li dan en fason ki montre zot konsyan ki zot in deza ‘ini ansanm’ devan sa zofisye gouvernman. Olye dir ‘Mon pran ou . . .’ zot pou dir ‘Mon’n pran ou . . .’—Matye 19:6; 22:21.
11. Dan serten landrwa ki mannyer dimoun i marye e konman zot kapab fer sa diskour maryaz?
11 Dan serten landrwa, lalwa pa ekspekte ki en koup i fer okenn seremoni maryaz, menm devan en zofisye gouvernman. Zot marye zour ki zot ranpli, sinyen e donn en form pour anrezistre zot maryaz avek en zofisye. Alors sa maryaz i anrezistre, sa koup in marye, dat zot maryaz i dat ki lo sa form. Parey i ti ganny dir pli boner, sa koup ki aprezan marye i kapab al kot Lasal Rwayonm deswit pour annan en diskour maryaz. Sa frer matir ki’n ganny swazir pour donn sa diskour pou dir tou dimoun prezan ki sa koup in marye akoz zot fek ranpli sa form. Zot pou pronons bann ve parey paragraf 10 ek sa not i eksplike. Bann ki prezan kot Lasal Rwayonm pou rezwir avek sa koup e osi benefisye avek bann konsey ki sorti dan Parol Bondye.—Kantik Salomon 3:11.
Maryaz sivil ek Maryaz Koutim
12. Kisisa en maryaz koutim, kwa ki bon fer apre sa?
12 Dan serten pei, bann koup i marye dapre bann maryaz koutim oubyen tribi. Nou pa pe koz lo de dimoun ki pe menaz, ni osi lo serten maryaz (common-law) ki pa toutafe legal devan lalwa. * Nou pe koz lo en maryaz dapre koutim etabli par en serten tribi oubyen en pei. Sa i kapab enplik en donasyon ki bezwen ganny aksepte e konpletman peye, alor sa koup pou marye legalman e dapre Labib. Dan sa bann landrwa, gouvernman i vwar sa bann maryaz legal, valid e serye. Laplipar-di-tan i posib pour rikord oubyen anrezistre sa maryaz, e alor sa koup i kapab ganny en sertifika ofisyel. Sa i kapab vin en proteksyon pour sa koup, pour sa madanm si sa msye i mor, e oubyen pour bann fitir zanfan. Kongregasyon pou ankouraz zot pour anrezistre sa maryaz koutim osito posib. I enteresan ki dan Lalwa Moiz, i probab ki bann maryaz ek nesans ti ganny rikorde ofisyelman.—Matye 1:1-16.
13. Apre en maryaz koutim, ki mannyer diskour maryaz pou deroule?
13 Sa koup i ganny konsidere konman marye legalman zour ki zot fer sa seremoni. Parey nou ti dir pli boner sa koup Kretyen pou kapab annan en diskour avek bann ve maryaz kot Lasal Rwayonm. Si i leka, sa orater pou dir ki sa koup in fini marye dapre lalwa gouvernman. I pou annan zis en diskour. I annan zis en maryaz, setadir sa maryaz koutim oubyen dan tribi. Sa maryaz i legal e i annan en sel diskour baze lo Labib. Ler nou fer tou pour ki sa maryaz i ganny fer menm zour avek diskour maryaz oubyen preski osito, sa i ede pour ki sa maryaz Kretyen i onorab dan sa kominote.
14. Ki en Kretyen i kapab fer si tou le de maryaz sivil e maryaz koutim i posib?
14 Dan serten pei kot maryaz koutim i legal, i osi annan posibilite pour fer en maryaz sivil devan en zofisye gouvernman kot zot pou kapab pronons bann ve e sinyen pour anrezistre zot maryaz. Serten i prefer sa maryaz ki sa enn dapre koutim. Me i pa neseser pour fer tou le de, akoz tou le de i valid legalman. Sa ki’n ganny dir dan paragraf 9 ek 10 i osi aplikab dan sa ka. Sa ki enportan se ki sa koup i marye devan zonm e devan Bondye dan en fason onorab.—Lik 20:25; 1 Pyer 2:13, 14.
Kontinyen onor Maryaz
15, 16. Ki mannyer loner ek respe i esansyel dan maryaz?
15 Ler en problenm ti leve dan maryaz en lerwa Pers, Memoukann, premye konseye ti sizer en bon keksoz avek lerwa. I ti dir ki ‘tou bann madanm i devret onor zot mari.’ (Ester 1:20) Pour bann Kretyen marye, pa bezwen sa konsey i sorti kot en lerwa imen, akoz bann madanm Kretyen i anvi onor zot mari. Pareyman, bann mari Kretyen i ‘tret zot madanm avek respe’ e zot felisit zot. (Proverb 31:11, 30; 1 Pyer 3:7) Demontre sa respe oubyen loner pa konmans apre plizyer lannen maryaz, me plito okonmansman menm, zour maryaz.
16 Pa zis sa msye ek sa madanm ki devret demontre respe zour zot maryaz. Si en ansyen i donn en diskour maryaz, sa diskour osi i devret demontre sa respe. Diskour maryaz i devret ganny adrese avek sa koup. Pour demontre sa respe, sa frer pa pou servi en kantite fars oubyen dikton. I pli bon osi si i pa koz lo bann keksoz ki tro personnel ki kapab anbaras sa koup ouswa bann dan lodyans. Plito i pou sey koz avek santiman e i pou batir son lodyans par met an valer sa Enn ki’n konmans maryaz ek Son bann konsey. Dan sa fason, en tel diskour donnen avek respe pou ede pour ki sa maryaz i onor Zeova.
17. Akoz maryaz i annan en laspe legal?
17 Probableman ou’n remarke ki i annan en bon pe detay legal lo maryaz dan sa lartik. Serten laspe i kapab pa aplik dan ou pei. Selman nou tou nou devret realize ki kantite enportan i ete pour bann Temwen Zeova ki bann laranzman maryaz i ganny fer an armoni avek bann lalwa lokal, avek sa ki gouvernman i ekspekte kot nou reste. (Lik 20:25) Pol ti ensiste: “Rann sakenn sa ki zot devre: ki swa taks, . . . ki swa respe, ki swa loner, pey tou selon zot merit.” (Romen 13:7) I toutafe normal ki bann Kretyen depi zour maryaz i demontre respe pour laranzman ki Bondye in met an plas pour lemoman.
18. Ki sa lot laspe ki pa obligatwar dan maryaz ki nou bezwen byen veye, e kote nou kapab trouv sa lenformasyon?
18 Bokou maryaz Kretyen i swiv avek en rankont, swa en repa oubyen en resepsyon. Ou rapel ki Zezi ti kontan pour la zour en resepsyon maryaz. Si i annan en tel fonksyon, ki mannyer konsey Labib i kapab ed nou fer sir ki sa rankont osi pou demontre respe pour Bondye e byen reprezant sa nouvo koup ek kongregasyon Kretyen? Lot lartik pou egzamin sa size. *
[Not anba lo paz]
^ par. 3 Menm mo i kapab ganny servi pour en resepsyon ki napa nanryen pour fer avek en maryaz.—Ester 9:22, Septant.
^ par. 5 En plan pour en diskour maryaz 30 minit ki annan pour tit an Angle “Honorable Marriage in God’s Sight” i ganny servi par Temwen Zeova. Sa diskour i fer resorti serten konsey biblik ki baze lo liv Sekre pour en Fanmiy ere ek lezot piblikasyon Temwen Zeova. Sa diskour i itil pour sa nouvo koup e osi bann ki asiste.
^ par. 10 Amwen ki lalwa i dir lekontrer, la bann ve ki onor Bondye ki nou kapab servi. Pour nouvo marye: “Mon [non nouvo marye] pran ou [non nouvel marye] konman mon madanm marye e mon fer sa ve pour kontan e serir ou an akor avek lalwa Bondye ki trouve dan Lekritir Sen pour bann mari Kretyen, osi lontan ki nou viv tou le de lo later dan kad maryaz parey i’n ganny enstitye par Bondye.” Pour nouvel marye: “Mon [non nouvel marye] pran ou [non nouvo marye] konman mon mari e mon fer sa ve pour kontan e serir ou e pour manifeste en profon respe pour ou, an akor avek lalwa Bondye ki trouve dan Lekritir Sen pour en madanm Kretyen, osi lontan ki nou viv tou le de lo later dan kad maryaz parey i’n ganny enstitye par Bondye.”
^ par. 12 Latour Veyer an Angle le 1 Me, 1962, paz 287 i donn plis lenformasyon lo bann maryaz common-law.
^ par. 18 Vwar osi sa lartik “Increase the Joy and Dignity of Your Wedding Day,” lo paz 28 Latour Veyer le 15 Oktob 2006 an Angle oubyen Franse.
Eski ou rapel?
• Akoz laspe legal e spirityel en maryaz i enportan?
• Si de Kretyen i marye dan en seremoni legal, ki zot kapab kontan pour fer deswit apre?
• Akoz bann Kretyen i annan en diskour maryaz kot Lasal Rwayonm?
[Kestyon]
[Portre lo paz 12]
Dan bann maryaz Izraelit, nouvo marye ti pran nouvel marye e anmenn li kot li oubyen kot son papa
[Portre lo paz 15]
Apre en maryaz koutim, bann Kretyen i kapab annan en diskour maryaz kot Lasal Rwayonm