Konman pour fer ou Maryaz vin pli solid

MAZIN en lakaz ki’n ariv dan en move kondisyon akoz i’n ganny neglize. Lapentir pe dekoke, twa in ganny andomaze, e menm zerb in anvair lakaz. I evidan ki movetan diran bann lannen ki’n pase e osi neglizans delapar son propriyeter in fer en move lefe lo sa lakaz. Eski i devret ganny kraze? Pa neseserman. Si son fondasyon i for e son striktir i stab, sa lakaz i kapab revin dan sa kondisyon ki i ti ete avan.

Eski kondisyon sa lakaz i fer ou rapel ou maryaz? Petet, diran bann lannen ki’n pase, bann movetan in afekte ou lavi maryaz. Petet ou oubyen zot tou le de zot in negliz en pe zot maryaz. Kekfwa ou santi parey Sandy. Apre 15 an maryaz, Sandy ti dir: “Nou ti napa nanryen an komen apard ki nou’n marye avek kanmarad. Sa pa ti sifi.”

Menm si ou maryaz in ariv lo sa degre, pa depese pour konklir ki ou maryaz i devret fini lanmenm. I tre probab, ki ou maryaz i kapab revin parey i ti ete avan. Sa pou depan bokou lo kalite langazman ki egziste ant ou ek ou msye oubyen madanm. Langazman i kapab ed en maryaz pour reste stab pandan bann moman difisil. Me kisisa langazman? Deplis, ki mannyer Labib i kapab ed ou pour fer li vin pli solid?

Langazman i enplik Lobligasyon

Dapre en diksyonner, langazman i sa “kondisyon ler en dimoun i santi li oblize oubyen santi li pouse par son santiman.” Parler sa mo i ganny servi an rapor avek bann keksoz, tel parey en lagreman dan biznes. Par egzanp, ler en kontrakter i siny en kontra ki demann li pour fer en lakaz, i kapab santi li oblize pour akonpli sa ki sa kontra pe demann li pour fer. Petet li menm li i pa konn sa dimoun ki’n donn lord pour fer sa travay. Toudmenm, i santi li pouse pour akonpli son parol.

Kantmenm maryaz pa en tranzaksyon biznes, sa langazman ki enplike dan maryaz i enkli lobligasyon. Zot tou le de zot in fer en ve solannel devan Bondye e devan lezot dimoun pour reste ansanm malgre nenport kwa ki kapab  arive. Zezi ti dir: “Depi okonmansman kreater ti fer zot mal ek femel, e ti dir: ‘Pour sa rezon, en zonm pou kit son papa ek son manman pour ini avek son madanm.’ ” Zezi ti azoute: “Sa ki Bondye in ini ansanm zonm pa devre separe.” (Matye 19:4-6) Alor, ler problenm i leve, zot tou le de zot devret byen rezoli pour onor sa langazman ki zot in fer. * En madanm i dir: “Se zis apre ki nou ti aret mazin pour divorse ki keksoz ti konmans amelyore.”

Me langazman dan maryaz, napa zis lobligasyon. I annan plis ki sa. Ki lezot keksoz ki enplike dan langazman dan maryaz?

Travay ansanm i fer Langazman dan Maryaz vin pli for

Langazman dan maryaz pa vedir ki bann dimoun marye pou toultan tonm dakor avek kanmarad. Ler en konfli i leve, sa koup i devret annan en gran dezir pour rezourd sa sitiasyon. Sa i devret ganny fer pa zis akoz en dimoun i santi li oblize pour rezon en ve ki i’n fer, me osi akoz son santiman anver sa lot. Konsernan msye ek madanm, Zezi ti dir: “Zot nepli de me en sel.”

Ki savedir vin “en sel” avek ou msye ouswa madanm? Zapot Pol ti ekrir ki ‘bann zonm devre kontan zot madanm parey zot kontan zot prop lekor.’ (Efezyen 5:28, 29) Alors, dan en sans, vin “en sel” i vedir ki ou enterese avek byennet ou msye ouswa ou madanm zis parey ou enterese avek ou prop lekor. Bann zonm ek fanm marye i bezwen sanz zot fason panse. Olye vwar keksoz dapre zot pwennvi personnel, zot bezwen vwar keksoz konman en koup. En konseye ti ekrir: “Tou le de dimoun marye i bezwen aret mazin e santi konmsi zot ankor selibater.”

Eski ou ek ou msye ouswa madanm, zot mazin e santi konman en koup marye? I posib ki de dimoun i ansanm pour bokou lannen me pa zanmen “en sel” dan sa sans. Wi, sa i kapab arive, me liv Giving Time a Chance i dir: “Maryaz i vedir partaz en lavi ansanm, e pli de dimoun i fer keksoz ansanm, pli zot lavi maryaz pou prospere.”

Serten koup ki pa ere i reste ansanm akoz zot zanfan oubyen pour sekirite finansyel. Lezot i andire akoz zot pa vwar divors en bon keksoz pour fer ouswa zot per ki lezot pou mazinen si zot separe oubyen divorse. Menm si i byen ki sa bann maryaz i andire, rapel ki zot lobzektif se pour annan en relasyon kot lanmour i egziste, pa zis pour annan en relasyon ki dire.

 Fer Keksoz pour Kanmarad i ankouraz Langazman dan Lavi Maryaz

Labib ti predir ki pandan “bann dernyen zour,” dimoun pou “vin egois.” (2 Timote 3:1, 2) Parey sa profesi ti predir, i paret ki ozordi dimoun i enterese zis avek zot prop lekor. Dan bokou maryaz, si en dimoun i fer en keksoz pour en lot, san ki sa lot i fer en keksoz pour li, sa i ganny vwar konman en febles. Me dan en maryaz ki reisi, tou le de dimoun i pare pour donn zot lekor pour kanmarad. Ki mannyer ou kapab fer sa?

Olye konsantre lo ‘Ki mon pe gannyen dan sa relasyon?’ demann ou lekor, ‘Ki mon pe fer pour fer mon maryaz vin pli solid?’ Labib i dir ki bann Kretyen “pa devre pran ka zis avek zot prop lentere, me osi avek lentere lezot.” (Filipyen 2:4) Anmezir ki ou pe reflesir lo sa prensip Labib, egzamin bann keksoz ki ou’n fer pandan sa semenn ki’n pase. Konbyen fwa ou’n fer en bon keksoz zis pour byennet ou msye ouswa madanm? Ler ou msye ouswa madanm ti anvi koze, eski ou ti ekoute—menm si ou pa ti tro anvi fer li? Ki kantite aktivite ki ou ti partisip ladan ki ti enteres ou msye ouswa madanm plis ki ou?

Ler ou pe mazin lo sa bann kestyon, pa enkyet ki ou bon aksyon pa pou ganny remarke oubyen rekonpanse. En liv i dir: “Dan laplipar relasyon, en bon konportman delapar en dimoun i fer sa lot azir parey. Alor, fer ou mye pour ankouraz ou msye ouswa madanm pour azir dan en bon fason par azir dan en pli bon mannyer ou menm.” Ou maryaz i vin pli solid ler ou fer bann aksyon ki demontre en leta lespri sakrifis. Parski sa bann aksyon i demontre ki ou atas en gran valer avek ou maryaz e ki ou anvi prezerv li.

Vwar Maryaz konman en Keksoz ki pou dire i enportan

Zeova i atas en gran valer avek fidelite. Anfet, Labib i dir: “Avek en dimoun fidel ou [Zeova] pou azir avek fidelite.” (2 Samyel 22:26) Reste fidel avek laranzman maryaz ki Zeova in entrodwir i enplik reste fidel avek Bondye.—Zenez 2:24.

Si ou ek ou msye ouswa madanm i fidel avek kanmarad, zot pou santi ki zot linyon i solid e permanan. Ler ou mazin bann mwan, lannen ek syek ki devan ou, ou vwar zot tou le de ansanm. Ou pa kapab mazinen ki zot nepli ansanm e sa pwennvi i anmenn sekirite dan zot relasyon. En madanm i dir: “Menm ler mon tre ankoler avek [mon mari] e mon pa kontan avek sa ki pe arive avek nou, mon pa trakase ki nou maryaz i kapab terminen. Mon trakase ki mannyer nou pou aranz sitiasyon e retourn parey avan. Mon napa okenn dout ki nou pa pou rearanz keksoz—mon zis pa kapab vwar ki mannyer mon kapab fer sa la.”

Vwar maryaz konman en keksoz ki devret dire i en par esansyel dan langazman en koup marye. Me i regretab ki dan bokou maryaz sa pa egziste. Pandan bann gro largiman,  enn i kapab dir, “Mon pe kit ou!” oubyen, “Mon pe al rod en lot dimoun ki vreman apresye mwan!” I vre ki laplipar-di-tan sa bann dimoun ki dir sa bann parol pa vreman anvi fer sa bann keksoz. Kantmenm sa, Labib i fer resorti ki lalang i kapab “ranpli avek pwazon vyolan.” (Zak 3:8) Ler en dimoun i fer bann menas, i konmsi i pe dir: ‘Mon pa vwar nou maryaz konman en keksoz permanan. Nenport ler mon kapab ale.’ Pas bann mesaz koumsa atraver bann komanter ki en dimoun i fer i kapab kas en maryaz.

Ler ou konsider ou maryaz konman en keksoz ki pou dire, ou ekspekte ki ou pou reste avek ou msye ouswa madanm dan nenport difikilte ek movetan. Sa i anmenn en lot byenfe. I pou fer li pli fasil pour ou ek ou msye ouswa madanm aksepte febles ek fot kanmarad e pour kontinyen siport e pardonn kanmarad. (Kolosyen 3:13) Dapre en liv, dan en bon maryaz, tou le de i kapab fer fot. Me malgre sa, maryaz i kapab dire.

Zour ki ou ti marye, ou pa ti marye zis pour dir la ou’n marye, me ou ti fer en langazman avek en dimoun—ou msye ouswa madanm. Sa fe i devret annan en lefe profon lo lafason ki ou panse e azir aprezan konman en dimoun marye. Eski ou pa dakor ki ou devret reste avek ou msye ouswa madanm, pa zis akoz ou krwar e respe laranzman maryaz me osi akoz ou kontan sa dimoun ki ou’n marye avek?

[Not anba lo paz]

[Bwat/Portre lo paz 5]

Ki ou kapab fer konmela menm

Ki kantite ou determinen e anvi prezerv e fer ou maryaz vin pli for? Petet ou vwar ki ou kapab amelyore. Pour fer ou langazman vin pli for, esey fer sa bann keksoz swivan:

● Egzamin ou lekor. Demann ou lekor: ‘Eski mon vreman santi e mazin konman en dimoun marye, oubyen mon ankor pe mazin e azir konman en selibater?’ Rode ki mannyer ou msye ouswa madanm i santi lo ou dan sa laspe.

● Lir sa lartik avek ou msye ouswa madanm. Apre, dan en fason kalm, diskite ki mannyer zot kapab fer zot langazman anver zot maryaz vin pli for.

● Avek ou msye ouswa madanm, fer bann aktivite ki fer zot langazman vin pli for. Par egzanp: Get bann portre zot maryaz ek lezot levennman inoubliyab dan zot lavi. Fer bann keksoz ki zot ti kontan fer ler zot ti pe pwente oubyen ler zot ti’n fek marye. Etidye bann lartik baze lo Labib dan Latour Veyer ek Réveillez-vous! ki koz lo maryaz.

[Bwat/Portre lo paz 6]

Dan Maryaz, Langazman i enplik . . .

● Lobligasyon “Kan ou fer en ve avek Bondye, pa ezite pour akonpli li. I pli bon ou pa fer en ve, ki ou fer enn e pa akonpli li.”—Eklezyast 5:4, 5.

● Travay ansanm “De i pli bon ki enn . . . Akoz si enn ant zot i arive tonbe, sa lot i kapab lev li.”—Eklezyast 4:9, 10.

● Fer sakrifis “I annan plis lazwa pour donnen ki pour resevwar.”—Akt 20:35.

● Vwar Maryaz konman en keksoz ki pou dire “Lanmour . . . i siport tou.”—1 Korentyen 13:4, 7.

[Portre lo paz 7]

Ler ou msye ouswa madanm i anvi koze, eski ou ekoute?