1, 2. An 2018, ki levennman ki pou fer nou ini dan en fason inik e akoz? (Vwar portre o konmansman sa lartik.)

LE 31 Mars 2018, plizyer milyon dimoun partou dan lemonn pou asiste en levennman ki ganny fer zis en fwa par an. Apre soley kouse, bann Temwen Zeova ek plizyer lezot ankor pou zwenn ansanm pour rapel sa sakrifis ki Zezi ti fer pour nou. Tou le-z-an, Memoryal lanmor Kris i ini dimoun dan en fason enkrwayab, plis ki dan okenn lezot levennman ki ganny fer lo later.

² Nou kapab mazinen ki Zeova ek Zezi i vreman kontan ler zot vwar plizyer milyon dimoun partou dan lemonn pe al sa levennman spesyal sakenn dan son ler respektif. Labib i dekrir “en gran lafoul ki personn pa ti kapab konte ki sorti dan tou nasyon, tribi, pep ek langaz pe debout devan tronn e devan Pti Mouton.” Zot pe kriye: “Nou’n ganny sove gras a nou Bondye, sa Enn ki lo tronn e gras a sa Pti  Mouton.” (Revelasyon 7:9, 10) Nou kontan ki tou le-z-an kot Memoryal, i annan en kantite dimoun ki pe onor Zeova ek Zezi pour bann keksoz ki zot in fer!

3. Ki kestyon nou pou reponn dan sa lartik?

³ Dan sa lartik, ou pou trouv larepons pour sa kat kestyon: (1) Ki mannyer mon kapab prepar pour Memoryal pour ki mon vreman kapab benefisye avek sa levennman? (2) Dan ki fason Memoryal i ed tou pep Bondye pour vin ini? (3) Ki mon kapab fer pour promot linite parmi pep Bondye? (4) Eski i pou annan en dernyen Memoryal en zour? Si wi, kan?

4. Akoz i enportan pour nou asiste Memoryal?

⁴ Akoz i enportan pour nou asiste Memoryal? En rezon se ki ler nou asiste bann renyon, sa i en fason ki nou ador Zeova. Nou kapab asire ki Zeova ek Zezi i remark sak dimoun ki fer son mye pour asiste sa renyon pli enportan dan lannen. Nou anvi ki Zeova ek Zezi i vwar ki nou pou asiste Memoryal amwen ki i absoliman enposib pour nou ale. Ler nou bann aksyon i montre ki nou bann renyon i enportan pour nou, nou donn Zeova ankor en lot rezon pour gard nou non dan son “liv souvenir.” Sa liv i osi apel “liv lavi.” Dan sa liv i annan non tou bann ki Zeova i anvi donn lavi eternel.​—Malaki 3:16; Revelasyon 20:15.

5. Dan bann semenn avan Memoryal, ki mannyer ou kapab ‘kontinyen teste ou lekor pour vwar si ou dan lafwa’?

⁵ Dan bann semenn avan Memoryal, nou kapab pas plis letan pour priye e pour reflesir seryezman lo ki mannyer nou relasyon avek Zeova i ete. (Lir 2 Korentyen 13:5.) Zapot Pol ti dir bann Kretyen: “Kontinyen teste zot lekor pour vwar si zot dan lafwa.” Ki mannyer nou kapab fer sa? Nou kapab demann nou lekor: ‘Eski mon vreman krwar ki sa i sa sel lorganizasyon ki Zeova in swazir pour fer son lavolonte? Eski mon pe fer mon mye pour anons e ansenny sa bon nouvel? Eski mon bann aksyon i montre ki mon vreman krwar ki nou pe viv dan bann dernyen zour e ki lafen dominasyon Satan i pros? Eski mon konfyans dan Zeova ek Zezi i ankor for parey ler mon ti fek konmans servi Zeova?’ (Matye 24:14; 2 Timote 3:1; Ebre 3:14) Ler nou reflesir lo larepons sa bann kestyon, sa pou ed nou pour “kontinyen fer sir” ki kalite dimoun nou ete.

6. (a) Ki sa sel fason ki nou kapab ganny lavi eternel? (b) Ki mannyer en ansyen i prepar pour Memoryal sak lannen e ki mannyer nou kapab imit son legzanp?

⁶ En fason ki ou kapab prepar pour Memoryal, se par lir e reflesi lo bann lartik ki eksplike akoz sa levennman i sitan enportan. (Lir Zan 3:16; 17:3.) Sa sel fason ki nou kapab ganny lavi eternel, se par aprann konn Zeova e annan lafwa  dan son Garson Zezi. Pour prepar pour Memoryal, nou kapab swazir pour etidye bann keksoz ki pou ed nou vin pli pros avek zot. Sanmenm sa ki en frer ki pe servi konman en ansyen pour plizyer lannen i fer. Pour plizyer lannen, in fer en koleksyon bann lartik Latour Veyer ki koz lo Memoryal e lo lanmour ki Zeova ek Zezi in demontre anver nou. Dan bann semenn avan Memoryal, i lir sa bann lartik ankor e i reflesi seryezman lo akoz sa levennman i sitan enportan. Par ler i azout enn de lartik dan son koleksyon. I osi lir e reflesi byen lo lektir Labib pour Memoryal. Sa ansyen i dir ki par fer tousala, i aprann bann nouvo keksoz tou le-z-an. Pli enportan ki tou, se ki son letid i fer li pli kontan Zeova ek Zezi. Ler ou etidye dan sa fason, ou osi ou pou pli kontan Zeova ek Zezi. Ou pou osi pli rekonesan pour sa ki zot in fer e ou pou benefisye plis avek Memoryal.

7. (a) Ki Zezi ti demande dan son lapriyer sa zour swar ki premye Repa Senyer ti ganny fer? (b) Kwa ki montre ki Zeova in reponn lapriyer Zezi?

⁷ Sa zour swar ki premye Repa Senyer ti ganny fer, Zezi ti fer en lapriyer spesyal. I ti priy lo sa linite presye ki li ek son Papa zot annan. Zezi ti osi priye ki tou son bann disip i vin ini dan menm fason. (Lir Zan 17:20, 21.) Sertennman, Zeova in reponn sa lapriyer ki son Garson byenneme ti fer. Plis ki okenn lezot renyon, Memoryal i montre klerman ki bann Temwen Zeova i ini. Sa zour, plizyer milyon dimoun ki sorti dan plizyer diferan pei e ki annan diferan kouler lapo, i zwenn ansanm partou dan lemonn e zot montre ki zot krwar ki Zeova ti anvoy son Garson. Dan serten landrwa, i vreman drol pour dimoun ki annan diferan ras fer zot renyon relizye ansanm oubyen si zot fer li, lezot i krwar ki sa pa apropriye. Me Zeova ek Zezi pa santi koumsa. Pour zot, nou linite kot Memoryal i en zoli keksoz.

8. Ki mesaz Zeova ti donn Ezekyel?

⁸ Konman pep Zeova, nou pa sirprann ki nou ini dan sa fason. Dan sa mesaz ki Zeova ti donn Ezekyel, i ti predir ki sa linite ti pou arive. I ti demann Ezekyel pour pran de morso dibwa, enn “pour Zida” e enn “pour Zozef” e pour koste sa de morso dibwa ansanm pour ki zot zwenn e vin en sel. (Lir Ezekyel 37:15-17.) Sa lartik “Kestyon lekter” ki ti ganny pibliye dan Latour Veyer Zilyet 2016 ti eksplike: “Zeova ti servi profet Ezekyel pour predir ki pep Bondye ti pou retourn dan Later Promiz e zot ti pou ini konman en sel nasyon. Sa profesi ti osi predir ki bann ki ador Bondye ti pou ini konman en sel pep dan bann dernyen zour.”

9. Tou le-z-an kot Memoryal, ki mannyer nou vwar sa linite ki ti’n ganny predir dan profesi Ezekyel?

⁹ Apartir 1919, Zeova ti konmans par gradyelman reorganiz e inifye bann Kretyen swazir ankor enn fwa. Sa morso dibwa “pour Zida” pe refer avek zot. Apre sa, plis dimoun ki ti annan lespwar pour viv pour touzour lo later, ti konmans zwenn bann Kretyen swazir. Sa morso dibwa “pour Zozef” pe refer avek sa  bann ki annan lespwar pour viv lo later. Zeova ti promet pour koste sa de morso dibwa ansanm e fer zot “form en sel morso dibwa” dan son lanmen. (Ezekyel 37:19) I ti fer bann Kretyen swazir ek “lezot mouton” vin “en sel troupo.” (Zan 10:16; Zekarya 8:23) Ozordi, tou le de group i ini e zot servi Zeova ansanm. Zot annan en Lerwa, Zezi Kri. Dan profesi Ezekyel sa lerwa i ganny apele “serviter David” ki pe servi Bondye. (Ezekyel 37:24, 25) Tou le-z-an kot Memoryal ler nou zwenn ansanm pour rapel lanmor Zezi, nou vwar linite sa de group parey i ti’n ganny predir atraver Ezekyel. Me ki sakenn ant nou i kapab fer pour gard e promot linite parmi pep Bondye?

10. Ki mannyer nou kapab promot linite parmi pep Bondye?

¹⁰ Ki sa premye fason ki nou kapab promot linite parmi pep Bondye? Nou bezwen travay dir pour devlop limilite. Ler Zezi ti lo later, i ti dir son bann disip ki zot bezwen abes zot lekor, setadir annan limilite. (Matye 23:12) Souvandfwa dimoun dan lemonn i konsider zot konman pli siperyer ki lezot. Me si nou annan limilite, nou pou annan respe pour bann frer ki pe diriz kongregasyon e nou pou obei zot lenstriksyon. Sa i sa sel fason ki kongregasyon i kapab ini. Pli enportan ankor, si nou kontinyen  demontre limilite, Bondye pou kontan, parski i “opoz bann ki arogan me i demontre son labonte ekstraordiner anver bann ki annan limilite.”​—1 Pyer 5:5.

11. Ler nou mazin lo sa dipen ek diven ki ganny servi kot Memoryal, ki mannyer sa i ed nou pour promot linite?

¹¹ Ki sa dezyenm fason ki nou kapab promot linite? Nou bezwen mazin seryezman lo sa ki sa dipen ek diven i vreman vedir. Nou devret fer sa avan Memoryal e sirtou sa zour swar. (1 Korentyen 11:23-25) Sa dipen san lelven i reprezant lekor parfe Zezi ki i ti donnen konman en sakrifis. Sa diven rouz i reprezant son disan. Me nou bezwen fer plis ki zis konpran sa bann lenformasyon de baz. Nou bezwen rapel ki sakrifis Zezi ti enplik sa de pli gran akt lanmour. Premyerman, Zeova ti donn son Garson pour nou e dezyenmman, Zezi ti volonterman donn son lavi pour nou. Ler nou reflesi lo zot lanmour, sa pou pous nou pour kontan zot. Alor sa lanmour ki nou tou nou annan pour Zeova pou ranforsi nou linite.

12. Dan sa zistwar lo sa lerwa ek son bann lesklav, ki mannyer Zezi ti fer resorti ki Zeova i oule ki nou pardonn lezot?

¹² Ki sa trwazyenm fason ki nou kapab promot linite? Nou bezwen pardonn lezot volonterman. Ler nou fer sa, nou montre ki nou rekonesan ki Zeova i kapab pardonn nou bann pese gras a sakrifis Zezi. Pour montre akoz i enportan pour pardonnen, Zezi ti rakont en zistwar konsernan en lerwa ek son bann lesklav. Silvouple lir Matye 18:23-34 e demann ou lekor: ‘Eski mon anvi fer sa ki Zezi ti ansennyen? Eski mon annan pasyans e konpran mon bann frer ek ser? Eski mon pare pour pardonn bann ki’n ofans mwan?’ I vre ki serten pese i pli grav ki lezot e ki konman bann imen enparfe serten pese i kapab vreman difisil pour nou pardonnen. Me zistwar Zezi i montre nou sa ki Zeova i anvi nou fer. (Lir Matye 18:35.) Zezi i fer resorti ki Zeova pa pou pardonn nou si nou pa pardonn nou bann frer ek ser ler zot repantir senserman. Sirman, sa i en keksoz ki nou bezwen byen mazin lo la. Pour protez e gard nou linite ki annan bokou valer, nou bezwen pardonn lezot parey Zezi ti demann nou pour fer.

13. Ki mannyer nou promot linite ler nou gard lape avek lezot?

¹³ Ler nou pardonn lezot, nou gard lape avek nou bann frer ek ser. Zapot Pol ti dir ki nou devret travay dir pour reste ini avek kanmarad e pour annan lape. (Efezyen 4:3) Alor dan letan Memoryal e sirtou sa zour swar, mazin seryezman lo lafason ki ou tret lezot. Demann ou lekor: ‘Eski bann ki konn mwan i kapab vwar ki mon pa reste ankoler avek bann dimoun ki ofans mwan? Eski bann dimoun i kapab vwar ki mon fer bokou zefor pour fer lape e promot linite?’ Sa i bann kestyon serye ki nou bezwen mazin lo la.

14. Ki mannyer nou kapab montre ki nou pe “siport kanmarad avek lanmour”?

¹⁴ Ki sa katriyenm fason ki nou kapab promot linite? Nou bezwen imit Zeova e demontre lanmour. (1 Zan 4:8) Nou pa ti pou zanmen dir, “Petet mon oblize kontan mon bann frer ek ser, me mon pa oblize byen avek zot.” Si nou mazin  koumsa, nou pa pe swiv sa konsey ki Pol ti donnen pour “siport kanmarad avek lanmour.” (Efezyen 4:2) Remarke ki Pol pa ti zis dir ki nou devret “siport kanmarad,” me ki nou devret fer li “avek lanmour.” I annan en diferans. I annan diferan kalite dimoun dan nou kongregasyon e Zeova in atir zot tou ver li. (Zan 6:44) Alor i bezwen vwar bokou bon rezon pour kontan zot. Si nou bann frer ek ser i merit lanmour Bondye, ki mannyer nou kapab dir ki zot pa merit nou lanmour? Nou devret vreman anvi kontan zot dan sa fason ki Zeova i anvi nou fer li.​—1 Zan 4:20, 21.

15. Ki mannyer nou konnen ki i pou annan en dernyen Memoryal?

¹⁵ En zour, nou pou asiste Memoryal pour la dernyen fwa. Ki mannyer nou konn sa? Pol ti dir bann Kretyen swazir ki ler zot rapel lanmor Zezi sak lannen, zot “pe kontinyen anons lanmor Senyer ziska ki i vini.” (1 Korentyen 11:26) Zezi ti osi koz lo ler i “vini” dan son profesi konsernan letan lafen. Ler i ti pe koz lo gran ladetres ki pros pour vini, i ti dir: “Siny Garson zonm pou aparet dan lesyel e tou tribi lo later pou tap zot lestoman dan sagrinasyon e zot pou vwar Garson zonm pe vini lo nyaz dan lesyel avek gran laglwar ek pwisans. I pou anvoy son bann lanz, i pou annan en gro tapaz tronpet e zot pou rasanble sa bann ki’n ganny swazir pour li, sorti dan kat kwen lemonn, depi en kote lesyel ziska lot kote lesyel.” (Matye 24:29-31) Zezi pou “rasanble sa bann ki’n ganny swazir pour li” ler i anmenn tou bann Kretyen swazir ki ankor lo later dan lesyel. Sa pou ariv apre ki gran ladetres in konmanse me avan lager Armagedon. Dan sa lager, Zezi ansanm avek tou sa 144,000 Kretyen swazir, pou lager kont bann lerwa later e zot pou ranport laviktwar. (Revelasyon 17:12-14) Sa dernyen Memoryal ki nou pou asiste avan ki Zezi i “vini” pour rasanble bann Kretyen swazir, i pou sa enn dernyen.

16. Akoz ou determinen pour asiste Memoryal sa lannen?

¹⁶ Ou devret determinen pour asiste Memoryal le 31 Mars 2018. Demann Zeova pour ed ou fer ou par pour ki nou tou konman son pep nou kapab reste ini. (Lir Psonm 133:1.) En zour, nou pou al Memoryal pour la dernyen fwa. Ziska ki sa zour i arive, annou montre ki sa linite ki nou annan tou le-z-an kot Memoryal i en keksoz vreman presye pour nou.