Aduna bay “Makabulag Kanato Gikan sa Gugma sa Diyos”?
Pakigsuod sa Diyos
Aduna bay “Makabulag Kanato Gikan sa Gugma sa Diyos”?
KITANG tanan nanginahanglan sa gugma sa uban. Gani, malipay gayod kita kon higugmaon kita sa atong pamilya ug mga higala. Apan ikasubo nga ang mga relasyon sa tawo huyang kaayo ug daling mausab. Mahimo kitang pasakitan, biyaan, o isalikway sa atong mga minahal. Apan, adunay usa ka persona kansang gugma wala gayoy pagkausab. Nindot kaayo ang pagbatbat sa gugma ni Jehova diha sa Roma 8:38, 39.
“Kombinsido ako,” matod ni apostol Pablo. Kombinsido sa unsa? Nga wala gayoy “makabulag kanato gikan sa gugma sa Diyos.” Si Pablo wala lamang maghisgot alang sa iyang kaugalingon kondili alang usab “kanato”—nga mao, sa tanang maunongong mga alagad sa Diyos. Sa pagpasiugda niini, si Pablo naghisgot ug mga butang nga dili arang makapugong sa gugma ni Jehova alang sa iyang matinumanong mga alagad.
“Dili ang kamatayon ni kinabuhi.” Ang gugma ni Jehova sa iyang katawhan dili mahanaw dihang sila mamatay. Ingong pamatuod sa iyang gugma, ang Diyos nagtipig kanila diha sa iyang panumdoman, ug iya silang banhawon sa umaabot nga matarong nga bag-ong kalibotan. (Juan 5:28, 29; Pinadayag 21:3, 4) Sa pagkakaron, ang gugma sa Diyos alang sa iyang maunongong mga magsisimba dili gayod mausab bisag unsa pay mahitabo kanila niining sistemaha sa mga butang.
“Ni mga manulonda ni mga kagamhanan.” Ang mga tawo daling maimpluwensiyahan niadtong anaa sa awtoridad, apan si Jehova dili gayod maimpluwensiyahan sa uban. Ang gamhanan nga espirituhanong mga linalang, sama sa manulonda nga nahimong si Satanas, dili makapahunong sa Diyos sa paghigugma sa iyang mga magsisimba. (Pinadayag 12:10) Bisan ang mga kagamhanan, nga basin nagsupak sa tinuod nga mga Kristohanon, dili makapausab sa panglantaw sa Diyos sa iyang mga alagad.—1 Corinto 4:13.
“Ni mga butang nga ania karon ni mga butang nga moabot.” Ang gugma sa Diyos dili molubad sa paglabay sa panahon. Walay panghitabo karon ug sa umaabot ang makapahunong sa Diyos sa paghigugma sa iyang mga alagad.
“Ni mga gahom.” Si Pablo naghisgot na sa mga puwersa sa langit ug sa yuta—“mga manulonda” ug “mga kagamhanan”—apan siya naghisgot karon ug “mga gahom.” Ang Gregong pulong nga gigamit dinhi adunay daghang kahulogan. Bisag unsa pay kahulogan niana, usa ka butang ang segurado: Walay gahom sa langit ug sa yuta ang makapugong kang Jehova sa paghigugma sa iyang katawhan.
“Ni gihabogon ni giladmon.” Si Jehova nahigugma sa iyang katawhan bisag unsa pay ilang kahimtang—lisod man kana o dili.
“Ni bisan unsang ubang linalang.” Pinaagi niining mga pulonga, nga naglakip sa tanang kalalangan, si Pablo nag-ingon nga wala gayoy makabulag sa maunongong mga magsisimba ni Jehova gikan sa iyang gugma.
Dili sama sa gugma sa tawo, nga mahimong mausab o molubad, ang gugma sa Diyos alang sa tanang nanaglaom ug nanagtuo kaniya wala gayoy pagkausab; kini magpabilin hangtod sa kahangtoran. Ang pagkahibalo niini mopalihok gayod kanato sa pagpakigsuod pa kang Jehova ug sa paghimo sa atong maarangan sa pagpamatuod sa atong gugma alang kaniya.