Himoang Mas Makalingaw ug Mapuslanon ang Imong Pagtuon

Unsay atong himoon aron mas makalingaw ug mapuslanon ang pagtuon sa Bibliya? Hisgotan nato sa mubo ang tulo ka hinungdanong lakang nga motabang nato aron bug-os makabenepisyo sa atong personal nga pagtuon.

1 PAG-AMPO: Kini ang unang lakang. (Sal. 42:8) Ngano? Ang pagtuon sa Pulong sa Diyos maoy bahin sa atong pagsimba. Busa angayng hangyoon nato si Jehova nga hatagan kitag hustong tinamdan sa hunahuna ug balaang espiritu. (Luc. 11:13) Si Barbara, nga dugay nang misyonarya, miingon: “Mag-ampo ko kanunay sa dili pa magbasa o magtuon sa Bibliya. Human niana, akong bation nga kauban nako si Jehova ug giuyonan niya ang akong ginahimo.” Ang pag-ampo una magtuon magbukas sa atong hunahuna ug kasingkasing nga bug-os dawaton ang espirituwal nga pagkaon.

2 PAGPAMALANDONG: Kay kulag panahon, ang pipila igo na lang mobasa sa Pulong sa Diyos. Apan nasayloan nila ang mga benepisyo sa pagtuon sa Bibliya. Si Carlos, nga kapig 50 ka tuig nang nag-alagad, nakaamgo sa kahinungdanon sa paggahig panahon sa pagpamalandong aron mahimong mas mapuslanon ang iyang pagtuon. Siya miingon: “Karon, mga duha ka panid na lang sa Bibliya ang akong ginabasa kada adlaw. Busa makagahin kog mas dakong panahon sa pagpamalandong sa akong gibasa aron makakat-on sa hinungdanong mga leksiyon.” (Sal. 77:12) Kon kita mamalandong, mouswag ang atong kahibalo ug pagsabot sa kabubut-on sa Diyos.—Col. 1:9-11.

3 PAGPADAPAT: Kon atong makita ang bili sa usa ka kalihokan, mas makabenepisyo kita niini. Tinuod usab kana sa pagtuon sa Bibliya. “Ang pagtuon nakatabang nako sa pagsagubang sa mga problema matag adlaw ug nagpaarang nako sa pagtabang sa uban,” matod ni Gabriel, usa ka batan-ong brader nga regular nga nagtuon sa Bibliya. Siya midugang: “Naningkamot ko sa pagpadapat sa tanan kong nakat-onan.” (Deut. 11:18; Jos. 1:8) Oo, dunay dagayang kahibalo gikan sa Diyos nga atong makat-onan ug ikapadapat.—Prov. 2:1-5.

REPASO: Pagkadakong pribilehiyo nga makapanukiduki sa kahibalo nga gitagana ni Jehova, ang Tinubdan sa tanang kaalam! (Roma 11:33) Busa sa sunod nimong pagtuon, paneguroa nga moampo ka una kang Jehova ug hangyoa siya nga hatagan kag hustong tinamdan sa hunahuna ug balaang espiritu. Dayon hunong sa popanahon aron palandongon ang imong gibasa. Dugang pa, ipadapat ang imong nakat-onan sa matag adlaw nimong pagkinabuhi. Kon imong himoon kining hinungdanong mga lakang, mahimong mas makalingaw ug mapuslanon ang imong pagtuon sa Bibliya.