“Unsaon Man Nako Pagsangyaw?”

Sa tibuok kalibotan, duna kitay talagsaong mga ehemplo sa mga igsoon nga masibotong nagsangyaw bisag may grabeng mga sakit. Usa kanila si Dalia kinsa nagpuyo sa Vilnius, ang kaulohan sa Lithuania.

Mga 35 anyos si Dalia. Sukad sa pagkahimugso, siya may sakit nga cerebral apoplexy. Siya naparalisar ug naapektohan ang iyang paglitok. Busa pamilya lang niya ang makasabot sa iyang sinultihan. Siya nagpuyo uban sa iyang inahan, si Galina, nga maoy nag-atiman niya. Bisag puno sa kalisod ug kabalaka ang kinabuhi ni Dalia, siya positibo gihapon. Ngano?

Si Galina miingon: “Niadtong 1999, giduaw mi sa akong ig-agaw nga si Apolonija kinsa usa ka Saksi ni Jehova. Among namatikdan nga sinati kaayo siya sa Bibliya, ug si Dalia daghan kaayog pangutana kaniya. Wala madugay, si Dalia nasugdan ug pagtuon sa Bibliya. Usahay moapil ko aron ipatin-aw ang gisulti ni Dalia. Hinuon akong nakita nga nakabenepisyo siya sa iyang nakat-onan. Busa nagpa-Bible study pod ko.”

Samtang nasabtan ni Dalia ang mga kamatuoran sa Bibliya, dunay pangutana nga nakahasol kaayo niya. Sa kataposan, iyang gipangutana si Apolonija: “Unsaon man nako pagsangyaw nga paralisado man ko?” (Mat. 28:19, 20) Gidasig ni Apolonija si Dalia: “Ayawg kahadlok. Tabangan ka ni Jehova.” Ug tinuod gayod kana.

Busa sa unsang paagi nakasangyaw si Dalia? Sa daghang paagi. Tabangan siya sa mga sister sa pag-andam ug mga sulat nga may mensahe sa Bibliya. Una, isulti ni Dalia sa mga sister ang iyang hunahuna. Dayon gam-an nila kinig sulat. Si Dalia mosangyaw sab pinaagig text gamit ang iyang cellphone. Ug kon maayo ang panahon, dad-on siya sa mga igsoon sa parke o sa kadalanan aron makasangyaw.

Si Dalia ug ang iyang inahan padayong miuswag sa espirituwal. Sila nagpahinungod kang Jehova ug nabawtismohan niadtong Nobyembre 2004. Sa Septiyembre 2008, usa ka grupo nga nagsultig Polish ang naporma sa Vilnius. Kay gamay ra ang mga magmamantala, si Dalia ug ang iyang inahan mibalhin didto. Si Dalia miingon: “May mga bulan nga nabalaka ko kay wala pa ko kasangyaw. Pero human nakog ampo kang Jehova, duna dayoy makigsabot nako sa paggawas sa kanataran.” Unsa kahay gibati sa atong minahal nga igsoon sa iyang kahimtang? Siya miingon: “Ang akong sakit nakaparalisar sa akong lawas, pero wala kini makaparalisar sa akong hunahuna. Malipayon kaayo ko nga makasangyaw sa uban bahin kang Jehova!”