“WALA gayoy nahibalo sa eksaktong petsa kon kanus-a natawo si Kristo,” matod sa Encyclopedia of Early Christianity. Bisan pa niana, milyon-milyong nag-angkong Kristohanon sa tibuok kalibotan nagsaulog sa adlawng natawhan ni Jesus sa Disyembre 25. Apan kining petsaha dili makita diha sa Bibliya. Natawo ba gayod si Jesus sa Disyembre?

Bisan tuod ang Bibliya wala maghatag ug eksaktong petsa sa pagkatawo ni Jesus, kini adunay pamatuod nga wala siya matawo sa Disyembre. Dugang pa, atong masuta gikan sa ubang mga tinubdan kon nganong gipili ang Disyembre 25 ingong petsa sa iyang adlawng natawhan.

Si Jesus natawo sa siyudad sa Betlehem, sa Judea. Ang Ebanghelyo ni Lucas nag-ingon: “May mga magbalantay usab niadtong dapita nga nagpuyo sa gawas ug nagpadayon sa pagbantay sa ilang mga panon sa kahayopan sa kagabhion.” (Lucas 2:4-8) Kasagaran kining ginahimo sa mga magbalantay. Ang librong Daily Life in the Time of Jesus nag-ingon: “Sa kadaghanang bulan sa tuig, ang mga hayop sagad anaa sa kapatagan.” Apan mahitabo kaha nga tua sa gawas ang mga magbalantay uban sa ilang mga hayop sa tugnawng gabii sa Disyembre? Kini nga libro nag-ingon: “Sila magpalabay sa tingtugnaw diha sa mga balay-balay; ug bisag kini lang nga pamatuod, imposible gayod nga si Jesus natawo sa Disyembre 25 kay ang Ebanghelyo nag-ingon nga ang mga magbalantay sa karnero diha sa kapatagan.”

Gipaluyohan kini nga konklusyon sa laing detalye diha sa Ebanghelyo ni Lucas: “Niadtong mga adlawa ang usa ka mando gipagula gikan ni Cesar Agusto nga magparehistro ang tanan sa gipuy-ang yuta; (kining una nga pagrehistro nahitabo sa dihang si Quirinio mao ang gobernador sa Sirya;) ug ang tanang tawo mipanaw aron magparehistro, ang matag usa ngadto sa iyang kaugalingong siyudad.”​—Lucas 2:1-3.

Tingali kini nga pagparehistro gisugo ni Agusto aron matino ang gidaghanon sa populasyon nga gamiton may kalabotan sa buhis ug sa pagreklutag mga sundalo. Sa pagtuman sa maong sugo, si Maria, bisag hapit nang manganak, miuban sa  iyang bana nga si Jose ug mipanaw ug mga 150 kilometros gikan sa Nasaret paingon sa Betlehem. Karon hunahunaa kini. Makataronganon ba nga si Agusto​—usa ka magmamando nga halos dili mangilabot sa lokal nga pamunoan—​mosugo sa mga tawo nga naglungot-lungot sa pagrebelde sa pagbiyaheg layo, ug sa tingtugnaw pa gyod?

Sa pagkatinuod, ang kadaghanan sa mga historyano ug mga eskolar sa Bibliya wala modawat sa Disyembre 25 ingong adlawng natawhan ni Jesus. Mabasa gayod nimo kini nga impormasyon diha sa ensiklopedia. Ang Our Sunday Visitor’s Catholic Encyclopedia nag-ingon: “Ang kadaghanan nagkauyon nga si Jesus wala matawo sa Disyembre 25.”

Daghang siglo human mamatay si Jesus, gipili ang Disyembre 25 ingong petsa sa iyang adlawng natawhan. Ngano? Daghang historyano nagtuo nga ang petsang gipili nga nahimong Pasko maoy mga pista sa mga pagano.

Pananglitan, ang Encyclopædia Britannica nag-ingon: “Ang usa sa eksplinasyon sa kadaghanan bahin sa gigikanan niining petsaha mao nga ang Disyembre 25 mao ang adlaw sa pagsagop ingong Kristiyanong kasaulogan sa dies solis invicti nati (‘adlaw sa paghimugso sa dili mabuntog nga adlaw’), usa ka popular nga pista sa Imperyo sa Roma nga nagsaulog sa winter solstice ingong simbolo sa pagsubang ug balik sa adlaw, sa paghingilin sa tingtugnaw ug sa pagsugat sa pagbalik sa tingpamulak ug sa ting-init.”

Ang The Encyclopedia Americana nag-ingon: “Dili tin-aw ang katarongan kon nganong gipili ang Disyembre 25 ingong petsa sa Pasko, apan gituohan sa kadaghanan nga kining petsaha gipili sa pagtumbas sa paganong mga pista nga ginahimo panahon sa winter solstice, diin taas ug oras ang kahayag sa adlaw, sa pagsaulog sa ‘pagsubang ug balik sa adlaw.’ . . . Saulogon usab niining panahona ang Saturnalia sa Roma (usa ka pista nga gipahinungod kang Saturn, ang diyos sa agrikultura, ug sa napasig-uling puwersa sa adlaw).” Panahon niining mga pistaha ang mga tawo makighilawas ug magpatuyag hudyaka ug bahakhak. Makaiikag, ingon usab niana ang kahimtang sa daghang kasaulogan sa Pasko karon.

Ang uban nagtuo nga bisag unsa pa ang aktuwal nga petsa, kinahanglan gayod nga saulogon sa mga Kristiyano ang adlawng natawhan ni Jesus. Para nila kini maoy tukmang paagi sa pagpasidungog kang Kristo, kon saulogon sa matinahorong paagi.

Ang pagkatawo ni Jesus maoy hinungdanon gayod nga okasyon diha sa Bibliya. Kini nag-ingon nga sa dihang natawo si Jesus, panon-panon sa mga manulonda kalit nga mitungha ug malipayong nanagdayeg sa Diyos, nga nag-ingon: “Himaya sa Diyos sa kahitas-an, ug sa yuta pakigdait taliwala sa mga tawo nga iyang gikahimut-an.” (Lucas 2:13, 14) Apan makaiikag nga ang Bibliya wala gayod magpasumbingay bisag gamay nga kinahanglang saulogon ang adlawng natawhan ni Jesus. Sa kasukwahi, dunay espesipikong sugo sa paghandom sa iyang kamatayon, nga ginahimo sa mga Saksi ni Jehova kas-a sa usa ka tuig. (Lucas 22:19) Kana maoy usa ka paagi sa pagpasidungog kang Jesus.

Sa kataposang gabii ni Jesus ingong tawo, siya miingon: “Kamo akong mga higala kon inyong buhaton ang ginasugo ko kaninyo.” (Juan 15:14) Siya miingon usab: “Kon kamo nahigugma kanako, pagasundon ninyo ang akong mga sugo.” (Juan 14:15) Tin-aw nga wala nay mas maayong paagi sa pagpasidungog kang Jesu-Kristo kay sa pagkat-on bahin sa iyang mga pagtulon-an ug pagsunod niana.