Sa Dihang ang Imong Masuso Dili Mohunong sa Paghilak

TINAMPO SA MAGSUSULAT SA PAGMATA! SA CANADA

GIKOMPIRMAR sa doktor ang gidudahan sa inahan. Ang iyang masuso dunay kasagarang butod sa tiyan. Makaapektar kining sakita sa “usa sa upat ka bata,” nag-ingon ang mantalaang Globe and Mail sa Canada. Ang mga simtoma sa butod sa tiyan naglakip sa daghang oras nga paghilak sulod sa labing menos tulo ka adlaw sa usa ka semana. Unsay mahimo sa usa ka nabalaka nga ginikanan? Ang mga pediatrician, o mga doktor sa mga bata, nag-ingon nga sa daghang kahimtang ang mga ginikanan​—ug ang anak​—maghulat na lamang kon kanus-a maayo ang pagsuol. Apan hangtod kanus-a sila maghulat?

Usa ka di pa dugayng pagtuon sa Canada bahin sa mga inahan nga may mga masuso nga butdanon nagbutyag nga kapin sa 85 porsiyento sa mga kahimtang sa pagbutod sa tiyan maulian sa dihang magtulo na ka bulan ang mga masuso. Ang panukiduki nga gipangunahan ni Dr. Tammy Clifford, direktor sa epidemiolohiya sa Children’s Hospital of Eastern Ontario Research Institute, nagbutyag usab nga ang pagbaton ug masuso nga butdanon dili makapahinabog dumalayong epekto sa maayong pangisip sa inahan. “Unom ka bulan human sa pagpanganak, sila sama ra gayod sa mga Inahan nga walay mga masuso nga butdanon,” matod ni Dr. Clifford. “Malimtan ra nila ang tanan inighunong sa paghilak.”

Kining bag-ong panukiduki nga gipatik ni Dr. Clifford ug sa iyang mga kauban, nag-ingon ang Globe, “nakatampo ug hinungdanong mga detalye sa siyentipikanhong kahibalo bahin sa butod sa tiyan kay kini nagpakita nga dunay tulo ka lahing matang sa mga masuso nga butdanon: kadtong ang pagsuol motungha ug mohunong bisan kanus-a sulod sa tulo ka bulan; kadtong magpadayon ang butod sa tiyan nga molungtad sa daghang bulan nga dili mohunong; ug ang gamayng grupo nga makaugmad ug butod sa tiyan nga medyo ulahi na, mga pipila ka bulan human mahimugso.” Ginahimo ang laing pagtuon aron sa pagsusi sa kaugmaran sa mga bata nga butdanon samtang sila magtubo, ug ang ulahing grupo mao ang ilabinang makapaikag.

Ang walay-hunong nga paghilak gituohan nga maoy usa ka hinungdan sa mga kaso sa sobrang pagyugyog sa mga bata. Sumala sa gitaho sa Globe, “ang yanong paghilak dili makadaot sa bata, kondili ang kusog kaayong pagyugyog sa bata, bisan sa makadiyot lamang, makapahinabog dumalayong kadaot sa utok, ug kamatayon pa gani.”

Sa laing bahin, mahimong dunay bentaha ang paghilak sa masuso, bisan kon kini walay hunong. “Ang panukiduki nagpakita nga ang mga masuso nga magsigeg hilak sa pagkatinuod makakuhag dugang pagtagad gikan sa ilang mga tig-atiman,” nag-ingon ang Globe, uban ang “dugang paggunit, pagpahiyom, pagpakig-estorya ug dugang pagkugos.”