Ang Kinaunhan Usa ka Gatos ka Tuig Kanhi

Ang legal nga karta sa Watch Tower Bible and Tract Society opisyal nga narehistro sa Pennsylvania, T.B.A., sa Disyembre 15, 1884. * Natukod didto ang hedkuwarter niining maong sosyedad. Sa ulahi, sa Abril 23, 1900, ang propiedad alang sa unang sangang buhatan nabatonan sa London, Inglaterra. Kadto nahimutang sa 131 Gipsy Lane, Forest Gate, sa East London, ingon sa gipakita dinhi.

SA NATUKOD kadtong unang sangang buhatan usa ka gatos ka tuig kanhi, ang Inglaterra may katibuk-ang gidaghanon nga 138 ka Estudyante sa Bibliya, sumala sa pagtawag kaniadto sa mga Saksi ni Jehova. Duha ka tuig sa ulahi, sa 1902, ang ikaduhang sangang buhatan nabuksan, sa Alemanya; ug sa pagka-1904, ang dugang nga mga sangang buhatan natukod sa Australia ug Switzerland.

Sa 1918, ang tuig nga natapos ang Gubat sa Kalibotan I, may 3,868 ka Estudyante sa Bibliya nga nagtaho sa kalihokang pagsangyaw sa tibuok kalibotan. Sa misunod nga tuig ang ikalimang sangang buhatan sa Watch Tower Society nabuksan​—kana maoy didto sa Canada. Unya, samtang nagkakusog ang pagmantala sa mensahe sa Bibliya, naporma ang bag-ong mga sangang buhatan sa daghang nagkalainlaing mga nasod, unom sa 1921 lamang.

Pagka-1931, sa gisagop sa mga Estudyante sa Bibliya ang binase-sa-Bibliya nga ngalang mga Saksi ni Jehova, may 40 ka sangang buhatan sa tibuok kalibotan. (Isaias 43:​10-12) Sulod sa misunod nga tulo ka tuig, ang gidaghanon miuswag ngadto sa 49! Pagka-1938 may kinatas-ang ihap nga 59,047 ka Saksi nga nagsangyaw sa 52 ka nasod, apan nagsugod na niadto ang mabangis nga pagsupak nga naghulga sa ilang Kristohanong buluhaton sa daghang dapit.

Sa pagkaylap sa politikanhong totalitaryanismo ug pagkadiktador sa sunodsunod nga nasod ug sa pagsilaob sa Gubat sa Kalibotan II sa Septiyembre 1939, ang mga sangang buhatan sa mga Saksi ni Jehova gisirhan sa sunodsunod nga mga nasod. Pagka-1942, 25 na lang ang naglihok. Katingad-an, hinunoa, sulod nianang labing malaglagong gubat sa kasaysayan sa tawo, ang mga Saksi ni Jehova nagpabiling aktibo sa tibuok kalibotan ug nagpahimulos sa usa sa ilang labing dagkong mga pag-uswag sa modernong kasaysayan.

Samtang nagkatapos gani ang Gubat sa Kalibotan II niadtong 1945​—ug ang daghang  bahin sa kalibotan nangagun-ob​—ang mga sangang buhatan sa mga Saksi nabuksan na usab ug natukod ang mga bag-o. Pagka-1946 may 57 sa tibuok kalibotan. Ug pila ba ang aktibong mga Saksi niadtong panahona? May kinatas-ang ihap nga 176,456! Kadto halos tulo ka pilo nga gidaghanon kay sa 1938!

Kon sa Unsang Paagi Midako ang Unang mga Sangang Buhatan

Sa 1911 ang unang sangang buhatan sa Watch Tower Society, sa London, Inglaterra, gibalhin ngadto sa 34 Craven Terrace, diin ang mas dakong luna alang sa opisina ug puy-anan nabatonan. Unya sa Abril 26, 1959, gipahinungod ang bag-ong mga pasilidad sa sangang buhatan sa Mill Hill, London. Sa ulahi ang mga dapit puy-anan gipadak-an, ug sa kataposan (sa 1993) ang 18,500-metro-kuwadrado nga mga tinukod para sa imprenta ug administrasyon sa duol gipahinungod. Dinhi kapig 90 ka milyong kopya sa The Watchtower ug Awake! ang gigama kada tuig diha sa 23 ka pinulongan.

Ang pagpadako sa ikaduhang sangang buhatan sa Sosyedad mas talagsaon. Sa 1923 ang sangang buhatan sa Alemanya gibalhin ngadto sa Magdeburg. Ang The Watchtower sa Hulyo 15, 1923, mao ang unang naimprenta sa kaugalingong imprentahan sa Sosyedad didto. Sa misunod nga pipila ka tuig, napalit ang tapad nga lote, nadugangan ang mga tinukod, ug nabatonan ang gamit sa pagtagkos ug libro ug ang dugang nga mga makina sa imprenta. Sa 1933 ang sangang buhatan giilog sa mga Nazi, ang mga Saksi gidili ug, sa ngadtongadto, duha ka libo kanila gibalhog sa mga kampong konsentrasyon.

Sa pagkatapos sa Gubat sa Kalibotan II sa 1945, ang propiedad sa Magdeburg, nga kaniadto bahin sa Silangang Alemanya, giuli ug ang sangang buhatan natukod pag-usab. Apan sa Agosto 30, 1950, ang Komunistang kapolisan nagronda sa pasilidad ug nagdakop sa mga trabahante, ug ang mga Saksi sa Silangang Alemanya gidili. Kasamtangan, sa 1947 may napalit nga lote sa Wiesbaden, Kasadpang Alemanya. Sa misunod nga mga dekada, ang mga tinukod sa sangang buhatan nga gitukod didto subsob nga gipadak-an aron makanunot sa mga panginahanglan sa literatura.

Tungod kay wala nay dugang luna aron padak-an ang Wiesbaden, mga 30 ektarya ang gipalit duol sa Selters sa 1979. Human sa mga lima  ka tuig nga pagpanukod, ang usa ka dakong sangang buhatan napahinungod sa Abril 21, 1984. Kini gipadak-an sukad niadto, mao nga kini kapuy-ag kapin sa libong trabahante sa sangang buhatan. Kada bulan kapig 16 ka milyong magasin diha sa kapig 30 ka pinulongan ang mapatik sa dagko kaayong offset nga mga makina sa imprenta sa Selters; ug sa tuig nga di pa dugay, kapig 18 ka milyong libro, lakip sa mga Bibliya, ang nagama sa gamit sa pagtagkos ug libro.

Ubang Dagkong mga Sangang Buhatan nga Tig-imprenta

Ang sangang buhatan unang natukod sa Kobe, Hapon, sa 1927, apan ang grabeng paglutos sa mga Saksi panahon sa Gubat sa Kalibotan II nakapakunhod sa ilang kalihokan. Hinunoa, human sa gubat ang sangang buhatan gitukod pag-usab, sa Tokyo. Sa dihang wala nay dugang luna alang sa pagpadako didto, gitukod ang usa ka bag-ong sangang buhatan sa Numazu. Gipahinungod kadto sa 1973. Sa dihang ang maong mga pasilidad dali rang naghuot, ang dagko nga bag-ong mga tinukod gipatindog sa Ebina, ug kini gipahinungod sa 1982. Ang gipadak-ang mga pasilidad niining dapita, nga kapuy-an ug 900 ka trabahante, bag-o pang nahuman. Sa Hapones nga pinulongan lamang, kapig 94 ka milyong kopya sa Ang Bantayanang Torre ug Pagmata! ang gipatik sa 1999, ingon man milyonmilyong libro.

Ang pagpadako sa mga pasilidad sa sangang buhatan susama sa sunodsunod nga nasod. Ang usa ka sangang buhatan natukod sa Mexico City, Mexico, sa 1929. Unya, sa dihang ang gidaghanon sa mga Saksi nakaabot ug 60,000, ang usa ka luag nga bag-ong pasilidad natukod sa gawas sa siyudad. Gipahinungod kadto sa 1974, ug ang mga gidugang niana nahuman sa 1985 ug 1989. Ang usa ka dakong bag-ong pasilidad alang sa imprenta ug dugang nga mga puy-anan sa pagkakaron hapit nang mahuman. Ingong resulta, ang sangang buhatan sa Mexico sa dili madugay makapapuyo nag 1,200 ka trabahante. Ang sangang buhatan nagatagana nag mga magasin ug mga libro alang sa kapig 500,000 ka Saksi ug sa milyonmilyong ubang tawo sa Mexico ingon man alang sa mga tawong nagpuyo sa kanait nga mga nasod.

Niadtong 1923 ang usa ka sangang buhatan naorganisar sa Rio de Janeiro, Brazil, ug sa ulahi ang nindot nga bag-ong mga puy-anan gitukod didto. Apan sanglit ang São Paulo mao ang sentro sa negosyo ug transportasyon sa Brazil, sa 1968 gitukod ang usa ka bag-ong sangang buhatan nianang siyudara. Pagkatungatunga sa katuigang 1970, may mga 100,000 ka Saksi sa Brazil. Bisan pa niana, imposible ang dugang nga pagpadako sa São Paulo, mao nga 115-ektaryang yuta ang gipalit sa Cesário Lange, mga 150 kilometros sa gawas sa São Paulo. Sa Marso 21, 1981, ang mga pasilidad sa sangang buhatan sa maong bag-ong dapit gipahinungod. Ingong resulta sa pagpadako nianang dapita, ang sangang buhatan kapuy-ag 1,200 ka tawo. Ang mga magasin ug mga libro gigama sa Brazil alang sa kinadak-ang bahin sa Amerika del Sur ingon man alang sa ubang mga bahin sa kalibotan.

Ang laing sangang buhatan nga tig-imprenta nahuman sa sayong bahin sa 1990, duol sa Bogotá, Colombia. Didto ang mga magasing Bantayanang Torre ug Pagmata! gigama aron iapod-apod sa tibuok amihanan-kasadpang Amerika del Sur.

Ang ubang mga sangang buhatan nga tig-imprenta sa milyonmilyong magasin matag tuig anaa sa Argentina, Australia, Canada, Espanya, Habagatang Aprika, Italya, Korea, Nigeria, Pilipinas, ug Pinlandia. Ang sangang buhatan sa Italya usab mogamag milyonmilyong libro, lakip sa mga Bibliya, kada tuig diha sa daghang pinulongan. Siyempre, kadaghanan sa tinuig nga produksiyon, nga mokabat sa kapig 40 ka milyong libro ug kapin sa usa ka bilyong magasin, ginahimo gihapon sa hedkuwarter sa Watch Tower Bible and Tract Society sa Brooklyn, New York, ingon man sa imprentahan niini sa ilaya sa New York.

Sa pagkatinuod, katingalahan nga ang gidaghanon sa mga sangang buhatan mitubo gikan sa usa sa usa ka gatos ka tuig kanhi ngadto sa 109 karong adlawa nga nagtagana sa mga panginahanglan sa mga Saksi ni Jehova sa 234 ka nasod. Ug hunahunaa nga kini gialagaran sa mga 13,000 ka dedikadong Kristohanong mga boluntaryo! Segurado gayod, kining buluhatona uban sa iya sa mga 5,500 ka boluntaryo nga kaanib sa hedkuwarter sa Sosyedad maoy bililhon sa katumanan sa tagna ni Jesu-Kristo nga ‘kining maayong balita sa Gingharian sa Diyos igawali sa tibuok gipuy-ang yuta sa dili pa moabot ang kataposan.’​—Mateo 24:14.

[Footnote]

[Hulagway sa panid 17]

Si Tom Hart, gituohan nga mao ang unang Estudyante sa Bibliya sa Inglaterra

[Mga hulagway sa panid 18]

Sangang buhatan sa London sa 34 Craven Terrace (sa letrato sa tuo)

[Mga hulagway sa panid 18]

Mga pasilidad nga gigamit sa pagkakaron sa London