DUL-AN sa duha ka bulan human sa ilang pagbiya sa Ehipto, ang mga Israelita nakaabot sa Bukid sa Sinai, nga gitawag usab ug Horeb. Kini mao ang samang dapit diin si Jehova nagsulti kang Moises gikan sa nagdilaab nga kupongkupong. Ang katawhan mikampo dinhi sa makadiyot.

Si Moises mitungas sa bukid nga nag-inusara. Sa tumoy sa bukid, si Jehova misulti kang Moises nga gusto niya ang mga Israelita mosugot kaniya ug mahimong iyang linaing katawhan. Si Moises milugsong ug gitug-an kini sa mga Israelita. Ang katawhan nag-ingon nga mosugot sila kang Jehova tungod kay gusto sila nga mahimong iyang katawhan.

Si Jehova karon naghimo sa tumoy sa bukid nga moaso, ug nagpahinabo sa makusog dalugdog. Misulti usab siya sa katawhan: ‘Ako mao si Jehova nga inyong Diyos kinsa nagkuha kaninyo gikan sa Ehipto.’ Unya siya misugo: ‘Dili kamo magsimba sa bisan unsang Diyos gawas kanako.’

Ang Diyos mihatag sa mga Israelita ug dugang siyam ka kasugoan, o mga balaod. Ang katawhan nangalisang. Ilang gituganan si Moises: ‘Ikaw ang mosulti kanamo, tungod kay kami nahadlok nga kon ang Diyos maoy mosulti kanamo basin kami mamatay.’

Sa ulahi, ang Diyos misulti kang Moises sa pagbalik sa bukid. Misunod si Moises ug mipabilin sa bukid sulod sa 40 ka adlaw ug 40 ka gabii.

Ang Diyos may daghang balaod sa iyang katawhan. Gisulat kini ni Moises. Ang Diyos naghatag usab kang Moises duha ka lapad nga bato. Sa ibabaw nila gisulat sa Diyos ang 10 ka balaod nga iyang nasulti sa katawhan. Kini gitawag Napulo ka Sugo.

Ang Napulo ka Sugo maoy hinungdanong mga balaod. Apan maingon man usab sa daghan ubang mga balaod nga gihatag sa Diyos sa mga Israelita. Ang usa niini: ‘Kinahanglang higugmaon mo si Jehova nga imong Diyos uban sa imong tibuok kasingkasing, sa imong tibuok hunahuna, sa imong tibuok kalag ug sa imong tibuok kusog.’ Ug ang lain: ‘Kinahanglan higugmaon mo ang imong silingan maingon sa imong kaugalingon.’ Si Jesu-Kristo misulti nga kini ang duha ka kinadak-ang mga balaod nga gihatag sa Diyos sa Israel.