Usa ka himan nga gamiton sa pagdukdok ug sa pagpadulot; usa ka pakang. Ang mga martilyo gigamit sa pagpadulot sa mga lansang (Jer 10:4) ug sa mga ugsok sa tolda (Huk 4:21), sa dihang mangubkob kini gigamit aron sa pagpikas sa mga bato pinaagi sa sublisubling pagpakang maingon man sa pagporma ug pagpahiluna sa mga bato nga gigamit sa pagpanukod (1Ha 6:7), ug sa pagporma sa metal sama sa dihang maghimog mga idolo.​—Isa 41:7; 44:12.

Ang lainlaing mga materyales nga gigamit aron himoong mga ulo sa martilyo mao ang bato, metal, ug kahoy. Lagmit nga ang martilyo, o pakang, nga gigamit ni Jael aron ipadulot ang ugsok sa tolda diha sa tampihak ni Sisera maoy ginama sa kahoy.​—Huk 4:21; 5:26.

Sa mahulagwayong diwa ang pulong ni Jehova sa paghukom gitandi sa usa ka maso nga nagadugmok sa dakong bato. (Jer 23:29) Dugang pa, diha sa kamot ni Jehova, ang Babilonya nahisamag usa ka maso, nga nagadugmok sa kanasoran ug sa mga gingharian.​—Jer 50:23; itandi ang Jer 25:​8, 9, 17-26.