I no longtaem i pas, ol lida blong wol, ol saentis mo ol man we oli wok long teknoloji, oli tokbaot se tede ol kompiuta oli naf blong mekem plante moa samting i bitim bifo (artificial intelligence). a Oli luksave se hemia i save givhan long yumi, be oli wari tu se sam man bambae oli yusum long fasin we i no stret.

•   “Save blong kompiuta i wan long ol beswan teknoloji we i save mekem laef blong man i kam gud moa . . . Be long semtaem, save blong kompiuta i mekem se i gat plante moa denja. I save afektem sefti blong yumi, ol raet blong yumi, ol praevet infomesen blong yumi mo i save mekem se man i no moa trastem gavman.”—Kamala Harris, vaes presiden blong Yunaeted Stet, 4 Mei 2023.

•   “Nating se save blong kompiuta i save givhan long wok blong ol dokta, be long semtaem i gat sam denja we i save spolem helt mo tingting blong ol man.”—Ol dokta mo ol man blong helt we Frederik Federspiel i lidim olgeta, BMJ Global Health, b 9 Mei 2023.

•   “Ol man oli save yusum ol program long kompiuta blong spredem ol rong infomesen. Mo tu, maet ol teknoloji ya i save mekem se plante man bambae oli lusum wok blong olgeta. Ol man we oli wari long saed blong teknoloji, oli fraet se long fiuja bambae ol kompiuta oli save spolem ol man.”—The New York Times, 1 Mei 2023.

 Bambae yumi mas wet nomo blong luk sipos ol man bambae oli yusum save blong kompiuta long fasin we i gud o i nogud. Be, ?Baebol i talem wanem?

?From wanem ol samting we man i wokem oli mekem yumi wari?

 Baebol i soemaot from wanem ol man oli no naf blong kontrolem ol narafala, blong oli yusum ol teknoloji long fasin we i gud oltaem.

1.  1. Nating se ol man oli gat gudfala tingting blong wokem wan samting, be maet oli no luksave ol problem we oli save kamaot biaen.

   •   “I gat wan rod i stap we man i ting se i stret nomo, be long en, hem i lidim man i go long ded.”—Ol Proveb 14:12.

2.  2. Man i no save kontrolem olsem wanem ol narafala bambae oli yusum samting we hem i wokem.

   •   “Mi mas livim olgeta samting [we mi wokem] i stap blong man we bambae i kam biaen long mi. ?Mo hu i save sipos man ya bambae i waes o i krangke? Be bambae hem i kam bos long olgeta samting blong mi we mi yusum ful paoa mo waes blong mi blong kasem aninit long san.”—Prija 2:18, 19.

 Ol samting ya oli soemaot se yumi nidim we Krieta blong yumi i lidim yumi.

Samting we yumi save trastem

 Krieta blong yumi i promes se bambae hem i neva letem ol man o ol teknoloji we man i wokem, i spolem fulwan wol ya mo ol man.

•   “Wol i stap blong olwe.”—Prija 1:4.

•   “Ol stret man bambae oli tekem wol ya i blong olgeta, mo bambae oli stap long hem blong olwe.”—Ol Sam 37:29.

 Krieta blong yumi i yusum Baebol blong givim ol advaes long yumi, we bambae i givhan long yumi blong gat pis mo stap sef long fiuja. Blong lanem moa long saed blong samting we Baebol i talem, ridim ol atikol ya “?Wanem i Save Halpem Yumi?” mo “Trufala Hop Blong Wan Gudfala Fiuja.”