Plante man tede oli ting se taem i gat wan raorao o wan problem i kamaot, beswan rod blong stretem hemia blong faet. Be tingting ya i no laenap wetem ol tijing blong Jisas Kraes mo eksampol we hem i soemaot. Traem luk sam long ol samting we Jisas i talem mo i mekem.

Samting we Jisas i talem

 Long Bigfala Toktok Blong Jisas Antap Long Hil, hem i talem se fasin blong kros, talem ol rabis tok, mo faet oli no rod blong stretem ol problem. Traem luk sam long ol toktok blong hem.

•   “Olgeta samting we yufala i wantem blong ol man oli mekem long yufala, yufala tu i mas mekem long olgeta.” (Matiu 7:12; Luk 6:31) Hemia wan advaes we oli kolem se Nambawan Rul, a we i leftemap tingting blong yumi blong mekem i gud long ol narafala sem mak olsem we yumi wantem se oli mekem long yumi. I no gat wan long yumi we i wantem se ol narafala oli tritim nogud hem. Taswe yumi mas traehad blong kaen mo respektem ol narafala, nating se samtaem yumi no agri long samting we oli talem o mekem.

•   “Sipos wan man i slavem jiks blong yu long raetsaed, i gud yu letem hem i slavem yu long lefsaed tu.” (Matiu 5:38, 39; Luk 6:29) Jisas i no stap traem blong talem se yumi mas letem narafala blong i tritim nogud yumi. Be hem i talem olsem blong stretem rong tingting we sam lida blong skul oli tijim ol man long hem, hemia se sipos man i mekem i nogud long yumi, i oraet nomo blong givimbak long olgeta. Jisas i talem long ol man blong hem se oli mas kaen long ol man nating se oli mekem i nogud long olgeta. b

•   “Yufala i mas gohed blong lavem ol enemi blong yufala.” (Matiu 5:43, 44; Luk 6:27) Jisas i talem se yumi mas kaen long ol man we oli no laekem yumi o mekem i nogud long yumi. Hemia i no minim se yumi mas agri long ol nogud fasin we oli mekem. c Be hem i talem olsem from we taem yumi kaen long ol man we oli no laekem yumi, yumi save mekem kros blong olgeta i godaon mo hemia i save pulum olgeta tu blong oli kaen long yumi.

Samting We Jisas i Mekem Finis Mo Samting We Bambae i Mekem Yet

 Jisas i tijim ol man se faet i no rod blong stretem ol problem, mo hem i soemaot samting ya long laef blong hem. Long naet ya we ol soldia oli kam arestem Jisas, wan long ol man blong hem i faet blong protektem Jisas, be Jisas i talem long hem se: “Yu putumbak naef blong faet blong yu long ples blong hem. Man we i yusum naef blong faet, hem bambae i ded long naef blong faet.” (Matiu 26:52) Jisas i soemaot se hem i lavem ol enemi blong hem. Mo hem i mekem olsem taem i fogivim olgeta mo i prea from olgeta.—Luk 23:33, 34; 1 Pita 2:23.

 Baebol i promes se i no longtaem, Jisas we hem i Prins blong Pis, bambae i finisim fasin blong faet. (Aesea 9:6, 7) Sipos yu wantem save moa long saed blong nambawan fiuja ya, plis ridim atikol ya “?Ol Faet Bambae Oli Finis Olsem Wanem?.”