Masunod daw Kamo sa Mamomoton na Paggiya ni Jehova?
Masunod daw Kamo sa Mamomoton na Paggiya ni Jehova?
“Naogñisan ko si gabos na dalan nin kaputikan.”—SAL. 119:128.
1, 2. (a) Sa paghagad nin giya tanganing makaabot sa sarong destinasyon, anong klaseng patanid an aapresyaron mo, asin taano? (b) Anong klaseng mga patanid an itinatao ni Jehova sa mga naglilingkod sa saiya, asin taano?
IMAHINARA ini: Kaipuhan mong magbiahe pasiring sa sarong destinasyon. Naghagad ka nin giya sa sarong mapagkakatiwalaan na katood na nakakaaram kan dalan. Mantang tinatawan ka nia nin detalyadong direksion, posibleng magsabi sia nin arog kaini: “Mag-ingat ka sa sunod na susukian na iyan huli ta nakakaribong an karatula. Dakol an nalalagalag sa pagsunod dian.” Aapresyaron mo daw an pagmakolog nia asin masunod sa patanid? Sa nagkapirang paagi, si Jehova arog kan katood na iyan. Tinatawan nia kita nin maingat na direksion kun paano kita makakaabot sa satong destinasyon na buhay na daing katapusan, alagad kita pinapatanidan man nia manongod sa maraot na mga impluwensiang makakapalagalag sa sato.—Deut. 5:32; Isa. 30:21.
2 Pag-oolayan niato sa artikulong ini asin sa sunod na artikulo an nagkapirang impluwensia na dapit dian nagpapatanid sa sato an satong Katood, si Jehova Dios. Tandaan niato na itinatao ni Jehova an siring na mga patanid huli sa pagmakolog asin pagkamoot. Gusto nia na makaabot kita sa satong destinasyon. Makolog sa boot nia na maheling an mga tawo na nalalagalag huli sa pagpadara sa maraot na mga impluwensia. (Ezeq. 33:11) Sa artikulong ini, pag-oolayan niato an tolong negatibong impluwensia. An enot na impluwensia hale sa ibang mga tawo; an ikaduwa yaon mismo sa sato. An ikatolo mga bagay na imahinasyon o sayang sana; minsan siring, peligroso nanggad iyan. Kaipuhan tang maaraman kun ano an mga impluwensiang ini asin kun paano kita tinotokdoan kan satong langitnon na Ama na labanan iyan. An sarong pinasabngan na salmista nagsabi ki Jehova: “Naogñisan ko si gabos na dalan nin kaputikan.” (Sal. 119:128) Arog man daw kaiyan an pagmate nindo? Helingon niato kun paano niato mapapakosog an siring na pagmate asin kun paano kita mahiro oyon dian.
Dai Kamo Magsunod “sa Kadaklan”
3. (a) Taano ta peligrosong sundan an ibang nagbibiahe kun dai kita segurado kun arin na dalan an aagihan niato? (b) Anong importanteng prinsipyo an makukua niato sa Exodo 23:2?
3 Kun halawig an biahe nindo, ano an gigibohon nindo kun dai kamo segurado kun arin na dalan an aagihan nindo? Tibaad maisip nindong sundan an ibang nagbibiahe—nangorogna kun maheling nindo na dakolon man an nag-aagi sa pinili nindang dalan. Peligroso iyan, huling tibaad laen man an destinasyon ninda, o tibaad nalalagalag man sinda. May koneksion digdi, isip-isipa an sarong prinsipyo na makukua sa saro sa mga ley na itinao sa suanoy na Israel. An mga hokom o testigo sa hudisyal na mga bagay pinatanidan dapit sa peligro nin ‘pagsunod sa kadaklan.’ (Basahon an Exodo 23:2.) Mayong duda na madalion sana para sa bakong perpektong mga tawo na madara nin panggigipit nin kairiba, na huli kaiyan nabibiribid an hustisya. Minsan siring, an prinsipyo daw manongod sa dai pagsunod sa kadaklan aplikado sana sa hudisyal na mga bagay? Dai nanggad.
4, 5. Paano si Josue asin Caleb ginipit na magsunod sa kadaklan, alagad ano an nakatabang sa sainda na labanan iyan?
4 An totoo, an panggigipit na ‘magsunod sa kadaklan’ puedeng makaapektar sa sato sa haros ano man na panahon. Iyan puedeng biglang lumataw, asin iyan puedeng masakiton na labanan. Halimbawa, isip-isipa an panggigipit nin kairiba na naeksperyensiahan kaidto ni Josue asin Caleb. Kabilang sinda sa grupo nin 12 lalaki na nagduman sa Dagang Panuga tanganing mag-espiya. Pagbalik ninda, an sampulo sa mga lalaking idto nagtao nin negatibo asin nakakapaluya nanggad sa boot na bareta. Sinabi pa ngani ninda na an nagkapira sa mga nag-iistar duman mga higante na naggikan sa mga Nefilim, na aki kan rebeldeng mga anghel asin mga babae. (Gen. 6:4) Pero, imposible nanggad iyan. An maraot na mga Nefilim na iyan napoho na sa Delubyo dakol na siglo bago kaini, asin dai sinda nagkaigwa ni sarong aki. Alagad dawa an mga ideyang mayo nanggad nin basehan puedeng makaimpluwensia sa mga maluya an pagtubod. Huli sa negatibong mga baretang iyan kan sampulong espiya, tolos na naglakop sa banwaan an pagkatakot asin pagkataranta. Dai naghaloy, inisip kan kadaklan na sala na sunodon an instruksion ni Jehova na lumaog sinda sa Dagang Panuga. Ano an ginibo ni Josue asin Caleb sa masakit na situwasyon na iyan?—Bil. 13:25-33.
5 Dai sinda nagsunod sa kadaklan. Minsan ngani habo kan kadaklan na madangog an katotoohan, sinabi iyan nindang duwa asin nanindogan dian—dawa kan takoton sinda na gagadanon paagi sa paggapo! Ano an nagtao sa sainda nin kosog nin boot? An pagtubod ninda ki Jehova. An mga tawong may pagtubod malinaw na naheheling an kalaenan kan mayong basehan na mga bareta asin kan sagradong mga panuga nin Dios. Kan huri, pareho nindang ipinahayag kun ano an pagmate ninda dapit sa pagkamasasarigan ni Jehova sa pag-otob sa gabos na panuga nia. (Basahon an Josue 14:6, 8; 23:2, 14.) Si Josue asin Caleb dayupot sa saindang maimbod na Dios, asin dai naglaog sa isip ninda na kolgan an boot nia tangani sanang magsunod sa bakong maimbod na kadaklan. Kaya marigon sindang nanindogan, na nagtatao nin marahayon na halimbawa para sa sato ngonyan.—Bil. 14:1-10.
6. Sa anong mga kamugtakan puede tang mamatean na nagigipit kitang magsunod sa kadaklan?
6 Namatean mo na daw na nagigipit kang magsunod sa kadaklan? Dakolon nanggad ngonyan an mga tawong siblag ki Jehova asin nagtutuya sa saiyang mga pamantayan sa moral. Kun mapadapit sa mga libangan asin pag-aling-aling, sa parate an kadaklan na iyan nagpapalakop nin mga ideya na mayong basehan. Puedeng iiniinsistir ninda na dai man nakakaraot an imoralidad, kadahasan, asin espiritismo na lakop nanggad sa mga programa sa telebisyon, pelikula, saka video game. (2 Tim. 3:1-5) Kun ika nagpipili nin libangan asin pag-aling-aling para sa saimo o sa saimong pamilya, tinotogotan mo daw an mapagkonsinteng konsensia nin iba na makaimpluwensia sa mga desisyon saka konsensia mo? Bako daw na iyan siring man sana sa pagsunod sa kadaklan?
7, 8. (a) Paano napapatuod an satong kakayahan “sa pagmidbid,” asin taano ta mas kapakipakinabang an siring na pagpatuod kisa sa pagsunod sa dakol na estriktong reglamento? (b) Taano ta ikinakaogma nindo an halimbawa nin dakol na Kristianong hoben?
7 Tinawan kita ni Jehova nin mahalagang marhay na regalo na makakatabang sa sato sa pagdesisyon—an satong kakayahan “sa pagmidbid.” Minsan siring, an kakayahan na ini kaipuhan na patuodon paagi “sa paggamit.” (Heb. 5:14) Dai mapapatuod an satong kakayahan sa pagmidbid kun kita nagsusunod sa kadaklan; o, sa ibong na lado, kun kita tatawan nin dakol na estriktong reglamento kun dapit sa mga bagay na kalabot an konsensia. Halimbawa, iyan an dahelan kaya an banwaan ni Jehova dai tinatawan nin lista nin mga pelikula, libro, asin site sa Internet na dapat likayan. Huling an kinaban na ini marikason na nagbabago, pirme kitang mangangaipo nin bagong lista. Mas grabe pa, hahaleon kaiyan sa sato an mahalagang marhay na responsabilidad na maingat asin mapagngayongayong turotimbangon nguna an mga prinsipyo sa Biblia, dangan gumibo nin mga desisyon basado sa mga prinsipyong iyan.—Efe. 5:10.
8 Iyo, kun beses tibaad dai magustohan nin iba an satong mga desisyon na basado sa Biblia. An Kristianong mga hoben sa eskuelahan puedeng mapaatubang sa grabeng panggigipit na gibohon kun ano an ginigibo kan kadaklan. (1 Ped. 4:4) Kun siring, nakakaogmang maheling an Kristianong mga hoben asin gurang na inaarog an pagtubod ni Josue saka Caleb, na dai nagsunod sa kadaklan.
Dai Kamo Magsunod sa ‘Saindong Puso Asin mga Mata’
9. (a) Kun nagbibiahe, taano ta tibaad peligroso na magsunod sana sa satong mga pagmate asin paghona? (b) Taano ta mahalaga sa suanoy na banwaan nin Dios an ley sa Bilang 15:37-38?
9 An ikaduwang peligrosong impluwensia na pag-oolayan niato iyo an yaon mismo sa sato. Puede niato iyan iilustrar nin arog kaini: Kun ika nagbibiahe pasiring sa sarong partikular na destinasyon, maisip ka daw na dai na paggamiton an dara mong mapa kundi magsunod na sana sa hona-hona mo—na tibaad minapasiring sa lambang dalan na garo baga magayon an mga tanawon? Malinaw nanggad na dai ka makakaabot sa saimong destinasyon kun susundon mo an siring na hona-hona. Mapadapit digdi, estudyare an saro pa sa mga ley na itinao ni Jehova sa suanoy na Israel. Dakol ngonyan an nasasakitan na saboton an ley manongod sa pagtahi nin sinalapid na mga torsido sa gayad asin asul na bogkos sa saindang mga gubing. (Basahon an Bilang 15:37-38.) Pero, nasasabotan daw nindo an kahalagahan kaiyan? An pagsunod sa siring na ley nakatabang sa banwaan nin Dios na magdanay na napapalaen asin siblag sa paganong mga nasyon na nasa palibot ninda. Mahalagang marhay iyan tanganing makamtan asin mapagdanay ninda an pag-oyon ni Jehova. (Lev. 18:24, 25) Minsan siring, ihinahayag man kan ley na iyan an sarong peligrosong impluwensia na yaon mismo sa sato na puedeng darahon kita parayo sa satong destinasyon na buhay na daing katapusan. Paano man?
10. Paano ipinapaheling ni Jehova an saiyang pakasabot sa naturalesa nin tawo?
10 Mangnoha an sinabi ni Jehova kun taano ta itinao nia an ley na ini sa saiyang banwaan: “Dai kamo magsaligñoy sa hudian nin saindong puso asin nin saindong magña mata.” (Bil. 15:39) Hararom an pakasabot ni Jehova sa naturalesa nin tawo. Aram niang marhay na an satong puso, o panglaog na pagkatawo, madaling naaakit kan mga bagay na naheheling niato. Sa siring, an Biblia nagpapatanid sa sato: “Madaya an puso nin labi sa gabos na bagay, asin maraot: Siisay an makakamidbid kaiyan?” (Jer. 17:9) Kun siring, nasasabotan daw nindo kun taano ta angay nanggad an patanid ni Jehova sa mga Israelita? Aram niang marhay na sinda may tendensia na magheling sa paganong mga tawo na nasa palibot ninda asin maakit kan naheheling ninda. Tibaad masugotan sindang arogon an itsura kan mga bakong kapagtubod, dangan arogon pati an saindang kaisipan, saboot, asin paggawe.—Tal. 13:20.
11. Paano kita puedeng maakit kan mga naheheling niato?
11 Sa panahon niato, an satong madayang puso mas madali pa nganing masugotan kan mga naheheling niato. Nabubuhay kita sa kinaban na an tendensia kan kaisipan iyo na panigoan an mga mawot nin laman. Kaya, paano niato ikakaaplikar an prinsipyong makukua sa Bilang 15:39? Isip-isipa: Kun an mga nasa eskuelahan, pinagtatrabahohan, o lugar nindo nagigin orog na malaswa an pagbado, posible daw na maimpluwensiahan kamo kaiyan? Posible daw na masugotan man kamo na magsunod ‘sa saindong puso asin mga mata’ saka maakit kan mga naheheling nindo? Dangan, posible daw na masugotan kamo na ibaba an sadiri nindong mga pamantayan paagi sa pag-arog sa pagbado ninda?—Roma 12:1, 2.
12, 13. (a) Ano an maninigo niatong gibohon kun may tendensia an satong mga mata na magheling sa mga bagay na dai dapat helingon? (b) Ano an magpapahiro sa sato na likayan na magin gikanan nin sugot para sa iba?
12 Kaipuhan tang marhay na pataluboon an pagpupugol sa sadiri. Kun an satong mga mata may tendensia na magheling sa mga bagay na dai dapat helingon, girumdomon niato an marigon na determinasyon kan maimbod na si Job, na pormal na nakipagkasundo sa saiya mismong mga mata—sarong marigon na desisyon na dai magpaheling nin romantikong atension sa sarong babae na bako niang agom. (Job 31:1) Kaagid kaiyan, ini an nagin determinasyon ni Hadeng David: “Dai ko ibubugtak sa atubagñan nin sakuyang magña mata an anoman na bagay na biko [“daing kamanungdanan,” NW].” (Sal. 101:3) Para sa sato, “daing kamanungdanan” an ano man na bagay na puedeng makaraot sa satong malinig na konsensia asin relasyon ki Jehova. Kaiba dian an ano man na sugot na nakakaakit sa satong mga mata asin puedeng makatentar sa satong puso na gumibo nin sala.
13 Sa ibong na lado, siertong dai niato noarin man gugustohon na magin garo bagay na “daing kamanungdanan” para sa iba paagi sa pagsugot sa sainda na mag-isip na gumibo nin sala. Kun siring, sineseryoso niato an ipinasabong na hatol na magsulot nin husay asin mabining bado. (1 Tim. 2:9) An kabinian dai nangangahulogan na an gusto sana niato an dapat tang isipon. Kaipuhan tang konsideraron an konsensia asin pagmate kan mga nasa palibot niato, na ineenot an saindang katoninongan nin isip asin kapakanan kisa sa gusto niato. (Roma 15:1, 2) Rinibong hoben sa Kristianong kongregasyon an nagpapaheling nin marahayon na halimbawa sa bagay na ini. Nag-oorgolyo nanggad kita huling imbes na sinda magsunod sa ‘saindang puso asin mga mata,’ mas gusto nindang mapaogma si Jehova sa gabos nindang ginigibo—dawa sa saindang pagbado!
Dai Magsunod sa mga Bagay na “Kasayagñan” Sana
14. Anong patanid an itinao ni Samuel manongod sa pagtitiwala sa mga bagay na “kasayagñan” sana?
14 Imahinara na sa pagbiahe mo napaduman ka sa sarong mahiwason na desierto. Ano an mangyayari kun magsuki ka paduman sa sarong lugar na sa heling mo garo may tubig? Puede kang magadan kun susundan mo an imahinasyon na iyan! Aram na marhay ni Jehova na peligroso iyan. Estudyare an sarong halimbawa. Gusto kan mga Israelita na magin arog kan mga nasyon sa palibot ninda, na pinamamahalaan nin mga tawong hade. An totoo, an pagmawot na iyan magabat na kasalan huling nangangahulogan iyan na hinahaboan ninda si Jehova bilang Hade. Minsan ngani itinogot ni Jehova na magkaigwa sinda nin tawong hade, sinugo nia si propeta Samuel na magtao nin patanid na deretso sa punto manongod sa pagtitiwala sa mga bagay na “kasayagñan” sana.—Basahon an 1 Samuel 12:21.
15. Sa anong mga paagi na an mga Israelita nagtiwala sa mga bagay na sayang sana?
15 Inisip daw kan banwaan na an tawong hade magigin mas kapakipakinabang asin mas masasarigan kisa ki Jehova? Kun iyo, sinda talagang nagtitiwala sa sarong bagay na sayang sana! Asin huli kaiyan nagin madali sa sainda na magtiwala sa dakol na iba pang bagay hale ki Satanas na sayang sana. Madali sana sindang madara nin mga tawong hade na sumamba sa mga idolo. Sala an iniisip kan mga nagsasamba sa mga idolo na garo baga mas kapakipakinabang asin mas masasarigan an naheheling na mga bagay—mga dios na gibo sa kahoy o gapo—kisa sa dai naheheling na Dios, si Jehova, na naglalang kan gabos na bagay. Alagad arog kan sinabi ni apostol Pablo, an mga idolo “mayo nin buhay.” (1 Cor. 8:4, An Marahay na Bareta Biblia) Iyan dai nakakaheling, nakakadangog, nakakataram, o nakakahiro. Iyan maheheling asin makakapotan nindo, alagad an totoo, kun masamba kamo sa idolo, sayang sana an pagtitiwala nindo dian huling kapahamakan sana an magigin resulta kaiyan.—Sal. 115:4-8.
16. (a) Paano sinusugotan ni Satanas an dakol ngonyan na magtiwala sa mga bagay na sayang sana? (b) Taano ta masasabi niato na sayang sana an materyal na mga bagay, nangorogna kun ikokomparar ki Jehova Dios?
16 Eksperto pa man giraray si Satanas sa pagkombensir sa mga tawo na magtiwala sa mga bagay na sayang sana. Halimbawa, nasusugotan nia an kadakol na tawo na mag-asa sa materyal na mga bagay para sa seguridad ninda. An kuarta, mga rogaring, asin trabaho na halangkaw an sueldo garo baga may mga bentaha. Pero, ano an ikakatao nin materyal na mga bagay kun magluya an salud nin saro, kun bumagsak an ekonomiya, o kun may natural na kalamidad? Ano an ikakatabang kaiyan kun an mga tawo nakakamate na mayo na sindang halaga, naghahanap nin katuyohan sa buhay, asin nangangaipo nin paggiya saka simbag sa mas harararom na hapot dapit sa buhay? Ikakaligtas daw sinda kaiyan sa kagadanan? Kun sa materyal na mga bagay kita maasa tanganing mapanigoan an satong espirituwal na mga pangangaipo, madedesganar sana kita. Dai kita ikakaligtas nin materyal na mga rogaring; iyan sayang sana. Pag-abot nin panahon, dai ngani kaiyan matatawan nin garantiya an buhay, huli ta temporaryo sana an magigibo kaiyan sa halipot na buhay nin tawo ngonyan o sa posibilidad na maghelang asin magadan. (Tal. 23:4, 5) Kun siring, bako nanggad sayang sana an pagsarig sa satong Dios, si Jehova! An dayupot na relasyon sa saiya an solamenteng makakatao sa sato nin tunay na seguridad. Marahayon nanggad na bendisyon iyan! Nungka niato siang talikdan huli sa pagtiwala sa mga bagay na sayang sana.
17. Ano an determinado nindong gibohon kun dapit sa negatibong mga impluwensia na pinag-olayan niato?
17 Bako daw na mapalad kita huling si Jehova an satong Katood asin Giya pasiring sa buhay? Kun padagos tang hihimateon an mamomoton na patanid dapit sa tolong maraot na impluwensia—an kadaklan, an sato mismong puso, asin an mga bagay na sayang sana—mas posible nanggad na kita makaabot sa satong destinasyon na buhay na daing katapusan. Sa sunod na artikulo, eestudyaran niato an tolo pang patanid na itinao ni Jehova tanganing matabangan kita na ikaongis asin likayan an mga dalan nin kaputikan na nakakapalagalag sa kadakol na tawo.—Sal. 119:128.
Ano an Masasabi Nindo?
Paano nindo personal na ikakaaplikar an mga prinsipyo na makukua sa minasunod na mga teksto?
[Mga Hapot Para sa Pag-adal]
[Ritrato sa pahina 11]
Nasusugotan daw kamo na magsunod sa kadaklan?
[Ritrato sa pahina 13]
Taano ta peligrosong magsunod sa saimong puso asin mga mata?
[Ritrato sa pahina 14]
Nagtitiwala ka daw sa ano man na bagay na sayang sana?
