Bilang 13:1-33
13 Nakipag-ulay si Jehova ki Moises, na sinasabi:
2 “Magsugo ka nin mga lalaking maespiya* sa Canaan, an daga na itatao ko sa mga Israelita. Magsugo ka nin saro hali sa kada tribo, an lambang saro dapat na pamayo+ sa sainda.”+
3 Kaya isinugo sinda ni Moises hali sa kaawagan nin Paran+ suno sa pagbuot ni Jehova. Gabos sinda pamayo kan mga Israelita.
4 Ini an saindang mga pangaran: sa tribo ni Ruben, si Samua na aki ni Zaccur;
5 sa tribo ni Simeon, si Safat na aki ni Hori;
6 sa tribo ni Juda, si Caleb+ na aki ni Jefunne;
7 sa tribo ni Isacar, si Igal na aki ni Jose;
8 sa tribo ni Efraim, si Hosea+ na aki ni Nun;
9 sa tribo ni Benjamin, si Palti na aki ni Rafu;
10 sa tribo ni Zebulon, si Gaddiel na aki ni Sodi;
11 hali sa tribo ni Jose,+ sa tribo ni Manases,+ si Gaddi na aki ni Susi;
12 sa tribo ni Dan, si Amiel na aki ni Gemali;
13 sa tribo ni Aser, si Setur na aki ni Miguel;
14 sa tribo ni Neftali, si Nabi na aki ni Vofsi;
15 sa tribo ni Gad, si Geuel na aki ni Maki.
16 Iyan an mga pangaran kan mga lalaking isinugo ni Moises para mag-espiya sa kadagaan. Asin pinangaranan ni Moises na Josue*+ an aki ni Nun na si Hosea.
17 Kan suguon sinda ni Moises na mag-espiya sa daga nin Canaan, sinabihan niya sinda: “Magduman kamo sa Negeb, tapos magtukad kamo sa kabukidan.+
18 Hilingon nindo kun anong klase an lugar na iyan+ asin kun an mga tawong nakaistar diyan makukusog o maluluya, dikit o dakul,
19 asin kun an daga diyan magayon o maluya asin kun an mga siyudad na pig-iistaran ninda daing pader o igwa nin matibay na depensa.
20 Asin aramon nindo kun an daga mataba o tagiltil+ asin kun baga igwa diyan nin mga kahoy o mayo. Kusugi an buot nindo+ asin magkua kamo nin nagkapirang bunga hali duman.” Panahon kaidto nin paghinog kan mga inot na bunga kan mga ubas.+
21 Kaya nagduman sinda asin nag-espiya puon sa kaawagan nin Zin+ sagkod sa Rehob,+ na harani sa Lebo-hamat.*+
22 Kan magduman sinda sa Negeb, nakaabot sinda sa Hebron,+ kun sain nag-iistar si Ahiman, Sesai, asin Talmai,+ na mga Anakim.+ Mas nainot na itinugdok an Hebron nin pitong taon kisa sa Zoan kan Ehipto.
23 Kan makaabot sinda sa Kababan* nin Escol,+ nagkua sinda duman nin sarong rawog* nin mga ubas, na kinaipuhan na pagtuwangan kan duwa sa sainda paagi sa sarong ulayán, asin nagkua man sinda nin nagkapirang granada asin igos.*+
24 Inapod ninda an lugar na iyan na Kababan* nin Escol*+ huli sa rawog nin mga ubas na kinua duman kan mga Israelita.
25 Pakalihis nin 40 aldaw,+ nagbalik sinda hali sa pag-espiya sa lugar na idto.
26 Kaya buminalik sinda ki Moises saka ki Aaron asin sa bilog na katiripunan kan mga Israelita duman sa kaawagan nin Paran, sa Kades.+ Ibinareta ninda sa bilog na katiripunan an mga nahiling ninda asin ipinahiling an mga bunga na hali duman.
27 Ini an ibinareta ninda ki Moises: “Naglaog kami sa lugar na pigsuguan mo sa samo, asin talagang nagbubulos iyan nin gatas saka tangguli,*+ asin uni an mga bunga hali duman.+
28 Alagad, makukusog an mga tawong nakaistar duman, asin darakula an mga siyudad na may matibay na depensa. Nahiling mi man duman an mga Anakim.+
29 An mga Amalekita+ nakaistar sa Negeb,+ asin an mga Hiteo, an mga Jebusita,+ saka an mga Amorita+ nakaistar sa kabukidan, asin an mga Canaanita+ nakaistar sa may dagat+ saka sa may Jordan.”
30 Mantang nasa atubangan ni Moises an mga tawo, pinurbaran sindang pakalmahon ni Caleb paagi sa pagsabi: “Magduman na tulos kita, asin siguradong mapapasatuya idto, huli ta kayang-kaya ta sindang sakupon.”+
31 Pero su mga kaibanan niyang nagduman nagsarabi: “Dai ta kakayanon na makipaglaban sa sainda, ta mas makusog sinda sa sato.”+
32 Asin nagparaistorya pa sinda sa mga Israelita nin bakong magayon na mga bagay+ manungod sa dagang pig-espiyahan ninda, na sinasabi: “Peligroso an dagang pig-espiyahan mi; siguradong dai kamo mabubuhay duman. Saka darakulaon an gabos na tawong nahiling mi duman.+
33 Nahiling mi man duman an mga higante,* an mga aki ni Anak,+ na hali* sa mga Nefilim, asin garo sana kita mga lukton kun ikukumparar sa sainda, asin iyo man iyan an magigin paghiling ninda sa sato.”
Mga Nota
^ O “masiyasat.”
^ O “Jehosua,” na nangangahulugan “Si Jehova Kaligtasan.”
^ O “sa entrada kan Hamat.”
^ An bunga kan kahoy na higera.
^ O “pungot; rakoy.”
^ O “Sulugan na Kababan.”
^ O “Sulugan na Kababan.”
^ Nangangahulugan na “Rawog nin mga Ubas.”
^ O “dugos.”
^ Sa literal, “Nefilim.”
^ O “naggikan.”
