Kun an Kaaraman nin Dios Makapano Na sa Daga
Kapitulo 19
Kun an Kaaraman nin Dios Makapano Na sa Daga
1, 2. Paano naraot an linalang ni Jehova?
IPAMUGTAK na natapos pa sana nin sarong ekspertong pintor an sarong magayonon na ipinintang tanawon. Tamang ibilang nia iyan na marahayon—sarong obra maestra! Alagad ta pagkabanggi rinaot iyan nin sarong maimon na karibal. Siempre, magigin dahelan ini nin grabeng kolog sa boot kan pintor. Gustong-gusto nanggad niang maheling na nabibilanggo an nanraot! Asin maiimahinar nindo kun gurano an pagmawot kan pintor na ikabalik an saiyang gibo sa dating gayon kaiyan.
2 Arog kan pintor na iyan, si Jehova guminibo nin sarong obra maestra sa pag-andam kan daga asin pagbugtak kan katawohan dian. Pakalalanga sa lalaki asin babae, ipinahayag niang “marahayon” an gabos niang ginibo sa daga. (Genesis 1:31) Si Adan asin Eva sadiring mga aki nin Dios, asin namotan nia sinda. May iniisip siang sarong maogma, mamurawayon na ngapit para sa sainda. Totoo, dinara sinda ni Satanas sa pagrebelde, alagad an makangangalas na linalang nin Dios dai naraot na dai na mahihirahay.—Genesis 3:23, 24; 6:11, 12.
3. Ano an “tunay na buhay”?
3 Nagdesisyon an Dios na itanos an mga bagay. Gustong-gusto niang maheling kita na namumuhay sono sa saiyang orihinal na katuyohan. An satong halipot asin mapurisaw na pag-eksister bakong an “tunay na buhay,” huli ta iyan mas maluyang gayo kisa sa iniisip ni Jehova. An “tunay na buhay” na gusto nin Dios para sa sato iyo an “buhay na daing katapusan” sa irarom nin sangkap na mga kamugtakan.—1 Timoteo 6:12, 19.
4, 5. (a) Paano maootob an paglaom na Paraiso? (b) Taano ta maninigo kitang maghorophorop manongod sa satong paglaom sa ngapit?
4 An kaaraman nin Dios nagtatao nin paninimbagan sa atubangan ni Jehova. (Santiago 4:17) Alagad isip-isipa an mga bendisyon na kakamtan nindo kun saindong iaaplikar an kaaraman na iyan asin pag-aaboton an buhay na daing katapusan. Sa saiyang Tataramon, an Biblia, ipininta ni Jehova an sarong magayon na ladawan kan magigin buhay sa Paraisong daga na haranihon nang marhay. Siempre, bilang banwaan ni Jehova dai kita naglilingkod sa Dios huli sana sa pagmawot nin balos. Naglilingkod kita sa Dios huli ta namomotan niato sia. (Marcos 12:29, 30) Saro pa, dai kita naggaganar nin buhay paagi sa paglilingkod ki Jehova. An buhay na daing katapusan regalo nin Dios. (Roma 6:23) Makikinabang kita sa paghorophorop sa siring na buhay huli ta an paglaom na Paraiso nagpapagirumdom sa sato kun anong klaseng Dios si Jehova—an mamomoton na “parabalos sa mga maigot na naghahanap sa saiya.” (Hebreo 11:6) An paglaom na malinaw na marhay sa satong isip asin puso magpapangyari sato na matagalan an mga kasakitan sa kinaban ni Satanas.—Jeremias 23:20.
5 Isentro niato ngonyan an satong atension sa basado sa Bibliang paglaom na buhay na daing katapusan sa maabot na daganon na Paraiso. Paano an magigin buhay kun an kaaraman nin Dios makapano na sa daga?
PAKATAPOS KAN ARMAGEDON—SARONG PARAISONG DAGA
6. Ano an Armagedon, asin ano an magigin kahulogan kaiyan para sa katawohan?
6 Siring kan ipinaheling na sa enotan, sa dai na mahahaloy lalaglagon ni Jehova Dios an presenteng maraot na palakaw nin mga bagay. An kinaban marikas nang nagdadangadang sa inaapod kan Biblia na Har–Magedon, o Armagedon. An terminong iyan tibaad magpasabong sa isip nin ibang tawo dapit sa sarong nuklear na biyong pagkatunaw na pangyayarihon nin naggeguerrang mga nasyon, alagad an Armagedon bako nanggad na arog kaiyan. Arog kan ipinaheheling sa Kapahayagan 16:14-16, an Armagedon iyo an “ralaban kan dakulang aldaw nin Dios na Makakamhan sa gabos.” Iyan sarong ralaban na kalabot an “mga hade kan bilog na ineerokan na daga,” o an mga nasyon. An Aki ni Jehova Dios, an nombradong Hade, sa dai na mahahaloy maluwas sa pakikilaban. Segurado nanggad an resulta. An gabos na nagtutumang sa Kahadean nin Dios asin kabtang kan maraot na palakaw ni Satanas paparaon. An mga maimbod sana ki Jehova an makaliligtas.—Kapahayagan 7:9, 14; 19:11-21.
7. Yaon saen si Satanas asin an saiyang mga demonyo durante kan Sangribong Taon na Paghade ni Cristo, asin paano makikinabang digdi an katawohan?
7 Imahinara na nakaligtas kamo sa kapahamakan na iyan. Paano an magigin buhay digdi sa daga sa ipinanuga nin Dios na bagong kinaban? (2 Pedro 3:13) Dai kita kaipuhan na magbanabana, huli ta sinasabihan kita kan Biblia, asin an sinasabi kaiyan nakapupukaw sa boot. Aram niato na si Satanas asin an saiyang mga demonyo gagaposon, ibibilanggo sa bungaw nin pagkadaing maginibo durante kan Sangribong Taon na Paghade ni Jesu-Cristo. Mawawara na an patagong impluwensia kan biko, maraot an intension na mga linalang na iyan, na nagsusutsut nin kariribokan asin naghihingoang itulod kita sa mga akto nin pagkadaing kaimbodan tumang sa Dios. Abaang kaginhawahan!—Kapahayagan 20:1-3.
8, 9. Sa bagong kinaban, ano an mangyayari sa mga kasakitan, paghelang, asin paggurang?
8 Pag-abot nin panahon, an gabos na klase nin helang mawawara na. (Isaias 33:24) Sa panahon na iyan an mga pilay matindog, malakaw, madalagan, asin mabayle na may marahay na, makosog na mga tabay. Pakalihis nin mga taon nin buhay sa saindang silensiong kinaban, an mga bongog makakadangog kan magayagayang mga tanog sa palibot ninda. An mga buta mamumungnan mantang naheheling kan saindang mga mata an magayonon na kinaban na may kolor asin korte. (Isaias 35:5, 6) Sa katapustapusi, maheheling ninda an mga lalauogon kan saindang mga namomotan! Posibleng sa panahon na iyan an saindang pagheling malibog nin madali sana huli sa mga luha nin kagayagayahan.
9 Isip-isipa nanggad! Mayo nang mga antepara, mayo nang mga saklay asin sogkod, mayo nang mga bolong, mayo nang mga klinika sa ngipon o mga ospital! Nungka na giraray na an mga tawo aagawan nin kaogmahan kan helang sa emosyon asin kan depresyon. Mayo nang mga aki na magsasakit sa helang. An mga danyos nin paggurang hahaleon. (Job 33:25) Kita magigin mas marahay an salud, mas makosog. Kada aga mamata kita hale sa nakagiginhawang pagtorog na may bagong kosog, pano nin kabagsikan asin galaga para sa bagong aldaw nin maogmang buhay asin nakakokontentong trabaho.
10. Anong asignasyon na trabaho an gigibohon kan mga makaliligtas sa Armagedon?
10 Kadakol kan nakaoogmang gigibohon kan mga makaliligtas sa Armagedon. Gigibohon nindang paraiso an daga. An ano man na mga gira kan maating daan na palakaw paparaon. Mga parke asin tatamnan an masalihid sa mga maati, surusuan na lugar nin mga dukha asin rinaot na daga. An gabos magkakaigwa nin komportable, maginhawang harong. (Isaias 65:21) Sa pag-agi nin panahon, an paraisong mga parte kan daga maghihiwas asin magkakasurumpay sagkod na an bilog na globo makaabot na sa pamantayan nin kagayonan na ibinugtak kan Kaglalang kaidto sa tatamnan nin Eden. Nakakokontento nanggad na makikabtang sa gibohon na iyan nin paghirahay!
11. Ano an magigin relasyon kan katawohan sa mga palibot kan daga asin sa mga hayop?
11 An gabos na ini gigibohon sa irarom kan paggiya nin Dios tanganing an palibot dai madanyaran. An mga tawo magigin matoninong sa kaibahan kan mga hayop. Imbes kan daing kontrol na paggadan sa sainda, poponan liwat nin tawo an responsableng pangangataman sa daga, na iniingatan sinda. Iladawan nindo sa isip an mga lobo asin karnero, mga leon asin baka, na iribang nagsasabsab—asin an magarong mga hayop biyo nang ligtas sa peligro. Maski an aki dai na nin dapat na ikatakot sa layas na mga hayop, ni na raraoton pa an katrangkilohan kan bagong kinaban nin maisog, maringis na mga tawo. (Isaias 11:6-8) Abaa katoninong na bagong kinaban iyan!
BINAGONG KATAWOHAN
12. Paano naootob ngonyan an Isaias 11:9, asin paano iyan maootob sa Paraiso?
12 An Isaias 11:9 nagsasabi sato kun taano ta mayo nang danyos na gigibohon sa bilog na daga. Iyan nagsasabi: “An daga mapapano nanggad kan kaaraman ni Jehova kun paanong an tubig nakatatahob sa mismong kadagatan.” Ini nanonongod sa mga tawo huli ta an mga hayop dai puedeng magkua “kan kaaraman ni Jehova” asin gumibo nin mga pagbabago, huli ta sinda naghihiro sono sa naturalesa. Alagad an kaaraman kan satong Kaglalang talagang binabago an mga tawo. Daing duwa-duwa na kamo mismo naggibo na nin nagkapirang pagbabago bilang resulta kan pag-aplikar kan kaaraman nin Dios sa saindong buhay. Minilyon na an naggibo kaiyan. Kun siring, an hulang ini nagpoon nang maotob sa mga naglilingkod ki Jehova. Pero, iyan nagtotokdo man sa panahon na an mga tawo sa bilog na kinaban hahaleon an ano man na animalistiko o madahas na mga ugale asin magigin matoninong sagkod lamang.
13. Anong programa nin pagtotokdo an gigibohon digdi sa daga?
13 Kanigoan kamakangangalas kaiyan kun an kaaraman nin Dios makapano na sa daga! Magkakaigwa nin mahiwas na programa nin pagtotokdo sa irarom kan paggiya ni Hadeng Jesu-Cristo asin kan saiyang 144,000 na kairibang hade. Sa panahon na iyan may gagamiton na bagong “mga balumbon.” Malinaw na ini nasusurat na mga instruksion nin Dios na magseserbing basihan sa pagtokdo sa mga mag-eerok sa daga. (Kapahayagan 20:12) An katawohan mag-aadal, bakong nin pakilaban, kundi nin katoninongan. An gabos na mapanlaglag na armas mawawara na sagkod lamang. (Salmo 46:9) An mga mag-eerok sa bagong kinaban totokdoan na trataron an saindang mga kapwa tawo na may pagkamoot, paggalang, asin dignidad.
14. Paano mapapalaen an kinaban kun an katawohan saro nang nagkakasararong pamilya?
14 An katawohan magigin sararong pamilya. Mayo nang mga kaolangan sa pagkasararo asin pagkamagturugang. (Salmo 133:1-3) Mayo nang harong na kaipuhan na baratan tanganing dai makalaog an mga parahabon. An katoninongan magrereynar sa gabos na puso, sa gabos na harong, sa gabos na parte kan daga.—Miqueas 4:4.
AN MAGAYAGAYANG PAGBUHAY LIWAT
15. Anong duwang grupo an bubuhayon liwat digdi sa daga?
15 Durante kan Milenyong iyan, mangyayari an pagbuhay liwat. An mga tuyong nagkasala tumang sa banal na espiritu, o puersa aktiba, nin Dios paagi sa daing pagsolsol na paggawe kontra sa mga kapahayagan o paggiya kaiyan dai bubuhayon liwat. (Mateo 23:15, 33; Hebreo 6:4-6) Siempre, an Dios an madesisyon kun siisay an nagkasala sa paaging iyan. Alagad duwang grupo an bubuhayon liwat—“an mga matanos asin an mga bakong matanos.” (Gibo 24:15) Mantang magkakaigwa nin tamang pagkasunodsunod, rasonable sanang sabihon na an enot na mga sasabaton sa pagkabuhay liwat digdi sa daga iyo an mga matanos, an mga maimbod na naglingkod ki Jehova.—Hebreo 11:35-39.
16. (a) Sairisay an makakabilang sa “mga matanos” na bubuhayon liwat digdi sa daga? (b) Sairisay na maimbod kaidtong suanoy na mga panahon an partikularmenteng gusto nindong makamidbid, asin taano?
16 Imbes na makadangog nin mga bareta manongod sa mga guerra, kalamidad, asin kagadanan, an mga lingkod ni Jehova makareresibi nin makangangalas na mga bareta dapit sa pagkabuhay liwat. Makaoogma na mabaretaan an pagbalik kan maimbod na mga lalaki asin babae na arog ni Abel, Enoc, Noe, Abraham, Sara, Job, Moises, Rahab, Rut, David, Elias, Ester. Kanigoan kanakapupukaw sa boot na makasaysayan na mga katunayan an saindang iaatubang mantang itinatao ninda an mga detalye sa likod kan dakol na kasaysayan sa Biblia! Daing duwa-duwa na sinda asin an mga matanos na nagadan sa mas nahuring mga panahon magigin galaga man na makaaram manongod sa katapusan kan palakaw ni Satanas asin kun paano pinakangbanal ni Jehova an saiyang banal na ngaran asin ibinindikar an saiyang soberaniya.
17. Anong tabang an itatao kan mga maimbod sa iba na mga bubuhayon liwat?
17 Makatatabang nanggad an mga maimbod na ini durante kan masunod na kabtang kan pagbuhay liwat, kun an binilyon na “bakong matanos” butasan na hale sa mga gapos nin kagadanan! An kadaklan kan katawohan nungkang nagkaigwa nin oportunidad na mamidbid si Jehova. Si Satanas ‘binuta an saindang isip.’ (2 Corinto 4:4) Alagad hahalean nin epekto an ginibo kan Diablo. An mga bakong matanos mabalik sa sarong magayon asin matoninong na daga. Sinda sasabaton nin sarong banwaan na organisadong marhay tanganing tokdoan sinda manongod ki Jehova asin sa saiyang nagrereynar nang Aki, si Jesu-Cristo. Mantang an binilyon na binuhay liwat nakamimidbid asin namomoot sa saindang Kaglalang, an kaaraman ni Jehova makapapano sa daga sa dai pang kaagid na paagi.
18. Ano sa paghona nindo an saindong mamamatean sa pagsabat sa binuhay liwat na mga namomotan?
18 Kanigoan na kagayagayahan an dadarahon sa satong puso kan pagbuhay liwat! Siisay daw an dai pa nagtios dahelan sa satong kaiwal na kagadanan? Iyo nanggad, siisay daw an dai pa naronot an puso kan mapatod an bogkos nin pagkamoot o pagkakatood kan kuanon nin helang, paggurang, aksidente, o kadahasan an buhay nin sarong namomotan? Kun siring, imahinara an kagayagayahan nin pagherelingan liwat sa Paraiso. An mga ina asin ama, mga aking lalaki asin babae, katood asin paryentes, magkukurugosan, na nagngingirisi asin naghihiribi huli sa kagayagayahan.
PAGKASANGKAP SA KATAPUSTAPUSI!
19. Anong milagro an mangyayari durante kan Milenyo?
19 Sa bilog na Milenyo, may makangangalas na milagrong mangyayari. Para sa katawohan, posibleng iyan an pinakanakaoogmang kabtang kan Sangribong Taon na Paghade ni Cristo. Pagbobotan ni Jehova an saiyang Aki na iaplikar an mga pakinabang kan pantubos na atang sa lambang maimbod asin makinuyog na lalaki asin babae. Paagi kaiyan, an gabos na kasalan hahaleon na asin an katawohan dadarahon sa pagkasangkap.—1 Juan 2:2; Kapahayagan 21:1-4.
20. (a) Ano an magigin kahulogan kan pagigin sangkap? (b) Noarin mapoon na mabuhay sa lubos na sentido an mga makaliligtas sa Armagedon asin an mga bubuhayon liwat?
20 Pagkasangkap! Ano an magigin kahulogan kaiyan? Mangangahulogan iyan nin pagbalik sa buhay na arog kan ki Adan asin Eva bago sinda nagkasala tumang ki Jehova Dios. Sa pisikal, mental, emosyonal, moral, asin espirituwal—sa gabos na paaging maiimahinar—an sangkap na mga tawo lubos na makaaabot sa mga pamantayan nin Dios. Alagad magigin magkakapareho na daw an gabos na tawo sa panahon na iyan? Dai nanggad! An mga linalang ni Jehova—an mga kahoy, burak, hayop—gabos nagtotokdo sato na nawiwili sia sa pagkakalaenlaen. An sangkap na mga tawo magkakaigwa nin magkakalaen na mga personalidad asin kakayahan. An gabos magkakamit nin buhay sono sa katuyohan dian nin Dios. An Kapahayagan 20:5 nagsasabi: “An iba kan mga gadan dai nabuhay sagkod na natapos an sangribong taon.” Arog kan dakulang kadaklan nin mga makaliligtas sa Armagedon, an mga bubuhayon liwat magigin lubos na buhay pakaabot ninda sa daing kasalan na pagkasangkap.
21. (a) Ano an mangyayari sa katapusan kan Sangribong Taon na Paghade ni Cristo? (b) Ano sa katapustapusi an mangyayari ki Satanas asin sa gabos na makampi sa saiya?
21 An sangkap na mga tawo maatubang sa sarong pangultimong pagbalo. Sa katapusan kan Milenyo, si Satanas asin an saiyang mga demonyo bubutasan hale sa bungaw sa halipot na panahon asin totogotan na gumibo nin pangultimong paghihingoa na patalikodon ki Jehova an mga tawo. An iba ipaoorog an salang kamawotan kisa sa pagkamoot sa Dios, alagad an pagrebeldeng ini tataposon tolos. Gagadanon ni Jehova an mga paslong ini kaiba ni Satanas asin kan gabos niang demonyo. Sa panahon na iyan an gabos na parakasala mawawara na sagkod lamang.—Kapahayagan 20:7-10.
ANO AN GIGIBOHON NINDO?
22. Ano an inaantisipar nindong gigibohon sa Paraiso?
22 An panahon na daing kasagkodan mapapasa atubangan kan mga namomoot ki Jehova Dios asin nag-eerok sa Paraisong daga. Nungka niatong maiimahinar an saindang kagayagayahan, asin kamo puede man na magkaigwa nin kabtang digdi. An musika, arte, mga abilidad sa paggibo—tara, an mga gibo nin sangkap na katawohan makalalabi sa pinakamagayon na mga gibo kan mga pinakasikat sa daan na kinaban! Total, an mga tawo magigin sangkap asin masasa atubangan ninda an panahon na daing kasagkodan. Imahinara an mahihimo nindo bilang sangkap na tawo. Isip-isipa man an manonodan nindo asin kan saindong mga kapwa kun manongod sa paglalang ni Jehova—poon sa binilyon na galaksia sa uniberso sagkod sa kasaditsaditing sub-atomikong mga partikula. An gabos na gigibohon nin tawo orog pang makapaoogma sa puso kan satong mamomoton na langitnon na Ama, si Jehova.—Salmo 150:1-6.
23. Taano ta dai noarin man magigin nakalalangkag an buhay sa Paraiso?
23 An buhay sa panahon na iyan bakong nakalalangkag. Iyan paorog nang paorog na magigin interesante mantang nag-aagi an panahon. Aram nindo, mayo nin katapusan an kaaraman nin Dios. (Roma 11:33) Sa bilog na panahon na daing sagkod, perming dakol pang manonodan asin bagong mga bagay na madidiskobre. (Eclesiastes 3:11) Asin mantang nagpapadagos kamong mag-adal manongod ki Jehova Dios, kamo padagos na mabubuhay—bako sanang nin nagkapirang taon kundi sagkod lamang!—Salmo 22:26.
24, 25. Taano ta maninigo kamong mamuhay na ngonyan kaoyon sa kaaraman nin Dios?
24 Bako daw na an maogmang ngapit sa sarong paraisong daga bawi sa ano man na paghihingoa o sakripisyo na ginigibo nindo? Siempre iyo! Bueno, ipinaaabot sa saindo ni Jehova an liabe sa magayonon na ngapit na iyan. An liabeng iyan iyo an kaaraman nin Dios. Gagamiton daw nindo iyan?
25 Kun namomotan nindo si Jehova, makanonompong kamo nin kaogmahan sa paggibo kan saiyang kabotan. (1 Juan 5:3) Mantang naglalakaw kamo sa dalan na iyan, kanigoan na bendisyon an saindong maeeksperyensiahan! Kun iaaplikar nindo an kaaraman nin Dios, makatatao iyan sa saindo nin mas maogmang buhay maski sa maribok na kinaban na ini. Asin kadakoldakol kan balos sa ngapit, huli ta ini an kaaraman na minagiya pasiring sa buhay na daing katapusan! Ngonyan na an marahay na panahon na dapat kamong humiro. Magin desididong mamuhay kaoyon sa kaaraman nin Dios. Ipaheling an saindong pagkamoot ki Jehova. Saindong tawan nin onra an saiyang banal na ngaran asin patunayan na putikon si Satanas. Si Jehova Dios, an Burabod nin tunay na kadonongan asin kaaraman, maggagayagaya man manongod sa saindo sa saiyang dakula asin mamomoton na puso. (Jeremias 31:3; Zofonias 3:17) Asin mamomotan nia kamo sagkod lamang!
BALOON AN SAINDONG KAARAMAN
Ano an “tunay na buhay”?
Pakatapos kan Armagedon, ano an mangyayari digdi sa daga?
Sairisay an bubuhayon liwat digdi sa daga?
Paano magigin sangkap an katawohan asin babaloon nin pangultimo?
Ano an saindong paglaom mapadapit sa Paraiso?
[Mga Hapot Para sa Pag-adal]
[Ritrato sa pahina 188, 189]
Naglalaom daw kamong mabuhay sa Paraiso, kun an kaaraman nin Dios makapano na sa daga?
