Cristianonakajj jan walinakat jarkʼaqasiñatakejja, taqe kunsa amuyumpiw lurapjjañapa. Ukampis Biblian ewjjtʼanakaparjamaw uk lurapjjañapa. Bibliarjamajja, pistolanaka, riflenaka jan ukajj yaqha ukhamanak jarkʼaqasiñatak apnaqañajj janiw walïkiti. Uka toqet suma amtar puriñatakejj kunanakas yanaptʼistaspa uk jichhajj uñjañäni.

Jehová Diosatakejja vidajj wali valoraniwa. Salmonak qellqer Davidajj Jehová Diosaw ‘jakañ churirejja’ sasaw säna (Sal. 36:9, NM). Ukhamajj jan walinakat jarkʼaqasiñatakisa, cosasanakap jarkʼaqañatakisa, mä cristianojj janipuniw jaqer jiwayirjam kuns lurañapäkiti (Deu. 22:8; Sal. 51:14).

Jaqerojj kunampis jiwayaksnawa. Ukampis mä pistolampejj amanutsa jan ukajj jan munkasas jukʼamp facilakiw jiwaysna. * Yamas mä lunthatatï pistola aptʼat uñjistaspajja, inas ukampi jiwaychistaspa jan ukajj jiwasas jiwaysna.

Jesusajj janïr jiwkäna uka arumajja, discipulonakaparojj espadanïpjjam siskchïnsa, janiw uka espadajj jarkʼaqasiñatakïkänti (Luc. 22:36, 38). Jiwayañ munkatas espadampi jan jarkʼaqasipjjañapatakiw Jesusajj ukham ewjjtʼäna (Luc. 22:52). Pedrojj jilïr sacerdoten esclavopar espadampi usuchjkäna ukhajja, “imañapar uka espadam imasim, espada aytirejj espadampi jiwayataw uñjasini” sasaw Jesusajj säna (Mat. 26:51,  52). Jichhürunakansa uka arunakarjamaw cristianonakajj sarnaqapjje.

Miqueas 4:3 textorjamajja, Diosan servirinakapajj “espadanakapjja aradoruw tuku[yapjje], lansanakapsti hocenakaruraki”. Cheqpach cristianonakajj janiw nuwasirit uñtʼatäpkiti. Apóstol Pablon aka ewjjtʼaparuw istʼapjje: “Jan khitirus jan walit jan walimpi kuttʼayapjjamti”. “Taqe jaqenakampi sumankapjjam” sasa (Rom. 12:17, 18). Pablojj kunayman jan walinakanwa uñjasïna, “lunthatanakampi” jan waltʼayatas uñjasirakïnwa (2 Cor. 11:26). Ukampis jarkʼaqasiñatakejj janipuniw Biblian ewjjtʼanakap pʼakintirïkänti. Antisas Jehová Diosaru, Biblian ewjjanakaparuw confiyirïna, ukaw “nuwasiña armanakata sipana” jukʼamp wakiskirejja (Ecl. 9:18).

Cristianonakatakejj vidaw cosasanakat sipansa jukʼamp valorani. “Maynejj walja utjirinïkchisa, janiw ukanakajj jupar jakañ churkaspati” uk taqeniw yattanjja (Luc. 12:15). Ukhamajja, mä lunthatatï pistolampi jan ukajj yaqha ukham armampi cosasanakas aparañ munistaspa ukhajja, suma arumpiw parljjayañasa. Janipun istʼañ munkani ukhajja, Jesusan arunakap amtañasa, jupajj sänwa: “Jan wali jaqerojj jan kutkatasimti” sasa. Mä arunjja, kuntï munki uk churjjañasakiwa (Mat. 5:39, 40; Luc. 6:29). * Jan walinakar jan purtʼasiñatakejj wali amuyumpiw sarnaqañasa. Vecinonakasatï Jehová Diosan Testigopätas yatipjjani, kunatï utjkistu ukanaksa jan taqen uñjkata apnaqkañäni ukhajja, lunthatanakajj janiw jaljjatkistaniti (Pro. 18:10; 1 Juan 2:16).

Cristianonakajj mayninakan concienciap respetañasawa (Rom. 14:21). Mä jilatajj jan wali jaqenakat jarkʼaqasiñatakejj pistolaniwa sasin jilat kullakanakajj yatipjjaspa ukhajja, yaqhepajj jan walinakwa amuyapjjaspa. Ukhamajj pistola apnaqañajj markan leyiparjam walikïskaspa ukhasa, janipuniw jiwasan munañasak thaqañasäkiti (1 Cor. 10:32, 33; 13:4, 5).

Suma jaqet uñtʼatäñatakiw cristianonakajj chʼamachastanjja (2 Cor. 4:2; 1 Ped. 5:2, 3). Mä cristianojj Bibliampi ewjjtʼatpachas jan wali jaqenakat jarkʼaqasiñatak mä pistola apnaqaskakispa ukhajja, janiw yateqaskay sarnaqerit uñtʼatäjjaspati. Ukhamajja, janiw congregacionan kuna luräwsa katoqkaspati. Mä cristianotï trabajopan pistola, jan ukajj yaqha ukhamanak apnaqañapächejja, congregacionan janirakiw kuna luräwsa katoqkaspati. Jan ukhaman uñjasiñatakejja, yaqha trabajo thaqasjjañapaw wakisispa. *

Qhana arunjja, sapa cristianow kunjamsa jan walinakat jarkʼaqasini, kunjamsa familiaparusa, cosasanakapsa jarkʼaqani, kawkïr trabajsa ajllini uk amtjjañapa. Ukampis Biblian ewjjanakaparjamaw uk lurañapa, ukanwa Jehová Diosan yatiñapasa munasiñapasa amuyasi. Amuytʼasir cristianojj Biblian ewjjtʼanakapar respetiwa, janiw jaqenakat jarkʼaqasiñatakejj pistolsa ni yaqha ukhamanaksa apnaqkiti. Jupanakatï Jehová Diosar confiyapjjani, ewjjanakaparus istʼapjjani ukhajja, wiñayatakiw jutïrin jan ajjsarayasis jakasipjjani (Sal. 97:10; Pro. 1:33; 2:6, 7).