Uka sarnaqäwit jan sum amuytʼas liytʼirinakaw ukham jisktʼasipjjaspa. Ukampis uka versiculonakanjja, Mefibóset sutini pä chachanakatwa parlaski. Kunas pasäna uk yatjjatsna ukhajja, wali sumwa yateqsna.

Israel markan Saúl reyipajja paqallq yoqanakanïnwa, pä phuchanirakïnwa. Nayrïr wawapajj Jonatán satänwa. Ukatjja Rizpá sat concubinapampejj yaqha wawanirakïnwa, jupajj Mefibóset satänwa. Maysa toqetjja, Jonatanajj Mefibóset sat mä yoqanirakïnwa. Ukhamajja Saúl reyejj Mefibóset sutini mä yoqanïnwa, Mefibóset sutini mä allchhinirakïnwa.

¿Kunatsa Davidajj walja chachanakar jiwarayatäpjjañapatak apjjaruyäna? Mä kutejja, Saúl reyejj israelitanak taypin jakir gabaonitanakarojj uñisjjänwa, taqeniruw jiwarayañ munarakïna. Amuyatajj waljaniruw jiwarayäna. Ukham luratapajj janiw walïkänti. ¿Kunatsa? Josué chachan urunakapanjja, Israel marka pʼeqtʼirinakajj sumankañatak mä pacto gabaonitanakampejj lurapjjäna (Jos. 9:3-27).

Saúl reyin urunakapkamasa uka pactojj janiw chhaqtkänti. Ukampis uka pacto respetañat sipansa Saúl reyejj gabaonitanakar chhaqtayañwa munäna. Ukham lurañ amtatapatjja, “Saúl chachasa utapankirinakasa jaqen wilap wartapjjatapat” juchanïpjjänwa (2 Sam. 21:1). Davidajj reyëjjäna ukhajja, jakasipkäna uka gabaonitanakaw kunatï paskäna uk Davidar yatiyapjjäna. Davidasti Saulan jan wal luratapat perdonatäñatakisa, Jehová Diosajj oraq bendisiñapatakis kuns lurirista sasaw jupanakar jisktʼäna. Qollqe mayiñat sipansa gabaonitanakajj ‘jiwarayañ munapkitäna uka chachan paqallqo yoqanakapar jiwarayapjjañajatak churapjjeta’ sasaw sapjjäna (Núm. 35:30, 31). Davidasti iyaw sasaw mayitanakaparjam luräna (2 Sam. 21:2-6).

Uka tiempotakejja Saulas Jonatanas mä guerranwa jiwarjjapjjäna, ukampis Jonatanan Mefibóset yoqapajj jakaskänwa. Juparojj wawäkäna ukhaw mä accidentejj pasäna, ukatwa cojo quedasïna. Ukhamajj kuntï Saúl achachilapajj gabaonitanak contrajj lurkäna ukarojj janiw sarkänti. Davidajj Jonatanamp sum apasiñatakiw mä pacto luräna, uka pactojj Jonatanan jutïr wawanakaparuw yanaptʼañapäna, Mefibóset sat yoqapamppacharu (1 Sam. 18:1; 20:42). “Niyakejjay Davidampi Saúl chachan Jonatán yoqapampejj Jehová Dios nayraqatan mä juramento lurapjjchïnjja, reyejj Saúl chachan Jonatán yoqapan Mefibóset sat yoqapat khuyaptʼayasïnwa” (2 Sam. 21:7).

Ukhampachasa Davidajj gabaonitanakan mayitaparojj istʼänwa. Ukatwa Saulan pä yoqanakapampiru, phesqa allchhinakapampir apjjaruyäna, uka yoqanakapat maynïrejj Mefibóset satänwa (2 Sam. 21:8, 9). Davidan ukham luratapajja, wila wartasitapat oraqejj maldisitäkäna uk chhaqtañapatakiw yanaptʼäna.

Ukham pasatapajj akwa yatichistu, Saulan pä yoqanakapampi phesqa allchhinakapampitejj jan juchanïpkaspäna ukhajja, kuntï jupanakampejj luraskäna ukajja janiw Jehová Diosatakejj walïkaspänti, kuna laykutejj ‘wawanakajj janiw awkinakapan juchanakap laykojj jiwayatäpjjañapäkiti’ sasaw Diosan Leyipan wali qhan sisjjäna. Uka pachpa leyejj akham sarakïnwa: “Mä jaqejja pachpa juchapat jiwayatäñapawa” sasa (Deut. 24:16). Ukhamajj jiwarayat uñjasipkäna uka pä yoqanakapampi phesqa allchhinakapampejja, Saulajj gabaonitanakar jiwaraykäna ukhajj kunjamats yanaptʼapjjänwa, ukatwa jupanakajj jiwarayat uñjasipjjäna.

¿Kunsa ukham pasatapat yateqsna? Maynitejj mä jan wal lurchi ukhajja, janiw nayajj juchanïkti, instruccionanakakwa phoqaskayäta sasajj janiw siskaspati. Jan ukasti taqeniw kuntï Proverbios librojj siski uk lurapjjañasa, ukan akham siwa: “Kayunakamajj sarkani uka thakjja sum pampachtʼam, ukatsti taqpach thakinakamaw seguröni. Jan chʼeqa toqerusa ni kupi toqerus saranukumti. Kunatï jan walïki ukat jitheqtam” sasa (Prov. 4:24-27; Efes. 5:15).