Mä diccionariorjamajja, juramento lurañajj “mä kun arsutasata jan ukajj mä promesa luratasat Diosar testigot uchasin mä promesa lurañawa” (Diccionario de uso del español, de María Moliner). Mä juramentojja, arunakampi jan ukajj qellqtʼasaw lurasispa.

Yaqhepanakajja juramento lurañajj janiw walïkiti sasaw amuyapjje, ¿kunatsa ukham amuyapjje? Jesusan akham arsutapatwa ukham amuyapjje, jupajj akham sänwa: “Jan kuna juramentsa lurapjjamti. […] Jumanakatejj ‘jïsa’ sapjjsta ukhajja phoqapjjam, ‘janiwa’ sapjjsta ukhasti janiraki. Ukat jukʼampi parlañajj Supayatwa juti” sasa (Mat. 5:33-37). Moisesar churaskäna uka Leyinjja, israelitanakarojj juramento lurapjjañapatakiw mayisïna, Diosat jan jitheqtir servirinakas juramentonak lurapjjarakïnwa, uk Jesusajj sum yatïna (Gén. 14:22, 23; Éx. 22:10, 11). Jehová Diosan juramento luratanakapat Jesusajj yatirakïnwa (Heb. 6:13-17). Ukhamajj janipuniw juramento lurapjjañamäkiti sasajj janiw Jesusajj siskänti, jan ukasti jan amuytʼasis juramento lurañjjata jan ukajj kunanakatï jan importantëki ukanakat juramento lurañjjat amuyasipjjañapatakiw ukham saskäna. Kuntï arsktan ukjja phoqañasapuniwa, Jehová Diosajj uk lurañaswa munaraki.

Ukhamajj mä juramento lurañamatak mayipjjätam ukhajj ¿kunsa lurañama? Nayraqatjja, uka juramentompejj phoqasmati janicha uk amuytʼasiñamawa. Janitï phoqerjamäkstajja janiw juramento lurañamäkiti. Diosan Arupajj akham sasaw ewjjtʼistu: “Mä promesa jan lurañamaw jukʼamp sumajja, mä promesa lurasin jan phoqañat sipansa” sasa (Ecl. 5:5). Ukatjja Biblian kawkïr wiñay yatichäwiparjamas juramento luraskta uk amuykiptʼañamawa, ukatsti Bibliamp yatichat concienciamarjamaw lurañamaraki. ¿Kawkïrinakas Biblian wiñay yatichäwinakapat yaqhepanakajja?

Yaqhep juramentonakajj Diosan munañaparjamawa. Amuytʼañataki, kunapachatï Jehová Diosan Testigonakapat mä chacha warmejj casaraski ukhajja, mä promesa lurapjje, uka promesajj mä juramentowa. Casarasir waynampi tawaqompejj Dios nayraqatana ukhamarak testigonak nayraqatanwa aka oraqen panip jakkasin munasiñataki, munasiñamp cuidasiñataki, respetasiñatak mä promesa lurapjje. (Yaqhep casarasirinakajj janis uka kikpa arunak arsupkchejja, ukhampachas Dios nayraqatan mä promesa lurapjje). Ukatjja chacha warmjam uñtʼatäjjapjjewa, chacha warmjamajj jiwañkam jakapjjaspa ukwa taqenis suyapjjaraki (Gén. 2:24; 1 Cor. 7:39). Casarasirinakan promesa lurapjjatapajj walikïskiwa, Diosan munañaparjamarakiwa.

Yaqhep juramentonakajj janiw Diosan munañaparjamäkiti. Cristianonakajja janiw armanakamp markapar arjjatañatakisa jan ukajj Diosarojj  janiw confiyjjti sañatakis mä juramento lurapkiti. Ukhamtï lurapjjaspa ukhajja, Diosan mandamientonakaparojj janiw istʼapkaspati. Niyakejjay cristianonakajj ‘jan aka mundonkirïpkchejja’, aka mundon jan waltʼäwinakaparusa, chʼajjwäwinakaparus janiw mitisipkiti (Juan 15:19; Is. 2:4; Sant. 1:27).

Yaqhep juramentonakjja sapa mayniw concienciaparjam amtjjañapa. Jesusajj akham sänwa: “Cesarankkis ukjja Cesarar churapjjam, Diosankkis ukjja Diosar churapjjarakim” sasa. Awisajj mä cristianojj janïr mä juramento lurkasinjja, Jesusajj churkäna uka ewjjtʼapat sum amuytʼañapawa (Luc. 20:25).

Mä cristianojj nacionalizasiñsa munkaspa jan ukajj pasaporte apsuñsa munkaspa, ukampis uka markar apoyañatakejj mä juramento lurañapäkaspas ukham amuytʼañäni. Uka juramentotï Diosan leyinakap conträchi ukhajja, Bibliampi yatichat concienciapajj janiw uka juramento arsuñap dejkaniti. Concienciap respetañatakejja, inas gobiernojj uka juramento mayjtʼayañapatak permitchini.

Mayjtʼayat juramento lurañajja, Romanos 13:1 textorjamäskaspawa, ukan akham siwa: “Taqe jaqenakaw jilïr autoridadanakar istʼañapa” sasa. Ukhamajja inas mä cristianojj kuntï Diosajj lurapjjam siski uk lurañatak mä juramento lurañajj walikïskiwa sasin amuychispa.

Maynirutï mä juramento lurayañatak mä kun apnaqayañ munapjjani jan ukajj ampar aytayasin mä kun lurayañ munapjjani ukhajja, Biblian yatichat concienciapar istʼañapaw wakisini. Nayra tiemponjja, romanonakampi escitanakampejj espadanakapjjaruw juramento lurapjjerïna, ukatjja guerran mä diosaparuw chʼamap mayiñatak artʼasipjjerïna, ukham lurasaw arunakapajj confiykayätap uñachtʼayapjjäna. Griegonakajj alajjpachar ampar aytasaw juramento lurapjjerïna, ukham lurasajja arsutanakapa luratanakap uñchʼukisinkir mä diosan utjatapa, uka diosar cuenta churapjjañapätapwa uñachtʼayapjjäna.

Jehová Diosan mä serviripajja, janiw falso religionamp mitiski jan ukajj adoraski uka bandera laykusa, yaqha ukhamanak laykus juramento lurañapäkiti. Ukham lurañajja falso diosanakar adorañampi sasispawa. Ukampis Diosan mä serviripatï tribunalar testigot sarani ukat mä Bibliaru ampar loqjjatasin kunatï cheqäki uk parlañapataki mä juramento lurañap mayipjjani ukhajja, ¿kunsa luraspa? Ukhaman uñjasisajj inas juramento lurañ amtchini, kuna laykutejj Diosar jan jitheqtas servirinakajj amparampiw juramento lurapjjerïna sasaw Biblian qhanañchi (Gén. 24:2, 3, 9; 47:29-31). Jiwasatï tribunalan ukham lurañ amtañäni ukhajja, ak amtañasawa: Dios nayraqatanwa cheq parlañatak mä juramento lurasktanjja, ukatwa jisktʼapjjestani ukhajj cheq parlañasa.

Niyakejjay Jehová Diosamp sum apasitas wali valoranit uñjstanjja, janïr juramento lurkasajj orasiñasawa, sum amuytʼasiñasarakiwa. Mä juramento lurasajj janiw conciencias qʼañuchasiñ munktanti, janirakiw Biblian wiñay yatichäwinakaps pʼakintañ munktanti. Jiwasatï mä juramento lurañänejja, uka juramentompejj phoqañasawa (1 Ped. 2:12).