ENUKPLAKPLA 8
Nyi yí taɖo Mawu ɖe mɔ efunkpekpe koɖo enuvwin liɔ?
1. Lé nuvɔn je gɔnmɛ doɔ?
Lé Mawu ɖe mɔ agbetɔwo kpa cɛ exwe sugbɔ vayi na yi mɛ kɔ petii mɔ, wodatɛnŋ akpɔ agbetɔviwo cukaɖawo gbɔ o
Nuvɔn je gɔnmɛ le nyigban ji hwecinu yí Satana kan ŋsu ŋkɔtɔ. Le gɔnmɛjeje mɛɔ, Satana nyi mawudɔla blebu maɖoafɛn, vɔ “[dénɔ nyɔnɔnwi lɔ mɛ]” keke sɔyi o. (Ӡan 8:44) Éji mɔ woasɔ sɛnsɛn ci yí ɖo anyi Mawu ɖekɛ kpaŋ tɔ na ye. Eyi dɔ yí ekan ŋsu nɔ nyɔnu ŋkɔtɔ, Ɛva. Satana ble Ɛva yí egbe tonusese nɔ Mawu keŋ yí ɖo to yi. Adamu bɔdo Ɛva nu le etomaɖomaɖo Mawu mɛ. Adamu nuwana cɛ yí kplɔ mì do efunkpekpe koɖo eku mɛ.—Hlɛn Gɔnmɛjeje 3:1-6, 19.
Satana gufɔnfɔn do Mawu cɛkpakpa nu je gɔnmɛ hwecinu yí eble Ɛva yí egbe tonusese nɔ Mawu. Amɛ akpa sugbɔtɔ le nyigban ji wa ɖeka koɖo Satana keŋ yí gbe Mawu cɛkpakpa. Le kleŋ mɛɔ, Satana vanyi “xexe lɔ fyɔ.”—Hlɛn Ӡan 16:11; 1 Ӡan 5:19.
2. Afɛn le Mawu nuwawawo nua?
Afɛn ɖekpokpui dele Mawu nuwawawo nu o. Mawudɔla koɖo agbetɔ ciwo Mawu wa atɛnŋ aɖo to yi nywiɖe dru. (2 Ese Wema 32:4, 5) Mawu wa mì koɖo amɛɖekishinɔnɔblɔɖe mɔ mìwoŋtɔwo le sɔ gbeta awa enunywi abi enuvɔn. Amɛɖekishinɔnɔblɔɖe lɔ na mɔnukpɔkpɔ mì nɔ mìadasɛ mɔ mìlɔn Mawu.—Hlɛn Ӡaki 1:13-15; 1 Ӡan 5:3.
3. Nyi yí taɖo Mawu ɖe mɔ yí efunkpekpe li va ɖo egbɛɔ?
Yehowa ɖe mɔ egufɔnfɔn do yi cɛkpakpa nu li nɔ hwenu hwɛɖeka. Nyi yí taɖoɔ? Asɔ dasɛ mɔ acɛkpakpa ɖekpokpui, to akpo nɔ ye tɔ datɛnŋ ahɛn nyɔna vɛ nɔ agbetɔwo gbeɖe o. (Ŋununyatɔ 7:29; 8:9, nwt) Le exwe 6 000 nɔ agbetɔwo xolɔlɔɔ, ɖoŋci lɔ ze petii. Agbetɔwo cɛkpakpawo detɛnŋ gu ahwawawa, enumajɔmajɔwawa, abi edɔ̀ o.—Hlɛn Ӡeremi 10:23, nwt; Rɔmatɔwo 9:17.
To vo nɔ agbetɔwo cɛkpakpawoɔ, Mawu cɛkpakpa hɛnkɔ nyɔna sugbɔ va nɔ yi mɛwo. (Ezai 48:17, 18, nwt) Dajinjin o, Mawu agu agbetɔwo cɛkpakpawo pleŋ. Amɛ ciwo yí lɔn mɔ Mawu le kplɔ yewo ɖekɛ kpaŋ yí anɔ nyigban lɔ ji. —Ezai 11:9, nwt.—Hlɛn Daniɛli 2:44.
Kpɔ video ci yí nyi Nyi yí taɖo Mawu ɖe mɔ yí efunkpekpe liɔ?
4. Emɔnukpɔkpɔ ci yí jigbɔnɖɛ Mawu tɔ hun ɖɛ nɔ mìɔ?
Satana nu mɔ nyɔna ci wokpɔkpɔ ɖekɛ yí dɔ amɛwo le Mawu sɛnkɔ. Àji mɔ yeana woanya mɔ ŋsu teŋ yɔa? Àsun ji dru! Jigbɔnɖɛ Mawu tɔ na emɔ mì pleŋ nɔ mìadasɛ mɔ, Mawu abi agbetɔ yí akpacɛ do mì ji. Agbenɔnɔ mìwo tɔ yí adasɛ mɛ ci mìsɔ.—Hlɛn Job 1:8-12; Elododo Wema 27:11.
5. Lé mìawɛ adasɛ mɔ Mawu yí nyi mìwo kplɔtɔɔ?
Mìwo wanawo yí adasɛ mɔ mìsɔ Mawu mɔ eyi nyi mìwo kplɔtɔ
Mìatɛnŋ adasɛ mɔ Mawu yí nyi mìwo kplɔtɔ nɔ mìji sɛnsɛn adodwitɔ lɔ, keŋ yí wanɔ do yi se ciwo wocu do Bibla, Mawu Nyɔ ji. (Ӡan 4:23) Mìatɛnŋ agbe Satana cɛkpakpa nɔ mìgbe politiki koɖo ahwawawa shigbe lé Yesu wɛ hannɛ.—Hlɛn Ӡan 17:14.
Satana zankɔ yi ŋsɛn do agbetɔwo ji nɔ woakpɔ mɔ agbe gblegble nɔnɔ koɖo tamɛsɛnsɛn nuwanawo nyɔ. Nɔ mìdewakɔ enu ŋtɔ́woɔ, mìwo xlɔwo koɖo mìwo xomumɛtɔwo atɛnŋ ako mì alo atrɔkpe mì. (1 Piɛ 4:3, 4) Eӡan mɔ mìasɔ gbeta ɖeka. Mìawa ɖeka koɖo mɛ ciwo yí lɔn Mawua? Mìalɔn awa do yi se ciwo mɛ nunya koɖo lɔnlɔn le jia? Nɔ mìwa ahan ɔ, mìadasɛ mɔ Satana kan ŋsu hwecinu yí enu mɔ nɔ agbetɔwo le efunkpekpe mɛɔ, wodatɛnŋ ase tonu nɔ Mawu o.—Hlɛn 1 Korɛntitɔwo 6:9, 10; 15:33.
Lɔnlɔn ci Mawu ɖo nɔ agbetɔviwo na kankandoji mì mɔ enuvwin koɖo efunkpekpe agu. Amɛ ciwo yí xɔ gbeɖu cɛwo ji se, anɔ agbe tɛgbɛɛ le jijɔ mɛ le paradisonyigban ji.—Hlɛn Ӡan 3:16.
