5 Mose 32:1-52
32 “Oo dziƒowo, miƒu to anyi, mele nu ƒo ge,Eye anyigba nese nye numenyawo.
2 Nye nufiafia adza abe tsi ene;Nye nya adza abe zãmu* ene,Abe tsie nyɔ́ ɖe gbe dzi ene,Abe gbafie wɔ ɖe nu miemiewo dzi ene.
3 Elabena maɖe gbeƒã Yehowa ƒe ŋkɔ.+
Miƒo nu tso mía Mawu la ƒe gãnyenye ŋu!+
4 Agakpe la, eƒe dɔwɔwɔ de blibo,+Elabena eƒe mɔwo katã dzɔ.+
Mawu nyateƒetɔ,+ ame si mewɔa nu madzɔmadzɔ gbeɖe o;+Dzɔdzɔetɔ kple nuteƒewɔla wònye.+
5 Woawoe wɔ nu tovo.+
Menye viawoe wonye o, woawo ŋutɔwo gbɔe vodada la tso.+
Dzidzime gɔglɔ̃ totro wonye!+
6 Oo, dukɔ tsibome manyanu,+Aleae wòle be miawɔ ɖe Yehowa ŋua?+
Ðe menye eyae nye Fofowò si wɔ wò,+Eya ame si wɔ wò hena nèli ke oa?
7 Ðo ŋku tsãŋkekewo dzi;Bu dzidzime siwo va yi la ŋu.
Bia fofowò, eye atoe na wò;+Bia wò ametsitsiwo, eye woagblɔe na wò.
8 Esime Dziƒoʋĩtɔ la ma domenyinu na dukɔwo,+Esime wòma Adam* ƒe viwo tso wo nɔewo gbɔ la,+Eɖo liƒo na dukɔwo,+Ðe ale si Israel-viwo sɔ gbɔe nu.+
9 Elabena Yehowa ƒe gomee nye eƒe dukɔ;+Yakob ye nye eƒe domenyinu.+
10 Efɔe le gbedzi+Le gbedadaƒo, afi si gbemelãwo le xɔxlɔ̃m le.+
Ekpɔ eta, elé be nɛ,+Eye wòkpɔ eta abe eƒe ŋku ƒe gadaglamakui ene.+
11 Ale si ko hɔ̃ ʋuʋua eƒe atɔ,Saa agba ɖe viawo dzi,Kekea eƒe aʋalawo me hekɔa wo,Eye wòtsɔa wo ɖe eƒe aʋalawo dzi la,+
12 Yehowa ɖeɖe koe kplɔe;*+
Dutamawu aɖeke mekpe ɖe eŋu o.+
13 Ena wònya avuzi le anyigba ƒe tonyigbawo dzi,+Ale be wòɖu anyigbadzikutsetsewo.+
Ena anyitsi tso agakpe la me wònoKple ami tso kpe sesẽ me,
14 Nyinotsi kpekẽ kple alẽnotsi,Hekpe ɖe agbo nyuitɔwo* ŋu,Basantɔwo ƒe alẽtsuwo, kple gbɔ̃tsuwo,Hekpe ɖe lu dokuwo* ŋu;+Eno wain si wotsɔ waintsetsemetsi* wɔ.
15 Esi Yesurun* da ami la, edze aglã henɔ afɔkli dam.
Èda ami, èkpɔ lãme heklã.+
Esia tae wògblẽ Mawu si wɔe la ɖi.+Eye wòdo vlo eƒe xɔname ƒe Agakpe la.
16 Wotsɔ mawu tutɔwo do dɔmedzoe nɛ;+Wotsɔ ŋunyɔnuwo nɔ dziku dom nɛ.+
17 Wonɔ vɔ sam na gbɔgbɔ vɔ̃wo, ke menye na Mawu o,+Na mawu siwo womenya o,Na mawu yeye siwo do nyitsɔ laa,Siwo nye mawu siwo mia tɔgbuiwo menya o.
18 Èŋlɔ Agakpe+ si dzi wò la be,Eye mèɖo ŋku Mawu, si ƒe dɔme nèdzɔ tso la dzi o.+
19 Esi Yehowa kpɔe la, egbe wo+Elabena viaŋutsuwo kple vianyɔnuwo do dziku nɛ.
20 Eya ta egblɔ be: ‘Maɣla nye ŋkume ɖe wo;+Ne makpɔ nu si ava dzɔ ɖe wo dzi.
Elabena dzidzime gblẽku wonye,+Vi siwo me anukwareɖiɖi aɖeke mele o.+
21 Wotsɔ nu si menye mawu o do dɔmedzoe nam;+Wotsɔ woƒe legba maɖinuwo do dziku nam.+
Eya ta matsɔ dukɔ maɖidukɔ ana woaʋã ŋu;+Matsɔ dukɔ tsibome aɖe ado dziku na wo.+
22 Elabena nye dɔmedzoe fla helé dzo,+Eye wòabi ade Tsiẽƒe* ƒe gogloƒe ke,+Eye wòafiã anyigba la kple edzi kutsetsewo,Eye wòabi towo ƒe gɔmeɖoanyiwo vlavlavla.
23 Mana woƒe xaxawo nadzi ɖe edzi na wo;Mada nye aŋutrɔwo katã ɖe wo ŋu.
24 Dɔwuame ana nu nate wo ŋu belibeli+Eye asrã sesẽ kple tsɔtsrɔ̃ dziŋɔ ana wo nu nayi keŋkeŋ.+
Madɔ lã wɔadãwo woaɖu wo+Kple da vɔ̃wo* ɖa woaɖu wo.
25 Yi awu wo le gota;+Eye ŋɔdzi le xɔ me+Na ɖekakpui kple ɖetugbui leaƒe siaa,Na vi nono kple amegã taɣi siaa.+
26 Megblɔ be: “Makaka wo;Mana woaŋlɔ wo be le amegbetɔwo dome,”
27 Futɔ la ƒe dziku si wòado nam la ŋue mebu,+Elabena ketɔwo ase egɔme bubui.+
Eye woagblɔ be: “Míaƒe ŋusẽ ɖu dzi;+Menye Yehowa ye wɔ nu siawo katã o.”
28 Elabena wonye dukɔ si si tagbɔ mele o,*Eye womesea nu gɔme o.+
29 Ðe wònye nunyalawoe wonye la,+ anye ne wode ŋugble le esia ŋu!+
Anye ne wobu nu si ava dzɔ ɖe wo dzi la ŋu.+
30 Aleke ame ɖeka awɔ aɖe ame akpe ɖeka ɖe nu,Eye ame eve nana ame akpe ewo nasi?+
Negbe ɖeko woƒe Agakpe la tsɔ wo dzra,+Eye Yehowa tsɔ wo de asi hafi.
31 Elabena woƒe agakpe mele abe míaƒe Agakpe la ene o,+Míaƒe futɔwo gɔ̃ hã kpɔ esia dze sii.+
32 Elabena woƒe wainka nye Sodom ƒe wainkawo,Wotso Gomora toŋugblewo me.+
Woƒe waintsetse nye waintsetse si me aɖi le,Woƒe wainkpowo vena.+
33 Woƒe wain nye dawo ƒe aɖi,Enye ƒliwo ƒe aɖi vɔ̃.
34 Ðe womedzrae ɖo ɖe gbɔnye,Eye wotre enu wòle nye nudzraɖoƒe oa?+
35 Tɔnyee nye hlɔ̃biabia kple teƒeɖoɖo,+Ne woƒe afɔ naɖiɖi le ɣeyiɣi ɖoɖi la dzi,+Elabena woƒe tsɔtsrɔ̃gbe gogo,Eye nu si le wo lalam la ava kaba.’
36 Elabena Yehowa adrɔ̃ ʋɔnu eƒe dukɔ,+Eye eƒe subɔlawo ƒe nu awɔ nublanui nɛ,*+Ne ekpɔ be ŋusẽ vɔ le wo ŋu keŋ,Eye wɔnamanɔŋutɔwo kple ame beliwo koe susɔ.
37 Eye wòagblɔ be: ‘Afi kae woƒe mawuawo le,+Agakpe si wosi tso,
38 Siwo ɖua woƒe vɔsalãwo ƒe ami,*Noa woƒe nunovɔsawo ƒe wain?+
Mina woatso axɔ na mi.
Mina woazu sitsoƒe na mi.
39 Azɔ mikpɔ ɖa, nyee nye Mawu,+Eye mawu bubu aɖeke meli kpe ɖe ŋunye o.+
Mewua ame, eye megbɔa agbe ame.+
Medea abi ame ŋu,+ eye madaa gbe le ame ŋu,+Eye ame aɖeke mate ŋu aɖe ame tso asinye me o.+
40 Elabena medo nye asi ɖe dzi,Eye meka atam be: “Zi ale si mele agbe tegbee la,”+
41 Ne menyre nye yi dadzo la,Eye nye asi le klalo hena ʋɔnudɔdrɔ̃ la,+Mabia hlɔ̃ nye ketɔwo,+Eye maɖo eteƒe na ame siwo lé fum la.
42 Mana nye aŋutrɔwo nano ʋu amu,Eye nye yi aɖu lã,Ame siwo wowu kple aboyomewo ƒe ʋue,Futɔ la kplɔlawo ƒe tawoe.’
43 Mi dukɔwo, mikpɔ dzidzɔ kple eƒe dukɔ la,+Elabena abia hlɔ̃ ɖe eƒe subɔlawo ƒe ʋu ta,+Abia hlɔ̃ eƒe ketɔwo ɖe eteƒe,+Eye wòalé avu* ɖe eƒe dukɔ la ƒe anyigba ta.”
44 Ale Mose kple Hosea,*+ Nun vi va gblɔ ha sia me nyawo katã ɖe dukɔ la ƒe to me.+
45 Esi Mose gblɔ nya siawo katã na Israel blibo la vɔ la,
46 egblɔ na wo be: “Mina nya siwo katã metsɔ le nu xlɔ̃m mi egbea la nade dzi gbɔ na mi,+ ne miade se na mia viwo be woawɔ Se sia me nyawo katã dzi.+
47 Elabena menye nya gbɔlo wònye na mi o, ke boŋ miaƒe agbee,+ eye nya siawo ana mianɔ agbe didi le anyigba si miele Yordan tso ge ayi aɖaxɔ wòazu mia tɔ la dzi.”
48 Yehowa gblɔ na Mose gbe ma gbe ke bena:
49 “De Abarim To+ sia dzi, si nye Nebo To+ si le Moab-nyigba dzi, eye wòdze ŋgɔ Yeriko, ne nàkpɔ Kanaan-nyigba, si tsɔ ge mala na Israel-viwo wòazu wo tɔ la ɖa.+
50 Eye àku ɖe to si lia ge nàla la dzi, eye woatsɔ wò akpe ɖe wò amewo* ŋu, abe ale si ko nɔviwò Aron ku le Hor To+ la dzi, eye wotsɔe kpe ɖe eƒe amewo ŋu ene;
51 elabena mi ame evea miewɔ nuteƒe nam le Israel-viwo dome le Meriba+ le Kades tsi la gbɔ le Zin gbedzi o, elabena miekɔ ŋunye le Israel-viwo ŋkume o.+
52 Ànɔ adzɔge akpɔ anyigba la ɖa, ke màde anyigba si metsɔ le Israel-viwo nam la dzi o.”+
Etenuŋɔŋlɔ
^ Alo, “ahũ.”
^ Agate ŋu afia, “amegbetɔƒomea.”
^ Efia, Yakob.
^ Egɔmeɖeɖe tẽe, “agbo ƒe ami.”
^ Egɔmeɖeɖe tẽe, “lu ƒe ayiku ƒe ami.”
^ Egɔmeɖeɖe tẽe, “waintsetse ƒe ʋu.”
^ Egɔmee nye, “Dzɔdzɔetɔ,” si nye bubuŋkɔ si woyɔna na Israel.
^ Alo, “Sheol,” si nye ameƒomea ƒe yɔdo. Kpɔ Nya Tɔxɛwo Gɔmeɖeƒea.
^ Alo, “Kple nu siwo tana.”
^ Agate ŋu afia, “si do toku aɖaŋuɖoɖo.”
^ Alo, “ƒe nu avee.”
^ Anye “woƒe vɔsalã nyuitɔwo” ye wowɔnɛ.
^ Egɔmeɖeɖe tẽe, “wòaxɔ nya ɖe akɔ.”
^ Egɔmee nye, “Xɔxɔ; Ðeɖekpɔkpɔ”; ŋkɔ siae woyɔna na Yosua tsã.
^ Esia nye nya si wozãna ne wole nu ƒom tso ku ŋu.
