Daniel 3:1-30
-
The gold image wey King Nebuchadnezzar make (1-7)
-
The king command say people must worship the image (4-6)
-
-
Them talk say the three Hebrew men no obey (8-18)
-
“We no go serve your gods” (18)
-
-
Them throw them for inside the fire wey de burn well-well (19-23)
-
God use miracle save them from the fire (24-27)
-
The king praise the God of the Hebrew men (28-30)
3 King Neb·u·chad·nez′zar use gold make one image wey high reach 60 cubits* and wide reach 6 cubits.* E set-am for the level land of Du′ra for the area of Babylon.
2 Then King Neb·u·chad·nez′zar send message say make them gather the satraps, government officers, governors, people wey de advice the king, people wey de handle money matter, judges, magistrates, and all the people wey de handle government matter for the areas, to come the dedication of the image wey King Neb·u·chad·nez′zar don set.
3 So the satraps, the government officers, governors, people wey de advice the king, people wey de handle money matter, judges, magistrates, and all the people wey de handle government matter for the areas gather to do the dedication of the image wey King Neb·u·chad·nez′zar don set. And them stand for front of the image wey Neb·u·chad·nez′zar don set.
4 The person wey de announce the king message talk with loud voice say: “The king don command una, O people, nations, and language groups,
5 say when una hear the sound of the horn, the pipe, zither, harp wey get triangle shape, music instrument wey get strings, bagpipe, and all the other music instrument, una must bow face ground and worship the gold image wey King Neb·u·chad·nez′zar don set.
6 Anybody wey no bow face ground and worship the image, them no go waste time to throw the person inside fire wey de burn well-well.”*
7 So when all the people hear the sound of the horn, the pipe, zither, harp wey get triangle shape, music instrument wey get strings, bagpipe, and all the other music instrument, all the people, nations, and language groups bow face ground and worship the gold image wey King Neb·u·chad·nez′zar don set.
8 Now that time, some of the Chal·de′a people come front and talk against* Jew people.
9 Them tell King Neb·u·chad·nez′zar say: “O king, make you continue to live forever.
10 You, O king, command say make everybody wey hear the sound of the horn, the pipe, zither, harp wey get triangle shape, music instrument wey get strings, bagpipe, and all the other music instrument bow face ground and worship the gold image;
11 and say anybody wey no bow face ground and worship-am, them go throw the person for inside fire wey de burn well-well.*
12 But e get some Jew people wey you choose make them de handle government matter for the area of Babylon: Sha′drach, Me′shach, and A·bed′ne·go. This men no show say them respect you at all, O king. Them no de serve your gods, and them no gree worship the gold image wey you don set.”
13 Then Neb·u·chad·nez′zar, as e de boil with vex, command say make them bring Sha′drach, Me′shach, and A·bed′ne·go come inside. So them bring this men come front of the king.
14 Neb·u·chad·nez′zar tell them say: “Sha′drach, Me′shach, and A·bed′ne·go, na really true say una no de serve my gods, and say una no gree worship the gold image wey I don set?
15 Now when una hear the sound of the horn, the pipe, zither, the harp wey get triangle shape, the music instrument wey get strings, the bagpipe, and all the other music instrument, if una ready to bow face ground and worship the image wey I don make, no problem. But if una no gree worship-am, them no go waste time to throw una for inside the fire wey de burn well-well.* And who be the god wey fit save una from my hand?”
16 Sha′drach, Me′shach, and A·bed′ne·go answer the king say: “O Neb·u·chad·nez′zar, we no need to answer you for this matter.
17 If na so e go be, O king, our God wey we de serve go fit save us from the fire wey de burn well-well,* and save us from your hand.
18 But even if e no save us, make you know, O king, say we no go serve your gods or worship the gold image wey you don set.”
19 Then Neb·u·chad·nez′zar come really vex with Sha′drach, Me′shach, and A·bed′ne·go sotey e change face* for them, and e command say make them make the fire hot seven times pass as e suppose hot.
20 E command some of the strong men for im army make them tie Sha′drach, Me′shach, and A·bed′ne·go and throw them for inside the fire wey de burn well-well.*
21 So them tie this men when them still wear their dress, caps, and all the other cloths wey them wear, and them throw them for inside the fire wey de burn well-well.*
22 Because the command of the king really harsh and the fire overhot no be small, the men wey carry Sha′drach, Me′shach, and A·bed′ne·go go there, na them the heat of the fire kill.
23 But this three men, Sha′drach, Me′shach, and A·bed′ne·go, fall for inside the fire wey de burn well-well as them still tie them.
24 Then King Neb·u·chad·nez′zar come de fear and quick-quick e stand up and tell the people wey get high position say: “No be three men we tie and throw for inside fire?” Them answer the king say: “Yes, O king.”
25 E talk say: “See! I de see four men wey dey free de waka for inside the fire, and the fire no burn them, and the fourth one be like son of the gods.”
26 Neb·u·chad·nez′zar near the door of the fire wey de burn well-well* and talk say: “Sha′drach, Me′shach, and A·bed′ne·go, una wey be servants of the God Wey High Pass, make una come out and come here!” Then Sha′drach, Me′shach, and A·bed′ne·go come out from inside the fire.
27 And the satraps, government officers, governors, and the people wey get high position wey de work with the king wey be gather for there, see say the fire no do this men anything for body;* no single hair for their head even burn small, their cloths wey them wear ontop no change, and no smell of fire even dey their body.
28 Then Neb·u·chad·nez′zar talk say: “Make the God of Sha′drach, Me′shach, and A·bed′ne·go get praise, wey send im angel and save im servants. Them trust-am and no obey the command of the king, and them ready to die* instead of them to serve or worship any god apart from their own God.
29 So I de command say anybody, nation, or language group wey talk anything against the God of Sha′drach, Me′shach, and A·bed′ne·go, them go cut them to pieces and turn their houses to public toilets;* because e no get any other god wey fit save like this one.”
30 Then the king make Sha′drach, Me′shach, and A·bed′ne·go to get high position* for the area of Babylon.
Footnotes
^ About 27 m (88 ft).
^ About 2.7 m (8.8 ft).
^ Or “furnace.” Check the part, Meaning of Words.
^ Or “and lie to spoil the name of.”
^ Or “furnace.” Check the part, Meaning of Words.
^ Or “furnace.” Check the part, Meaning of Words.
^ Or “furnace.” Check the part, Meaning of Words.
^ Or “sotey im character change finish.”
^ Or “furnace.” Check the part, Meaning of Words.
^ Or “furnace.” Check the part, Meaning of Words.
^ Or “furnace.” Check the part, Meaning of Words.
^ Or “no strong pass this men.”
^ Or “and them surrender their body.”
^ Or e fit be, “where them de troway dirty; place wey them de gather animal shit put.”
^ Or “make Shadrach, Meshach, and Abednego to grow.”
