“NAGKAADA duro nga kasamok katapos han eleksyon kay nagprotesta an napirde nga partido, salit yinukot nga Saksi ni Jehova an napiritan bumaya ha ira mga balay,” siring ni François, tigurang ha usa nga pobre nga nasud. “Nagkulang an suplay han pagkaon ngan medisina, ngan kon may-ada man, mahal gud ito. Nagsara an mga bangko, ngan naubosan hin kwarta o nag-off-line an mga ATM machine.”

An kabugtoan ha sanga nga opisina nagdul-ong dayon hin kwarta ngan mga suplay para ha kabugtoan nga nag-ibakwit ha mga Kingdom Hall ha bug-os nga nasud. An magkontra nga partido nagbutang hin mga checkpoint, pero tungod kay maaram hira nga neutral gud an mga Saksi, kasagaran na nga ginpapaagi nira an mga awto han sanga nga opisina.

“Samtang tipakadto kami ha usa nga Kingdom Hall, may mga nagpusil ha amon awto,” siring ni François. “Pero waray kami maigo. Han nakita namon an usa nga armado nga sundalo nga nagdadalagan tidaop ha amon, igin-atras dayon namon an awto ngan ginpaspasan an pagpadalagan pabalik ha sanga nga opisina. Nagpapasalamat gud kami kan Jehova nga waray kami mamatay. Kinabuwasan, 130 nga kabugtoan an talwas nga nakaabot hito nga Kingdom Hall. An pipira kumadto ha sanga nga opisina, ngan ginpanginano namon an ira espirituwal ngan materyal nga panginahanglan tubtob nga natapos an kasamok.”

“Katapos hito nga panhitabo, an sanga nga opisina nakakarawat hin mga surat tikang ha kabugtoan ha bug-os nga nasud nga nagpapahayag han ira daku nga pagpasalamat,” siring ni François. “An ira pakaeksperyensya kon paonan-o hira ginbuligan han kabugtoan tikang ha iba-iba nga lugar, nagparig-on han ira pagsarig kan Jehova.”

Ha panahon han mga kalamidad, diri kita nasiring ha nanginginahanglan nga kabugtoan nga “magkaada unta kamo mga bado ngan pagkaon.” (San. 2:15, 16) Lugod, nangangalimbasog kita nga buligan hira nga magkaada han ira pisikal nga mga panginahanglan. Ha pariho nga paagi, han hinbaroan han mga disipulo nga magkakaada gutom ha siyahan nga siglo, “nagdesisyon [hira] nga magpadara hin ayuda ha kabugtoan ha Judea uyon han maaakos han tagsa ha ira.”—Buh. 11:28-30.

Sugad nga mga surugoon ni Jehova, andam kita bumulig ha materyal nga paagi ha mga nanginginahanglan. Kondi an mga tawo may-ada liwat espirituwal nga panginahanglan. (Mat. 5:3) Basi mabuligan hira nga masantop nga may-ada hira hito nga panginahanglan ngan matagbaw ito, ginsugo ni Jesus an iya mga sumurunod nga manhimo hin mga disipulo. (Mat. 28:19, 20) Ginagamit naton an kadak-an han aton panahon, kusog, ngan panag-iya basi tumanon ito nga sugo. Sugad nga organisasyon, ginagamit naton an pipira nga donasyon basi buligan adton nanginginahanglan hin materyal nga bulig, kondi an mga donasyon ginagamit gud labi na para ha pagpauswag ha mga buruhaton may kalabotan ha Ginhadian ngan ha pagsangyaw han maopay nga sumat. Hito nga paagi, iginpapakita naton an aton gugma ha Dios ngan ha aton mga amyaw.—Mat. 22:37-39.

Adton nasuporta ha bug-os-kalibotan nga buruhaton han mga Saksi ni Jehova makakasiguro nga an ira mga donasyon ginagamit ha husto ngan ha pinakamaopay nga paagi. Makakabulig ka ba ha nanginginahanglan nga kabugtoan? Karuyag mo ba suportahan an panhimo hin disipulo nga buruhaton? Kon oo, “ayaw ighawid an kaopayan ha ira nga hintutungdan hini, kon an gahum ha pagbuhat hini aada ha imo kamot.”—Prob. 3:27.