An Pagtagad han Dios ha mga Patay

MAKASURUBO gud an kamatyi hin usa nga hinigugma. Diri gud maisaysay an duro nga kasubo, kamingaw, ngan pag-abat hin kawad-i. Ha kamatay han usa nga hinigugma, mahimo nga an usa ka tawo umabat hin kawaray-mahihimo, tungod kay bisan ano pa kadaku an iya bahandi, gahum, o impluwensya, waray usa dinhi ha tuna yana nga makakabanhaw ha usa nga namatay.

Kondi, naiiba an pagtagad han aton Maglalarang. Tungod kay hiya an nagporma han siyahan nga tawo tikang ha tapotapo han tuna, mahihimo liwat niya nga larangon-utro an patay nga tawo. Tungod hini, gintatagad han Dios an mga patay nga sugad hin buhi hira. Mahitungod han matinumanon nga mga surugoon ha kadaan nga panahon nga nagkamatay, hi Jesus nagsiring: ‘Para ha Dios, hira ngatanan nabubuhi.’—Lukas 20:38.

Samtang nakanhi pa ha tuna, gintagan hi Jesus hin gahum ha pagbanhaw ha mga patay. (Juan 5:21) Salit, an pagtagad niya hadton nagkamatay nga matinumanon pariho han pagtagad han iya Amay. Pananglitan, han namatay an iya sangkay nga hi Lasaro, hi Jesus nagsiring ha iya mga disipulo: “Ako tikadto pagpukaw ha iya, tikang ha iya pagkaturog.” (Juan 11:11) Ha panhunahuna han tawo, patay na hi Lasaro, kondi ha panhunahuna ni Jehova ngan ni Jesus, nakaturog la hi Lasaro.

Ilarom han pagmando han Ginhadian ni Jesus, magkakaada “pagkabanhaw han mga minatay han mga magtadong ngan diri man magtadong.” (Buhat 24:15) Ha maabot nga panahon, adton mga binanhaw makarawat hin edukasyon tikang ha Dios ngan magkakaada paglaom nga kinabuhi nga waray kataposan dinhi ha tuna.—Juan 5:28, 29.

Oo, an kamatay han usa nga hinigugma mahimo magresulta hin duro nga kasakit ngan kabidoan, nga bangin magpadayon ha sulod hin mga katuigan. Kondi, an paghibaro mahitungod han pagtagad han Dios ha mga patay makakaliaw gud ha aton ngan makakahatag ha aton hin paglaom.—2 Korinto 1:3, 4.