Introduksyon

Para ha Nahigugma kan Jehova:

“Kamo mahibabaro han kamatuoran, ngan an kamatuoran magluluwas ha iyo,” nagsiring hi Jesus. (Juan 8:32) Makapadasig gud ini nga mga pulong! Oo, posible hibaroan an kamatuoran, bisan hinin makuri nga “kataposan nga mga adlaw” diin nagsasarang an kabuwaan. (2 Timoteo 3:1) Nahinunumdoman mo ba an siyahan nga higayon nga nasantop mo an kamatuoran sugad han pagkasaysay ha Pulong han Dios? Makalilipay gud adto nga eksperyensya!

Kondi, sugad nga importante an pagkaada husto nga kahibaro han kamatuoran ngan an regular nga pakigbahin ha pagsumat hito ha iba, importante liwat nga gumawi kita uyon ha kamatuoran. Basi mabuhat ito, kinahanglan magpabilin kita ha gugma han Dios. Ano an nahiuupod hini? Ini nga pakiana ginbaton han ginsiring ni Jesus ha gab-i antes hiya namatay. Ginsidngan niya an iya magtinumanon nga apostol: “Kon iyo tipigan an akon mga sugo, kamo mabibilin han akon paghigugma; sugad gud han akon pagtipig han mga sugo han akon Amay, ngan ako napabilin ha iya higugma.”​—Juan 15:10.

Tigamni nga nagpabilin hi Jesus ha gugma han Dios pinaagi ha pagtuman han mga sugo han iya Amay. Naaplikar liwat ito ha aton yana. Basi makagpabilin ha gugma han Dios, kinahanglan magkinabuhi kita uyon ha kamatuoran kada adlaw. Hito mismo nga gab -i, hi Jesus nagsiring: “Kon kamo maaram hini nga mga bagay, mga palaran kamo, kon iyo pagbuhaton.”​—Juan 13:17.

Sinsero nga naglalaom kami nga ini nga publikasyon makabulig ha imo basi padayon nga maiaplikar mo an kamatuoran ha imo kinabuhi, ngan hito nga paagi makakapabilin ka “ha gugma han Dios” samtang ginpapamulat an “kinabuhi nga waray kataposan.”​—Judas 21.

Nagmamando nga Lawas han Mga Saksi ni Jehova