Santiago 1:1-27
1 Tikang kan Santiago, nga uripon han Dios ngan han Ginoo nga hi Jesu-Kristo, para ha ngatanan nga 12 ka tribo nga nagpatlaag ha iba-iba nga lugar:
Nangungumusta ako ha iyo ngatanan.
2 Mga kabugtoan ko, malipay kamo kon nakakaeksperyensya kamo hin magkalain-lain nga pagsari,
3 kay maaram kamo nga an nasarihan nga kalidad han iyo pagtoo nagbubunga hin pagpailob.
4 Pabay-i nga matuman han pagpailob an katuyoan hito, basi magin perpekto kamo ngan magin maopay ha ngatanan nga paagi, nga waray kulang nga bisan ano.
5 Salit kon may bisan hin-o ha iyo nga kulang hin kinaadman, padayon nga mangaro hiya ha Dios, kay hura nga nahatag Hiya ha ngatanan ngan diri nasisina,* ngan ihahatag ito ha iya.
6 Pero padayon nga mangaro hiya nga may pagtoo, nga diri gud nagruruhaduha, kay hiya nga nagruruhaduha pariho hin balud ha dagat nga gindadara-dara han hangin ngan ginpapalid-palid.
7 Ha pagkamatuod, ito nga tawo diri angay maglaom nga may makakarawat hiya nga bisan ano tikang kan Jehova;
8 maruhaduhaon hiya, diri marig-on ha ngatanan nga iya paagi.
9 Kondi sadang malipay an pobre nga bugto kay ginpahitaas hiya,
10 ngan an riko* kay ginpaubos hiya, tungod kay mamamatay hiya sugad hin bukad han tanom.
11 Kay pagsirang han adlaw, an duro nga kapaso hito nakakalaya han mga tanom, ngan an bukad hito nahuhulog ngan diri na ito makaruruyag pagkit-on. Ha pariho nga paagi, an riko nga tawo mamamatay samtang nagpapadayon han iya mga buruhaton.
12 Malipayon an tawo nga padayon nga nag-iilob han pagsari, kay kon uyonan hiya, makakarawat niya an korona nga kinabuhi nga iginsaad ni Jehova ha mga nagpapadayon ha paghigugma ha iya.
13 Kon an usa nakakaeksperyensya hin pagsari, kinahanglan diri hiya magsiring: “Ginsasarihan ako han Dios.” Kay an Dios diri masasarihan pinaagi han maraot nga mga butang ngan diri liwat niya ginsasarihan an bisan hin-o.
14 Pero an kada tagsa nasasarihan kon nadadani ngan nasusulay hiya han iya kalugaringon nga hingyap.
15 Ngan an hingyap, kon igburod na, nanganganak hin sala; ngan an sala, kon nabuhat na, nagriresulta hin kamatayon.
16 Ayaw kamo palimbong, hinigugma ko nga kabugtoan.
17 An tagsa nga maopay nga regalo ngan an tagsa nga perpekto nga hatag nagtitikang ha igbaw, kay tikang ito ha Amay han mga lamrag ha kalangitan nga diri nag-iiba o nagbabag-o, diri pariho han nagbuburobag-o nga mga lambong.*
18 Kaburut-on niya nga mabuhi kita pinaagi han pulong han kamatuoran, basi kita magin usa nga klase han una nga mga bunga han iya mga ginhimo.
19 Sadang niyo hibaroan ini, hinigugma ko nga kabugtoan. An tagsa kinahanglan andam mamati, diri magdali-dali pagyakan, diri dayon masina;
20 kay an kasina han tawo diri uyon ha katadongan han Dios.
21 Salit isalikway an ngatanan nga kahugawan ngan an komon nga karaotan, ngan mapainubsanon nga karawata an pulong nga igintatanom ha iyo nga makakatalwas han iyo mga kalag.
22 Kondi magin magburuhat kamo han pulong, ngan diri parapamati la, nga ginlilimbongan an iyo kalugaringon pinaagi han sayop nga pangatadongan.
23 Kay kon an bisan hin-o parapamati han pulong, ngan diri magburuhat, ini hiya pariho hin tawo nga nagkikita han iya nawong ha espiho.
24 Ginkikita niya an iya kalugaringon, pero pagbaya niya nangangalimot dayon hiya kon ano nga klase hiya hin tawo.
25 Pero hiya nga nagkikita hin maopay han perpekto nga balaud nga naghahatag hin kagawasan ngan nagpapadayon hito, nagigin magburuhat han buruhaton, diri limtanon nga parapamati, ngan magigin malipayon hiya ha pagbuhat hito.
26 Kon an bisan hin-o nga tawo naghuhunahuna nga magsiringba hiya han Dios, pero diri niya ginkukontrol* an iya dila, ginlilimbongan niya an iya kasingkasing ngan waray pulos an iya pagsingba.
27 An paagi han pagsingba nga limpyo ngan waray-hugaw ha pagkita han aton Dios ngan Amay amo ini: an pagmangno ha mga ilo ngan mga balo nga babaye ha ira kasakitan, ngan an pagpabilin nga waray buring tikang ha kalibotan.
Mga footnote
^ O “diri nagbibiling hin sayop.”
^ O “mayaman.”
^ O “ha iya waray pagbag-o o pagbalhin han lambong” o dagaw.
^ O “ginrirendahan.”
