Santiago 2:1-26
2 Mga kabugtoan ko, diri ba kamo nagpapakita hin paboritismo samtang nagtitipig han pagtoo ha aton mahimayaon nga Ginoo nga hi Jesu-Kristo?
2 Kay kon may tawo nga sumulod ha iyo katirok nga may bulawan nga mga singsing ha iya mga tudlo ngan nakasul-ot hin maopay gud nga bado, pero may sumulod liwat nga pobre nga mahugaw an bado,
3 ginpapaboran ba niyo an nakasul-ot hin maopay gud nga bado ngan ginsisidngan: “Lingkod dinhi hinin maopay nga pwesto,” ngan ginsisidngan ba niyo an pobre: “Tindog la,” o “Lingkod dida ha ubos han tungtongan han akon mga tiil”?
4 Kon amo, diri ba may ginpapaurog kamo ngan diri ba nagigin mga hukom kamo nga naghihimo hin maraot nga mga desisyon?
5 Pamati kamo, hinigugma ko nga kabugtoan. Diri ba an mga pobre ha paghunahuna han kalibotan amo an ginpili han Dios nga magin riko ha pagtoo ngan manurunod han Ginhadian nga iya iginsaad ha mga nahigugma ha iya?
6 Pero diri niyo ginpapasidunggan an mga pobre. Diri ba an mga riko an nagtatalumpigos ha iyo ngan nagdadanas ha iyo ngadto ha mga korte?
7 Diri ba ginpapasiparahan nira an maopay nga ngaran nga igintawag ha iyo?
8 Kon iyo yana gintutuman an balaud han Hadi sumala hini nga kasuratan: “Higugmaa an imo igkasi-tawo sugad ha imo kalugaringon,” maopay gud an iyo ginbubuhat.
9 Pero kon padayon nga nagpapakita kamo hin paboritismo, nakakasala kamo, ngan ginsasaway kamo han balaud sugad nga mga paratalapas.
10 Kon an bisan hin-o nasugot han bug-os nga Balaud pero nagtalapas ha usa hito, nagigin matinalapason hiya hito ngatanan.
11 Kay hiya nga nasiring: “Diri ka mag-adulteryo,”* nasiring liwat: “Diri ka magpatay.” Yana kon diri ka nag-aadulteryo pero magpatay ka, nagigin paratalapas ka han balaud.
12 Padayon kamo nga magyakan ngan gumawi pariho ha mga huhukman sumala ha balaud han mga tawo nga may kagawasan.
13 Kay an waray kalooy paghuhukman hin waray kalooy. An kalooy mas labaw ha paghukom.
14 Mga kabugtoan ko, ano an kapulsanan kon an usa nasiring nga may pagtoo hiya pero waray hiya mga buhat? Ito nga pagtoo diri makakatalwas ha iya, diri ba?
15 Kon may bugto nga lalaki o babaye nga waray iginbabado* ngan igo nga pagkaon para hito nga adlaw,
16 ngan usa ha iyo an nasiring ha ira: “Lakat nga mamurayawon, magkaada unta kamo mga bado ngan pagkaon ha kada adlaw,” pero waray niyo hira tagi han ira ginkikinahanglan para ha ira lawas, ano an kapulsanan hito?
17 Sugad man, an pagtoo nga waray mga buhat patay.
18 Pero bangin may magsiring: “May pagtoo ka, ngan ako may mga buhat. Ipakita ha akon an imo pagtoo nga waray mga buhat, ngan ipapakita ko ha imo an akon pagtoo pinaagi han akon mga buhat.”
19 Natoo ka nga usa la an Dios, diri ba? Maopay gud ito. Pero an mga demonyo natoo liwat ngan nangungurog.
20 O ignorante nga tawo, karuyag mo ba hin ebidensya nga an pagtoo nga waray mga buhat waray pulos?
21 Diri ba hi Abraham nga aton amay iginpahayag nga matadong pinaagi han mga buhat katapos niya ighalad ha halaran hi Isaac nga iya anak?
22 Maaram ka nga nagkakauyon an iya pagtoo ngan an iya mga buhat, ngan an iya pagtoo nagin perpekto pinaagi han iya mga buhat,
23 ngan natuman an kasuratan nga nasiring: “Hi Abraham nagpakita hin pagtoo kan Jehova, ngan tungod hito iginpahayag hiya nga matadong,” ngan gintawag hiya nga “sangkay ni Jehova.”
24 Maaram kamo nga an tawo igpapahayag nga matadong pinaagi han mga buhat, ngan diri pinaagi han pagtoo la.
25 Ha pariho nga paagi, diri ba hi Rahab liwat nga puta iginpahayag nga matadong pinaagi han mga buhat, katapos niya abiabihon an mga mensahero ngan palakton hira ha iba nga aragian?
26 Ha pagkamatuod, sugad la nga an lawas nga waray espiritu patay, an pagtoo liwat nga waray mga buhat patay.
