Santiago 3:1-18
3 Mga kabugtoan ko, diri damu ha iyo an magigin mga magturutdo, kay maaram kita nga makarawat kita hin mas mabug-at nga paghukom.*
2 Kita ngatanan damu ka beses nga nagsasayop.* Kon may bisan hin-o nga diri nagsasayop ha pulong, perpekto hiya nga nakakakontrol han iya bug-os nga lawas.
3 Kon ginbubutangan naton hin renda an baba han kabayo basi sumugot ito ha aton, napapasunod naton an bug-os nga lawas hito.
4 Kitaa liwat an barko, bisan kon daku gud ito ngan ginpapadalagan han makusog nga hangin, ginmamaniobra ito han gutiay gud nga timon ngadto ha karuyag kadtoan han timonil.
5 Sugad man, an dila usa ka gutiay nga bahin han lawas pero naghihimo hin sobra nga mga paghambog. Kitaa! An gutiay nga kalayo nakakasunog han haluag nga kagurangan!
6 Ngan an dila pariho hin kalayo. Ha ngatanan nga bahin han aton lawas, an dila an puno han karaotan, kay nakakahugaw ito han bug-os nga lawas ngan nakakasunog han bug-os nga pagkinabuhi ngan ginpapalaga ito han Gehenna.*
7 An ngatanan nga klase han ihalas nga hayop, tamsi, reptilya, ngan an mga may kinabuhi ha dagat ginpapaanad ngan napapaanad han katawohan.
8 Pero waray tawo nga makakapaanad han dila. Diri ito nakukontrol ngan nakakadaot ito, ngan puno hin makamaratay nga hilo.
9 Ginagamit naton ito ha pagdayaw kan Jehova, an aton Amay, pero ginagamit liwat naton ito ha panhimaraot ha mga tawo nga ginhimo “pariho han dagway han Dios.”
10 Tikang ha usa nga baba nagawas an pagdayaw ngan panhimaraot.
Mga kabugtoan ko, diri ito angay mahitabo.
11 An tab-ang nga tubig* ngan an mapait nga tubig diri nagawas ha usa la nga burabod, diri ba?
12 Mga kabugtoan ko, an igera diri makakapamunga hin mga olibo o an puno han ubas diri makakapamunga hin mga igera, diri ba? Sugad man an maasin nga tubig diri makakahatag hin tab-ang nga tubig.
13 Hin-o ha iyo an makinaadmananon ngan masinabuton? Ipakita niya ito ha iya maopay nga panggawi pinaagi han mga buhat nga may pagkamalumo nga resulta han kinaadman.
14 Pero kon ha iyo kasingkasing may pangabugho ngan may tendensya ha pagin makiawayon, ayaw kamo paghinambog ngan pagbinuwa kontra han kamatuoran.
15 Diri ito an kinaadman nga nagtitikang ha langit, lugod kalibotanon ito, hayupnon, ngan kanan demonyo.
16 Kay kon diin may pangabugho ngan tendensya ha pagin makiawayon, may kasamok liwat ngan ngatanan nga maraot nga buhat.
17 Pero an kinaadman nga tikang ha langit, una ha ngatanan putli, mamurayawon, makatadunganon, andam ha pagsugot, puno hin kalooy ngan mag-opay nga bunga, waray ginpapaurog, ngan diri-hipokrito.
18 Dugang pa, an liso han bunga han katadongan igintatanom han mga nakikigmurayaw samtang murayaw an mga kahimtang.
Mga footnote
^ O “mas istrikto nga paghukom.”
^ Ha literal, “nahipapakdol.” Kitaa an “Kahipakdol” ha Glossary.
^ Kitaa an Apendise 9.
^ Ha literal, “matam-is.”
