Santiago 4:1-17
4 Ano an gintikangan han iyo mga girra ngan araway? Diri ba nagtikang ito ha iyo makasasala nga mga hingyap nga nag-aaragway ha sulod niyo?*
2 Naghihingyap kamo, pero waray kamo nakakarawat. Padayon kamo nga nanmamatay ngan naiipa, kondi waray la gihapon kamo nakukuha. Padayon kamo nga nag-aaraway ngan naggigirra. Waray kamo nakakarawat kay diri kamo nangangaro.
3 Kon nangangaro kamo, waray kamo nakakarawat kay sayop an iyo katuyoan ha pangaro. Karuyag niyo gamiton ito para ha iyo makasasala nga mga hingyap.
4 Mga nag-aadulteryo,* diri ba kamo maaram nga an pakigsangkay ha kalibotan pakig-away ha Dios? Salit bisan hin-o nga karuyag magin sangkay han kalibotan naghihimo han iya kalugaringon nga kaaway han Dios.
5 O ha iyo ba paghunahuna waray hinungdan an ginsisiring ha kasuratan: “An disposisyon* nga aadi ha sulod naton padayon nga naghihingyap nga may kaawa”?
6 Pero mas labaw hito an diri-matupngan nga pagkabuotan nga iya iginhahatag. Salit nasiring ito: “An Dios nakontra ha mga mapahitas-on, kondi gintatagan niya hin diri-matupngan nga pagkabuotan an mga mapainubsanon.”
7 Salit magpasakop kamo ha Dios; pero atohi an Yawa, ngan mabaya hiya ha iyo.
8 Magin duok kamo ha Dios, ngan magigin duok hiya ha iyo. Limpyohi an iyo mga kamot, kamo nga magpakasasala, ngan putlia an iyo mga kasingkasing, kamo nga maruhaduhaon.
9 Antosa an kasakitan, mabido kamo ngan magtangis. An iyo pagtawa saliwani hin kabido, ngan an iyo kalipay saliwani hin kasubo.
10 Magpaubos kamo ha atubangan ni Jehova, ngan iya kamo papahitas-on.
11 Mga kabugtoan, ayaw na kamo pagyakan kontra ha usa kag usa. An nagyayakan kontra ha usa nga bugto o naghuhukom ha iya bugto nagyayakan kontra ha balaud ngan naghuhukom han balaud. Yana kon imo ginhuhukman an balaud, diri ka magburuhat han balaud kondi usa nga hukom.
12 May Usa nga humaratag han balaud ngan hukom, hiya nga nakakatalwas ngan nakakabungkag. Pero ikaw, hin-o ka nga naghuhukom ha imo igkasi-tawo?
13 Pamati yana, kamo nga nasiring: “Yana o buwas makadto kita hito nga syudad ngan maukoy didto hin usa ka tuig, ngan magninegosyo kita ngan makakaganansya,”
14 pero diri kamo maaram kon ano an mahitatabo ha iyo kinabuhi buwas. Kay alisngaw la kamo nga aada hin madaliay ngan katapos nawawara.
15 Lugod, angay kamo sumiring: “Kon kaburut-on ni Jehova, mabubuhi kita ngan bubuhaton naton ini o ito.”
16 Pero yana nagpapahitaas kamo ngan iyo ito iginhahambog. Ito ngatanan nga paghambog maraot.
17 Salit kon an usa maaram ha pagbuhat han husto pero diri niya ito ginbubuhat, nakakasala hiya.
Mga footnote
^ Ha literal, “ha mga bahin han iyo lawas.”
^ Karuyag sidngon, an mga diri-matinumanon ha Dios.
^ Ha literal, “espiritu.”
