Colosas 4:1-18
4 Mga agaron, tratara an iyo mga uripon ha matadong ngan maopay nga paagi, kay maaram kamo nga may Agaron liwat kamo ha langit.
2 Magpadayon ha pag-ampo, magpabilin nga nagmamata may kalabotan hito, ngan magin mapasalamaton.
3 Sugad man, ig-ampo liwat kami nga an Dios mag-abri hin purtahan para han pulong, basi maipasamwak namon an sagrado nga tinago mahitungod han Kristo; ha pagkamatuod, tungod hito aadi ako priso nga nakakadena,
4 basi maipahayag ko ito hin klaro sugad han angay ko himoon.
5 Padayon nga gumawi hin maaramon ha mga taga-gawas,* ngan gamita ha pinakamaopay nga paagi an iyo panahon.*
6 Magin buotan kamo pirme ha iyo pagyakan, sugad hin gintitimplahan ito hin asin. Kon buhaton niyo ini, mahibabaro kamo kon paonan-o mabaton ha tagsa nga tawo.
7 An ngatanan nga akon buruhaton isusumat ha iyo ni Tiquico, nga akon hinigugma nga bugto, matinumanon nga ministro, ngan igkasi-uripon ha Ginoo.
8 Pakakadaon ko hiya ha iyo basi hibaroan niyo an amon kahimtang, basi maliaw an iyo kasingkasing.
9 Upod niya hi Onesimo, nga akon maunungon ngan hinigugma nga bugto nga tikang ha iyo. Isusumat nira ha iyo an ngatanan nga nahitatabo didi.
10 Hi Aristarco nga akon igkasi-priso nangungumusta ha iyo, sugad man hi Marcos nga patod ni Bernabe, (mahitungod ha iya, nakarawat niyo an mga instruksyon nga abiabihon hiya kon kumada ha iyo,)
11 ngan hi Jesus nga gintatawag nga Justo, nga mga kaupod han mga tinuri. Hira la an akon igkasi-magburuhat para ha Ginhadian han Dios, ngan naghahatag gud hira hin daku nga pagliaw* ha akon.
12 Nangungumusta ha iyo hi Epafras nga tikang ha iyo, nga uripon ni Kristo Jesus. Pirme hiya nag-aampo hin sinsero para ha iyo, basi ha kataposan bug-os nga makatindog kamo ngan may marig-on nga pagsarig ha ngatanan nga kaburut-on han Dios.
13 Kay testigo ako nga nangangalimbasog gud hiya para ha iyo kaopayan ngan ha kaopayan han mga taga-Laodicea ngan taga-Hierapolis.
14 Nangungumusta ha iyo an hinigugma nga doktor nga hi Lucas, sugad man hi Demas.
15 Ipaabot an akon pangumusta ha kabugtoan ha Laodicea ngan kan Nimfa ngan ha kongregasyon nga nagkakatirok ha iya balay.
16 Ngan katapos basahon ha iyo ini nga surat, ipabasa liwat ini ha kongregasyon han mga taga-Laodicea, ngan basaha liwat niyo an surat nga akon iginpadara ha Laodicea.
17 Sumati liwat hi Arquipo: “Padayon nga magbantay basi matuman mo an sagrado nga buruhaton nga ginkarawat mo ha Ginoo.”
18 Ako, hi Pablo, ako mismo an nagsurat hini nga pangumusta. Hinumdumi niyo pirme an akon pagin priso nga nakakadena. Hinaot makarawat niyo an diri-matupngan nga pagkabuotan.
Mga footnote
^ O “diri membro han Kristiano nga kongregasyon.”
^ Ha literal, “palita an panahon.”
^ O “makaparig-on nga bulig.”
