Colosas 3:1-25
3 Kondi kon ginbanhaw kamo kahiusa han Kristo, padayon nga talinguhaa an mga butang ha kahitas-an, diin nalingkod an Kristo ha too han Dios.
2 Pirme niyo hunahunaa an mga butang ha kahitas-an, diri an mga butang ha tuna.
3 Kay namatay kamo, ngan an iyo kinabuhi igintago kan Kristo kahiusa han Dios.
4 Kon igpahayag an Kristo nga aton kinabuhi, kamo liwat igpapahayag kahiusa niya ha himaya.
5 Salit pataya an mga bahin han iyo lawas nga tikang ha tuna may kalabotan ha imoralidad,* kahugaw, hingyap ha pakighilawas, maraot nga hingyap, ngan kahakog, nga amo an idolatriya.
6 Tungod hito nga mga butang maabot an kangalas han Dios.
7 Sugad liwat hito an iyo paggawi ha iyo pagkinabuhi hadto.
8 Kondi yana kinahanglan isalikway niyo ini ngatanan: an kangalas, kasina, karaotan, nakakasakit nga mga pulong, ngan an malaw-ay nga istorya ha iyo baba.
9 Diri kamo magbuwa ha usa kag usa. Hukasa niyo an daan nga personalidad* pati an mga buhat hito,
10 ngan isul-ot niyo an bag-o nga personalidad, nga pinaagi han husto nga kahibaro nababag-o uyon ha dagway han Dios nga naghimo hito.
11 Dida hito waray Griego o Judio, waray turi o diri-turi, waray taga-iba nga nasud, Escita,* uripon, o may kagawasan nga tawo, kondi an Kristo an ngatanan nga butang ngan aada ha ngatanan.
12 Uyon hito, sugad nga mga pinili, baraan ngan hinigugma han Dios, isul-ot niyo an pagpalangga nga may kalooy, pagkabuotan, pagpaubos, pagkamalumo, ngan pagkapasensyoso.*
13 Padayon nga mag-inantosay ngan kinasingkasing nga magpinasayloay kamo bisan kon may hinungdan an usa ha pagreklamo kontra ha iba. Sugad la nga hi Jehova kinasingkasing nga nagpasaylo ha iyo, kinahanglan ito liwat an iyo buhaton.
14 Pero labot hini ngatanan, isul-ot niyo an gugma, kay ini an hingpit nga bugkos han pagkaurosa.
15 Dugang pa, an kamurayawan han Kristo magmando unta ha iyo mga kasingkasing, kay ha pagkamatuod gintawag kamo para hito nga kamurayawan ha usa nga lawas. Ngan ipakita an iyo pagkamapasalamaton.
16 Paukya dida ha iyo an pulong han Kristo nga naghahatag ha iyo hin bug-os nga kinaadman. Padayon nga magtinutdoay ngan magparig-onay kamo pinaagi hin mga salmo, pagdayaw ha Dios, pagkanta hin espirituwal nga mga kanta upod an pagpasalamat, ngan kinasingkasing nga magkanta kamo kan Jehova.
17 Ngan bisan ano nga iyo ginyayakan o ginbubuhat, himoa niyo an ngatanan ha ngaran han Ginoo nga hi Jesus, ngan magpasalamat kamo ha Dios nga Amay pinaagi ha iya.
18 Mga asawa, magpasakop kamo ha iyo bana, kay ito an angay ha mga sumurunod han Ginoo.
19 Mga bana, padayon nga higugmaa an iyo asawa ngan ayaw kasina hin sobra ha iya.
20 Mga anak, magin masinugtanon kamo pirme ha iyo mga kag-anak, kay nakakalipay gud ito ha Ginoo.
21 Mga amay, ayaw pag-aringita an iyo mga anak, basi diri hira masubo.*
22 Mga uripon, magin masinugtanon kamo pirme ha iyo tawhanon* nga mga agaron, diri la kon nagkikita hira, nga sugad hin nagpapalipay kamo ha mga tawo, lugod buhata niyo ito nga may sinsero nga kasingkasing ngan kahadlok kan Jehova.
23 Anoman an iyo ginbubuhat, bug-os-kalag* nga buhata ito nga sugad hin para kan Jehova, ngan diri para ha mga tawo,
24 kay maaram kamo nga tikang kan Jehova kamo makarawat han panurundon sugad nga balos. Magpauripon kamo ha Agaron, an Kristo.
25 An nagbubuhat hin sayop sigurado nga sisirotan tungod han sayop nga iya ginbuhat, ngan waray ginpapaurog an Dios.
Mga footnote
^ Kitaa an footnote ha Mat 5:32.
^ Ha literal, “tawo.”
^ An “Escita” nagpapasabot hin diri-sibilisado nga katawohan.
^ O “hilawig nga pagpailob.”
^ O “manluya.”
^ Ha literal, “unudnon.”
^ O “ha iyo bug-os nga kasingkasing.”
