Colosas 2:1-23
2 Karuyag ko nga masantop niyo an akon duro nga pakig-away para ha iyo ngan ha mga taga-Laodicea ngan ha mga waray makakita hin personal ha akon.*
2 Ginbubuhat ko ini basi maliaw an ira kasingkasing, ngan magkaurosa hira ha gugma ngan magkaada han ngatanan nga karikohan nga resulta han bug-os nga pagkasigurado han ira pagsabot, basi magkaada hira husto nga kahibaro ha sagrado nga tinago han Dios, nga amo an Kristo.
3 An ngatanan nga bahandi han kinaadman ngan kahibaro nakatago hin maopay ha iya.
4 Ginsisiring ko ini basi waray tawo nga makalimbong ha iyo pinaagi hin makakombinse nga mga argumento.
5 Oo, waray ako dida, pero aada ha iyo an akon hunahuna,* ngan nalilipay ako pagkita han iyo pagkaorganisado ngan han karig-on han iyo pagtoo ha Kristo.
6 Salit, sugad la nga ginkarawat niyo an Ginoo nga hi Kristo Jesus, padayon nga magkinabuhi kamo nga kahiusa niya,
7 nga nakagamot ngan natindog ha iya ngan marig-on ha pagtoo, sugad la han igintutdo ha iyo. Ngan kon magpapasalamat kamo ha Dios, mapuno gud unta kamo hin pagtoo.
8 Siguroha nga waray magbihag* ha iyo pinaagi han pilosopiya ngan waray pulos nga panlimbong nga iginbasar ha tradisyon han tawo, ha basihan nga mga prinsipyo han kalibotan ngan diri uyon ha katutdoan han Kristo.
9 Kay an ngatanan nga kalidad han Dios aada ha iya.
10 Salit may-ada kamo han ngatanan pinaagi ha iya, nga amo an ulo han ngatanan nga gobyerno ngan awtoridad.
11 Tungod han iyo relasyon ha iya ginturi kamo, diri pinaagi han mga kamot han tawo kondi pinaagi han pagkuha han makasasala nga hingyap han lawas. Sugad hini an pagturi ha mga surugoon han Kristo.
12 Kay iginlubong kamo upod niya pinaagi ha pagpabawtismo pariho han iya bawtismo, ngan ginbanhaw liwat kamo ngan nagin kahiusa niya tungod han iyo pagtoo ha gamhanan nga buhat han Dios, nga nagbanhaw ha iya tikang ha mga patay.
13 Dugang pa, bisan kon hadto patay kamo tungod han iyo mga pagtalapas ngan han iyo pagin diri-turi ha pisikal, ginbuhi kamo han Dios basi magin kahiusa han Kristo. Mahigugmaon nga ginpasaylo niya an mga pagtalapas naton ngatanan
14 ngan bug-os nga ginpara an sinurat nga dokumento nga ginkukompwesto hin mga sugo ngan nakontra ha aton. Ginkuha niya ito pinaagi ha pagraysang hito ha pasakitan nga kahoy.*
15 Pinaagi hito* ginhuboan niya an mga gobyerno ngan mga awtoridad ngan iginpakita hira ha katawohan sugad nga pirdido, ngan gindara hira sugad nga mga bihag ha martsa han kadaogan.
16 Salit ayaw niyo pasagdi nga hukman kamo han bisan hin-o mahitungod han iyo ginkakaon ngan gin-iinom o mahitungod han pagselebrar han piyesta o han gimata o han sabbath.*
17 Ito nga mga butang nagpapadagaw la han tiarabot nga mga butang, pero an reyalidad amo an Kristo.
18 Ayaw niyo pasagdi nga an premyo agawon ha iyo han bisan hin-o nga nalilipay ha pakunokuno nga pagpaubos ngan ha pagsingba ha mga anghel, nga “gin-iinsister” an mga butang nga iya nakita. Ha pagkamatuod, naghahambog hiya nga waray husto nga hinungdan tungod han iya makasasala nga panhunahuna,
19 ngan nabulag hiya ha ulo.* Pinaagi han ulo an bug-os nga lawas nasusuplayan ngan urosa nga nabubugkos pinaagi han mga kaluluthan ngan mga litid ngan natubo kay ginpapatubo ito han Dios.
20 Kon iginsalikway niyo an mga ideya han kalibotan ngan namatay kamo nga kahiusa han Kristo, kay ano nga nagkikinabuhi kamo nga sugad hin bahin pa kamo han kalibotan pinaagi han iyo padayon nga pagsunod hini nga mga sugo,
21 “Ayaw pagkuha, o pagtilaw, o pagkapot,”
22 kay ini nga mga butang nawawara kon gin-gagamit? Uyon ini ha mga sugo ngan katutdoan han mga tawo.
23 Ito nga mga butang nakikita pinaagi han pagsingba uyon ha kalugaringon nga karuyag ngan ha pakunokuno nga pagpaubos, ngan ha pagpakuri ha lawas, salit baga hin maaramon gud ito, pero waray ito pulos ha pag-ato ha mga hingyap han makasasala nga lawas.
Mga footnote
^ Ha literal, “makakita han akon nawong ha unod.”
^ Ha literal, “kaupod ako niyo ha espiritu.”
^ O “magdara ha iyo sugad nga iya biktima.”
^ Kitaa an Apendise 6.
^ Karuyag sidngon, an pasakitan nga kahoy.
^ Kitaa an “Sabbath” ha Glossary.
^ O “lider.”
