Colosas 1:1-29
1 Tikang kan Pablo, nga apostol ni Kristo Jesus pinaagi han kaburut-on han Dios, ngan kan Timoteo nga aton bugto,
2 para ha mga baraan ngan matinumanon nga kabugtoan ha Colosas nga kahiusa han Kristo:
Makarawat unta niyo an diri-matupngan nga pagkabuotan ngan kamurayawan tikang ha Dios nga aton Amay.
3 Pirme kami nagpapasalamat ha Dios nga Amay han aton Ginoo nga hi Jesu-Kristo kon nag-aampo kami para ha iyo,
4 kay nakabati kami mahitungod han iyo pagtoo kan Kristo Jesus ngan han iyo gugma ha ngatanan nga baraan
5 tungod han paglaom nga makarawat an igin-andam para ha iyo ha langit. Hinbatian na niyo an mahitungod hini nga paglaom pinaagi han mensahe han kamatuoran han maopay nga sumat
6 nga nakaabot ha iyo. Sugad la nga an maopay nga sumat namumunga ngan nag-uuswag ha bug-os nga kalibotan, sugad liwat hito an nahitatabo ha iyo, tikang ha adlaw nga hinbatian niyo ngan hinbaroan hin husto an kamatuoran mahitungod han diri-matupngan nga pagkabuotan han Dios.
7 Ito an iyo hinbaroan kan Epafras nga aton hinigugma nga igkasi-uripon, nga matinumanon nga ministro han Kristo ngan representante namon.
8 Nagsumat liwat hiya ha amon han iyo gugma ha espirituwal nga paagi.
9 Ito an hinungdan nga tikang ha adlaw nga hinbatian namon ito, waray kami undang ha pag-ampo para ha iyo ngan paghangyo nga mapuno unta kamo han husto nga kahibaro mahitungod han iya kaburut-on nga may bug-os nga kinaadman ngan pagsabot ha espirituwal nga mga butang,
10 basi magkinabuhi ha paagi nga inuuyonan ni Jehova basi mapalipay gud hiya samtang padayon nga namumunga kamo ha tagsa nga maopay nga buhat ngan nag-uuswag ha husto nga kahibaro mahitungod ha Dios.
11 Hinaot maparig-on kamo pinaagi han daku nga gahum uyon ha iya mahimayaon nga pagkagamhanan basi makaantos gud kamo nga may pagpailob ngan kalipay,
12 samtang nagpapasalamat kamo ha Amay nga binulig ha iyo nga magin kwalipikado nga makiangbit ha panurundon han mga baraan nga aada ha kalamrag.
13 Gintalwas kita niya tikang ha awtoridad han kasisidman ngan ginbalhin kita ngadto ha ginhadian han iya hinigugma nga Anak,
14 nga pinaagi ha iya natalwas kita tungod han lukat, nga nangangahulogan hin kapasayloan han aton mga sala.
15 Hiya an dagway han diri-nakikita nga Dios, an suhag han ngatanan nga hinimo han Dios,
16 kay pinaagi ha iya ginhimo an ngatanan nga iba nga butang ha langit ngan ha tuna, an mga butang nga nakikita ngan an mga butang nga diri-nakikita, mga trono man, mga pagmando, mga gobyerno, o mga awtoridad. An ngatanan nga iba nga butang ginhimo pinaagi ha iya ngan para ha iya.
17 Dugang pa, hiya an nauna hini ngatanan nga butang ngan pinaagi ha iya nahimo an ngatanan nga iba nga butang,
18 ngan hiya an ulo han lawas, an kongregasyon. Hiya an tinikangan, an suhag tikang ha mga patay, salit hiya an nauna han ngatanan nga butang;
19 kay karuyag han Dios nga an iya Anak magin kompleto han ngatanan nga butang,
20 ngan pinaagi ha iya maipahiuli ha Iya an ngatanan nga iba nga butang, mga butang man ito ha tuna o mga butang ha langit. Ini nga pakigmurayaw natutuman pinaagi han iya dugo nga inawas ha pasakitan nga kahoy.*
21 Ha pagkamatuod, kamo hadto bulag ha Dios ngan iya mga kaaway kay naghunahuna kamo hin magraot nga buhat,
22 pero yana iginpahiuli na kamo han Dios ha iya kalugaringon pinaagi han kamatayon han tawhanon nga lawas hito nga usa, basi kamo maipresentar nga baraan ngan waray-hugaw ngan waray maiaakusar ha iya atubangan.
23 Sigurado ito kon magpadayon kamo ha pagtoo, magpabilin nga natindog ha pundasyon, marig-on ngan diri nahisisimang tikang ha paglaom sumala han maopay nga sumat nga iyo hinbatian ngan iginsangyaw ha ngatanan nga hinimo han Dios ha ilarom han langit. Mahitungod hini nga maopay nga sumat, ako hi Pablo, nagin ministro.
24 Nalilipay ako yana ha akon mga pag-antos para ha iyo kaopayan, ngan waray pa maeksperyensyahi hin bug-os han akon lawas an mga kasakitan tungod han Kristo. Ini nga akon gin-aantos, para ini ha kaopayan han iya lawas, nga amo an kongregasyon.
25 Nagin ministro ako hini nga kongregasyon uyon ha pagkatinaporan nga iginhatag ha akon han Dios para ha iyo kaopayan basi maisangyaw hin bug-os an pulong han Dios
26 nga amo an sagrado nga tinago nga waray isumat ha naglabay nga mga sistema ngan mga henerasyon. Pero yana iginpahayag na ito ha iya mga baraan,
27 nga ha ira nalilipay an Dios nga ipahibaro an mahimayaon nga karikohan han sagrado nga tinago nga iginsusumat ha mga nasud, nga amo an Kristo nga kahiusa niyo, ngan an paglaom nga himayaon upod niya.
28 Aton hiya iginpapasamwak, ngan aton iginpapahamangno ngan igintututdo ha ngatanan an bug-os nga kinaadman, basi an tagsa nga tawo maipresentar naton nga bug-os nga kahiusa han Kristo.
29 Tungod hini, maduruto nga nagbubuhat ako, ngan nangangalimbasog gud ha bulig han iya gahum nga ginagamit niya ha akon.
Mga footnote
^ Kitaa an Apendise 6.
