1 Tesalonica 5:1-28
5 Yana mga kabugtoan, mahitungod han mga panahon ngan itinanda nga mga adlaw, diri na kinahanglan nga suratan pa kamo.
2 Kay maaram gud kamo nga an adlaw ni Jehova sigurado nga maabot sugad hin kawatan ha gab-i.
3 Ha panahon nga nagsisiniring hira: “Kamurayawan ngan kasigurohan!” tigda nga maabot ha ira an kabungkagan sugad han kasakit ha pagbatî han burod nga babaye, ngan diri gud hira makakapalagiw.
4 Pero kamo, mga kabugtoan, waray kamo ha kasisidman, salit diri kamo pariho han mga kawatan nga maaabtan hito nga adlaw,
5 kay kamo ngatanan mga anak han kalamrag ngan mga anak han adlaw. Diri kita kanan kagab-ihon o kanan kasisidman.
6 Salit diri kita magpinangaturog sugad han iba, lugod padayon kita nga mag-agma ngan tipigan naton an aton maopay nga panhunahuna.
7 Kay an mga nangangaturog kasagaran nga nakaturog ha gab-i, ngan an mga naghuhubog kasagaran nga nahuhubog ha gab-i.
8 Pero kita nga kanan adlaw, tipigan naton an aton maopay nga panhunahuna, nga sul-ot an kutamaya han pagtoo ngan gugma ngan an helmet han paglaom han katalwasan;
9 kay ginpili kita han Dios, diri basi makaeksperyensya han iya kangalas, kondi basi matalwas pinaagi han aton Ginoo nga hi Jesu-Kristo.
10 Namatay hiya para ha aton basi mabuhi kita kaupod niya, nagmamata man kita o nakaturog.
11 Salit padayon nga magdinasigay ngan magparig-onay kamo sugad han ginbubuhat na niyo.
12 Yana ginhahangyo namon kamo, mga kabugtoan, nga respetuhon niyo an mga kaupod niyo nga maduruto nga nagbubuhat ngan nangunguna ha iyo ha buruhaton han Ginoo ngan nagsasagdon ha iyo.
13 Magpakita kamo ha ira hin labaw ha kasagaran nga konsiderasyon ngan gugma tungod han ira buruhaton. Makigmurayaw kamo ha usa kag usa.
14 Ha luyo nga bahin mga kabugtoan, gin-aaghat namon kamo nga pahamangnoan* an mga sarawayon, liawon an mga nasusubo,* buligan an mga maluya, ngan pasensyahan an ngatanan.
15 Siguroha nga waray bisan usa nga bumulos hin maraot ha maraot nga ginbuhat han iba, lugod magbuhat pirme han maopay ha usa kag usa ngan ha iba.
16 Magmalipayon kamo pirme.
17 Padayon nga mag-ampo.
18 Magpasalamat kamo tungod han ngatanan nga butang kay ini an kaburut-on han Dios para ha iyo pinaagi kan Kristo Jesus.
19 Ayaw pagparonga an kalayo han espiritu.
20 Ayaw pagtamaya an mga tagna.
21 Siguroha an ngatanan nga butang. Buhata pirme an maopay.
22 Paglikay ha ngatanan nga klase han karaotan.
23 Hinaot an Dios mismo han kamurayawan bug-os nga magbaraan ha iyo. Ngan mga kabugtoan, hinaot an iyo espiritu, kalag, ngan lawas, nga mahimsog ha ngatanan nga bahin, magpabilin nga waray ikasaway ha presensya han aton Ginoo nga hi Jesu-Kristo.
24 Matinumanon hiya nga nagtatawag ha iyo, ngan sigurado nga tutumanon niya ito.
25 Mga kabugtoan, padayon nga ig-ampo kami niyo.
26 Kumustaha an ngatanan nga kabugtoan pinaagi hin minagburugto nga harok.
27 Ha ngaran han Ginoo, seryoso nga gin-oobligar ko kamo nga basahon ini nga surat ha ngatanan nga kabugtoan.
28 Hinaot makarawat niyo an diri-matupngan nga pagkabuotan han aton Ginoo nga hi Jesu-Kristo.
