1 Tesalonica 3:1-13
3 Salit han diri na namon naiilob ito, nahunahuna namon nga mas maopay kon ako la an magpabilin ha Atenas,
2 ngan amon ginsugo hi Timoteo, nga aton bugto ngan ministro han Dios nga nagsasangyaw han maopay nga sumat mahitungod han Kristo, basi parig-unon ngan liawon kamo ha iyo pagtoo,
3 basi diri mabay-og* an bisan hin-o tungod hini nga mga kasakitan. Kay kamo mismo maaram nga diri kita makakalikay ha pag-antos han sugad nga mga pagtimaraot.
4 Bisan han kaupod pa kami niyo, ginsumatan namon kamo nga daan nga mag-aantos kita hin kasakitan, ngan maaram kamo nga ito gud an nahitabo.
5 Salit han diri ko na ito naiilob, ginsugo ko ngada ha iyo hi Timoteo basi hibaroan an iyo pagkamatinumanon, kay bangin la nasulay na kamo han Paragsulay, ngan makarag la an amon pangalimbasog.
6 Pero inabot pa la yana hi Timoteo tikang ha iyo ngan gin-istorya niya ha amon an maopay nga sumat mahitungod han iyo pagkamatinumanon ngan gugma, ngan han iyo pirme paghinumdom ha amon, ngan han iyo hingyap nga makita kami sugad han amon hingyap nga makita kamo.
7 Salit mga kabugtoan, ha ngatanan nga amon kasub-anan* ngan kasakitan, naliaw kami tungod ha iyo ngan han pagkamatinumanon nga iyo iginpapakita.
8 Napapakusog utro kami* kay natindog kamo hin marig-on dapig ha Ginoo.
9 Paonan-o namon papasalamatan an Dios tungod ha iyo ngan han daku nga kalipay namon ha atubangan han aton Dios tungod ha iyo?
10 Ha adlaw ngan gab-i sinsero gud nga nangangamuyo kami nga makita unta namon kamo basi maihatag kon ano an kulang ha iyo pagtoo.
11 Hinaot an Dios nga aton Amay ngan hi Jesus nga aton Ginoo maghimo hin paagi nga makakada kami ha iyo.
12 Dugang pa, hinaot buligan kamo han Ginoo nga mag-uswag pa, oo, nga magdugang pa an iyo gugma ha usa kag usa ngan ha ngatanan, sugad gud han amon paghigugma ha iyo,
13 basi iya parig-unon an iyo kasingkasing ngan himoon nga waray ikasaway ngan baraan ha atubangan han aton Dios ngan Amay ha presensya han aton Ginoo nga hi Jesus upod an ngatanan nga iya mga baraan.
