1 Tesalonica 2:1-20
2 Mga kabugtoan, maaram gud kamo nga an amon pagbisita ha iyo diri kay waray resulta.
2 Sugad han iyo hinbabaroan, nag-antos ngan ginmaltrato kami ha Filipos, pero katapos hito ginparig-on kami han aton Dios basi waray kahadlok nga isaysay ha iyo an maopay nga sumat han Dios bisan pa han daku nga pagkontra.
3 Kay an sinsero nga sagdon namon ha iyo diri tikang ha sayop nga ideya o ha maraot nga motibo ngan waray ito limbong,
4 kondi tungod kay gin-uyonan kami han Dios nga taporan han maopay nga sumat, amo nga nagyayakan kami, diri basi lipayon an mga tawo, kondi an Dios nga nag-uusisa han amon kasingkasing.
5 Ha pagkamatuod, maaram kamo nga waray gud kami pag-ulog-ulog o pagpakunokuno nga may hakugnon nga mga motibo. Testigo hito an Dios!
6 Waray liwat kami magtinguha hin espesyal nga pagtratar tikang ha mga tawo, tikang man ha iyo o ha iba, bisan kon sugad nga mga apostol han Kristo, puydi unta kami makapabug-at ha iyo ha pinansyal.
7 Ha kabaliktaran, gintratar namon kamo ha malumo nga paagi, sugad hin nagpapasuso nga iroy nga mahigugmaon nga nagmamangno ha iya mga anak.
8 Salit tungod kay pinalangga namon kamo, nalipay kami nga ipaangbit ha iyo diri la an maopay nga sumat han Dios kondi pati an amon mga kalag,* kay hinigugma gud namon kamo.
9 Mga kabugtoan, sigurado nga nahinunumdom kamo han amon maduruto nga pagtrabaho ngan pagbudlay. Nagtrabaho kami ha adlaw ngan gab-i basi diri kami makapabug-at ha pinansyal ha bisan hin-o ha iyo han nagsangyaw kami ha iyo han maopay nga sumat han Dios.
10 Mga testigo kamo, pati an Dios, kon mationan-o kami kamaunungon, kamatadong, ngan kawaray-sayop ha iyo nga mga tumuroo.
11 Maaram gud kamo nga padayon nga ginsagdonan, ginliaw, ngan gin-aghat namon an tagsa ha iyo, sugad la han ginbubuhat han usa nga amay ha iya mga anak,
12 basi padayon nga magkinabuhi kamo ha paagi nga inuuyonan han Dios nga nagtatawag ha iyo ngadto ha iya Ginhadian ngan himaya.
13 Oo, amo nga pirme kami nagpapasalamat ha Dios, kay han ginkarawat niyo an pulong han Dios nga iyo hinbatian ha amon, ginkarawat niyo ito diri sugad nga pulong han mga tawo kondi kon ano gud ito, sugad nga pulong han Dios, nga nakakaimpluwensya gud ha iyo nga mga tumuroo.
14 Kay ginsubad niyo, mga kabugtoan, an mga kongregasyon han Dios ha Judea nga kahiusa ni Kristo Jesus, kay nag-antos liwat kamo ha kamot han iyo mga kahimungto sugad la nga nag-antos liwat hira ha kamot han mga Judio,
15 nga nagpatay pa ngani han Ginoo nga hi Jesus ngan han mga propeta ngan nagtimaraot ha amon. Dugang pa, diri nira ginpapalipay an Dios, lugod nakontra hira ha kaopayan han ngatanan nga tawo,
16 kay nangangalimbasog hira nga pugngan kami ha pagsangyaw nga makakatalwas ha mga tawo han mga nasud. Hini nga paagi pirme hira nakakabuhat hin damu nga sala. Salit ha kataposan, an iya kangalas inabot ha ira.
17 Kondi mga kabugtoan, han ginbayaan namon kamo hin madaliay (ha pisikal, diri ha amon kasingkasing), diri ordinaryo nga pangalimbasog an amon ginbuhat basi makita kamo* tungod han duro nga hingyap namon.
18 Ini an hinungdan nga karuyag namon kumada ha iyo, ngan ako, hi Pablo, duha ka beses nangalimbasog pagkada ha iyo, pero gin-ulang kami ni Satanas.
19 Ano an amon paglaom o kalipay o korona han kadungganan ha atubangan han aton Ginoo nga hi Jesus ha iya presensya?* Diri ba kamo?
20 Oo, kamo an amon himaya ngan kalipay.
